Tramp i Mask vyrašyli naviedać Fort Noks — adno z samych zakrytych miescaŭ u śviecie, achutanaje kanśpirałohijaj

Pačynajučy ź minułaha tydnia, miljarder Iłan Mask pačaŭ publikavać u sacsietkach dopisy z patrabavańniem dostupu da adnaho z samych zakrytych abjektaŭ ZŠA (i śvietu ŭvohule) — vajskovaj bazy Fort-Noks u štacie Kientuki. Mask nastojvaje na praviadzieńni adtul pramoj videatranślacyi dla miljonaŭ hledačoŭ, čym sabraŭ mnostva ŭchvalnych vodhukaŭ.

Paźniej da dyskusii dałučyŭsia prezident ZŠA Donald Tramp, jaki vykazaŭ spadzieŭ, «što z Fort-Noksam usio ŭ paradku». Jon adznačyŭ, što źbirajecca tudy pajechać i pierakanacca, što «ŭsio tam budzie na miescy», piša Forbes.

Takaja ŭzmocnienaja cikavaść da bazy Fort-Noks i z boku amierykanskich elit, i z boku zvyčajnaha hramadstva isnuje davoli daŭno (z 1930-ych hadoŭ) i tłumačycca tym, što abjekt źjaŭlajecca hałoŭnym schoviščam nacyjanalnych załatych reziervaŭ ZŠA.

Zhodna z aktualnymi danymi Ministerstva finansaŭ ZŠA, u Fort-Noksie znachodzicca 147,3 miljona trojskich uncyj zołata (ci kala 5 tysiač mietrovych ton zołata) — što ŭjaŭlaje saboj 59% usich załatych reziervaŭ krainy. Pry ciapierašnim kursie zołata ($2940 za ŭncyju) košt hetaha zapasu składaje $434 miljardy. Adnak uradavy buchhałtarski ŭlik aceńvaje załaty zapas na abjekcie ŭsiaho ŭ $6 miljardaŭ, pakolki jaho bałansavy košt zastajecca na ŭzroŭni $42,22 za ŭncyju.

U 1941-1944 hadach u Fort-Noks taksama zachoŭvali Kanstytucyju ZŠA i Dekłaracyju niezaležnaści. U 1950-ja hady tam, pavodle niekatorych krynic, navat znachodziŭsia stratehičny zapas amierykanskaha ŭrana, jaki ŭłady ZŠA bajalisia trymać u inšych schoviščach.

Isnuje papularnaja ŭ ZŠA kanśpirałahičnaja teoryja, što amierykanskija załatyja reziervy mahli być całkam vykarystanyja ŭ ramkach tajemnych finansavych apieracyj, źviazanych z palitykaj «załatoha standartu» (kali dalar byŭ padmacavany zołatam i moh svabodna na jaho abmieńvacca) i inšymi prahramami padtrymańnia kursu dalara, albo stabilizacyi amierykanskaj ekanomiki ŭ pieryjad žorstkich kryzisaŭ.

Adsutnaść publičnaha dostupu da schovišča i vielmi strohija miery biaśpieki tolki ŭzmacniajuć padazreńni nakont taho, što bolšaść załatych zapasaŭ krainy mohuć być vyčarpanyja, adznačaje Forbes.

Niahledziačy na toje, što Ministerstva finansaŭ ZŠA kožny hod ładzić aŭdyt schovišča pad bazaj Fort-Noks i zapeŭnivaje, što ŭsio zołata na miescy, abjekt za ŭsiu svaju historyju prapuskaŭ starońnich naviedvalnikaŭ tolki try razy.

U 1943 hodzie tam pabyvaŭ prezident Franklin Ruźvielt. U 1974 hodzie hrupa z 10 amierykanskich kanhresmienaŭ naviedali schovišča, kab abvierhnuć čutki pra źniknieńnie zołata (adbyłosia heta amal adrazu paśla admieny ŭ ZŠA palityki «załatoha standartu»). A ŭ 2017 hodzie Fort-Noks naviedaŭ tahačasny ministr finansaŭ ZŠA Styvien Mnučyn, paśla čaho zajaviŭ, što «ŭsio zołata było na miescy».

Akramia strohaha publičnaha dostupu, Fort-Noks abaraniajecca šmatuzroŭnievaj sistemaj biaśpieki, jakaja ŭklučaje čatyry rady aharodžy, u tym liku elektryčnyja z vysokim napružańniem i kalučy drot. U dadatak da hetaha amal usia ŭnutranaja terytoryja vakoł bazy zaminiravanaja. Abjekt całkam aŭtanomny: maje zapasy vady, ježy i ŭłasnuju elektrastancyju, što robić jaho nieprystupnym navat pry praciahłaj abłozie.

Samo schovišča raźmieščana pad ziamloj i abaraniajecca hranitnymi ścienami taŭščynioj 1,2 mietra, pakrytymi bietonam i stallu. Dach vytrymlivaje mahutnyja vybuchi, a ŭvachodnaja brama važyć 22 tony i adčyniajecca tolki pry viedańni padzielenych pamiž roznymi ludźmi častak parolaŭ. Aproč fizičnaj biaśpieki, Fort-Noks kruhłasutačna achoŭvajecca vajskovymi padraździaleńniami armii ZŠA z tankami, viertalotami i snajpierami pa ŭsim pierymietry bazy.

Siońnia viersija ab adsutnaści zołata ŭ schoviščy zastajecca kanśpirałahičnaj. Adnak kali Mask i Tramp zdolejuć pravieści publičny aŭdyt, vyniki mohuć akazacca niečakanymi dla ŭsiaho śvietu.

Kali zołata ŭ Fort-Noksie sapraŭdy niama, heta moža vyklikać istotny finansavy kryzis u śviecie i surjoznyja palityčnyja nastupstvy. Davier da finansavaj sistemy ZŠA mocna pachiśniecca, što moža pryvieści da adčuvalnaha padzieńnia dalara i rostu cen na zołata i kryptavaluty.

Inšyja krainy, naprykład, Kitaj i Rasija, mohuć vykarystać situacyju dla ŭzmacnieńnia svaich valut.

Ale šaniec na praviadzieńnie publičnaha aŭdytu i pramoj tranślacyi sa schovišča vielmi mały.

• 3
• 0
• 8
• 12
• 2
• 1
• 0
• 0