U siryjskaj Łatakii ŭspychnuli sutyknieńni pamiž siłami biaśpieki i prychilnikami Asada
Zahinuli prynamsi 70 čałaviek.
U siryjskaj pravincyi Łatakija, dzie raźmieščanaja rasijskaja avijabaza, adbylisia žorstkija sutyknieńni pamiž siłami biaśpieki i prychilnikami zrynutaha prezidenta Bašara Asada, piša Bi-bi-si.
Pa źviestkach Siryjskaha centra manitorynhu za vykanańniem pravoŭ čałavieka (SOHR), jaki bazujecca ŭ Łondanie, u vyniku bajoŭ zahinuli prynamsi 70 čałaviek. Jak adznačaje arhanizacyja, heta samyja žorstkija sutyknieńni z momantu źviaržeńnia Asada ŭ śniežni.
Pavodle źviestak SOHR, siarod zahinułych — supracoŭniki słužbaŭ biaśpieki, bajcy, viernyja Asadu, a taksama mirnyja žychary.
«Bolš za 70 čałaviek zabityja, dziasiatki paranienyja i ŭziatyja ŭ pałon padčas kryvavych sutyknieńniaŭ i zasad na ŭźbiarežžy pamiž supracoŭnikami Minabarony, MUS i bajevikami armii zrynutaha režymu», — paviedamlaje SOHR.
Pavodle inšych źviestak, jakija pryvodziła raniej Siryjskaje infarmahienctva Step, uradavyja vojski zabili» kala 70 byłych bajevikoŭ režymu», a bolš za 25 byli zachoplenyja ŭ pałon.
U čaćvier Siryjskaje ahienctva Sana paviedamlała, što prychilniki zrynutaha prezidenta napali na adzin z błokpastoŭ u rajonie horada Džebła na bierazie Mižziemnaha mora.
Pobač z hetym miescam znachodzicca rasiejskaja avijabaza «Chmiejmim». Pastupali paviedamleńni ab sutyknieńniach u Tartusie, jaki znachodzicca niepadalok, a taksama ŭ inšych rajonach, u tym liku ŭ Chomsie i Alepa.
U pravincyi Łatakija była ŭviedzienaja kamiendanckaja hadzina da 10 ranicy piatnicy, u rehijon nakiravanyja dadatkovyja siły z Damaska. Dziaržaŭnyja ŚMI Siryi raniej raspaŭsiudzili zvarot pradstaŭnika Minabarony pierachodnaha ŭrada Chasana Hani da prychilnikaŭ Asada.
«Tysiačy ludziej vyrašyli skłaści zbroju i viarnucca da svaich siemjaŭ, a niekatoryja praciahvajuć biehčy i pamirać, abaraniajučy zabojcaŭ i złačyncaŭ. Vybar vidavočny: skłaści zbroju abo sustreć svoj niepaźbiežny los», — zajaviŭ jon.
Pradstaŭnik słužbaŭ biaśpieki ŭ Łatakii Mustafa Kniejfaci zajaviŭ, što padčas dobra spłanavanaha i naŭmysnaha napadu niekalki hrup atakavali ich pazicyi, u vyniku zahinuli i atrymali ranieńni» mnohija vajskoŭcy», skazaŭ jon, nie ŭdakładniŭšy kolkaść achviar.
«My adnovim stabilnaść u rehijonie i Abaronim majomaść našych ludziej», — cytuje jaho zajavu AFP.
U pravincyi Łatakija pražyvaje vialikaja abščyna ałavitaŭ, da jakoj naležyć zrynuty prezident Bašar Asad.
Pradstaŭniki abščyny kažuć, što cierpiać pieraśled z momantu źmieny ŭłady ŭ krainie, asabliva ŭ sielskich rajonach.
Kamientary