66-hadovaja žycharka Bierlina naradziła dzicia. Horad staić na vušach
Niekalki dzion tamu ŭ balnicy rajona Viedynh u Bierlinie naradziŭsia zdarovy chłopčyk Filip (praz kiesarava siačeńnie): 50 santymietraŭ rostu, 3550 hramaŭ vahi. Rody prajšli biez uskładnieńniaŭ, mama taksama adčuvaje siabie vydatna.
Zdavałasia b, zvyčajnaja historyja — ale jana pieratvaryłasia ŭ sapraŭdnuju siensacyju, bo maci Filipa — 66 hadoŭ, paviedamlaje telehram-kanał Genau.
Pavodle intervju, jakija ciapier davodzicca davać Alaksandry Childebrant, u hetaj historyi sutyknulisia dva suśviety: žurnalisty, dla jakich heta — siensacyja, i jana sama, dla jakoj ničoha niezvyčajnaha nie adbyłosia. Voś frahmient ź intervju:
— Čamu vy vyrašyli naradzić dziasiataje dzicia?
— A čamu nie, kali ja mahu heta zrabić!?
Alaksandra Childebrant naradziłasia ŭ Kijevie ŭ siamji etničnych niemcaŭ, pracavała mastačkaj, naradziła dvaich dziaciej, a ŭ 1990 hodzie pierajechała ŭ Bierlin. Tut jana paznajomiłasia z zasnavalnikam Muzieja Bierlinskaj ściany Rajnieram Childebrantam, vyjšła za jaho zamuž, a paśla jaho śmierci ŭznačaliła muziej — i kiruje im dahetul.
Paźniej Alaksandra znoŭ vyjšła zamuž — za bierlinskaha palityka z partyi Chryścijanskich demakrataŭ Daniela Dormana — i ŭ 53 hady znoŭ pačała naradžać.
Za apošnija 13 hadoŭ u jaje źjaviłasia vosiem dziaciej z pryhožymi imionami: Elizabet, Maksimilijan, Alaksandra, Leapold, Hanna, Maryja, Kataryna — i voś ciapier Filip.
Sama dyrektarka muzieja znachodzicca ŭ vydatnaj fizičnaj formie: nie ŭžyvaje ałkaholu, nie kuryć, rehularna biehaje pa dźvie hadziny i płavaje ŭ basiejnie. Kaža, što nie zaŭvažyła asablivaj roźnicy pamiž hetaj ciažarnaściu i papiarednimi — chiba što pracy stała bolš, a niekalki miesiacaŭ tamu siamja pierajechała ŭ niadaŭna nabyty dom. «Ja sama sabrała 500 skrynak», — adznačaje Alaksandra. Nieŭzabavie jana płanuje viarnucca da pracy ŭ muziei.
Udałaje naradžeńnie dziciaci ŭ takim uzroście — źjava redkaja, ale daloka nie ŭsim padabajecca, što Alaksandru abmiarkoŭvajuć, nibyta jana redki ekspanat. Žančyn uvohule časta asudžajuć: naradžaješ zanadta rana — kiepska, naradžaješ zanadta pozna — znoŭ nie tak. Ich pastajanna paraŭnoŭvajuć ź niejkim (niedasiažnym) ideałam.
«Naradziła ŭ 66 — i što?» — piša kałumnistka Tagesspiegel Danieła Martens. Nichto ž nie robić siensacyi z taho, što mužčyna ŭ 66 staŭ baćkam — dyk i tut nie treba.
Kamientary
Karaciej! Jak tam zaklikali ... ? "Nado"!