Šrajbman nazvaŭ try pryčyny, jakija pieraškadžajuć Łukašenku vypuścić palitviaźniaŭ
«Kali b jon mocna chacieŭ heta zrabić, jamu varta było b adpuścić Cichanoŭskaha i Kaleśnikavu. Ty ich vypuskaješ u Vilniu — i ŭ ciabie praź miesiac niama štaba Cichanoŭskaj jak adzinaha centra siły. Ale heta nie meta».
U novym vypusku jutub-kanała «ČiestnOK-LIVE» Alaksandr Ivulin spytaŭ u palityčnaha analityka Arcioma Šrajbmana, što pieraškadžaje Łukašenku vypuścić usich palitviaźniaŭ z umovaj ich vyjezdu za miažu. Taki krok, na pohlad žurnalista, «vybiŭ by hałoŭny kozyr z ruk apazicyi».
Adkazvajučy na pytańnie, Šrajbman adznačyŭ, što Łukašenka nie ličyć prablemu demakratyčnych siłaŭ takoj važnaj, kab takim šlacham jaje abiazzbroić.
«Kali b jon mocna chacieŭ heta zrabić, jamu varta było b adpuścić Cichanoŭskaha i Kaleśnikavu. Ty ich vypuskaješ u Vilniu — i ŭ ciabie praź miesiac niama štaba Cichanaŭskaj jak adzinaha centra siły. Kali b heta była meta. Ale heta nie meta».
Na dumku analityka, pakidajučy palitźniavolenych, Łukašenka imkniecca dasiahnuć troch met.
«Pa-pieršaje, jon ličyć, što nie ŭsie vyvučyli ŭrok. Treba razumieć, što niama takoha, što ty pabuziŭ, pastaviŭ pad ryzyku stabilnaść dziaržavy, a potym ciabie prosta praź niejkuju kolkaść hadoŭ vypuścili i ty hieroj. Voś takoha jon dapuścić nie žadaje.
Druhoje, heta pomślivaść. Ja nie schilny tut źmianšać absalutna banalnuju čałaviečuju pomślivaść. Jon ličyć, što jany ździejśnili ledź nie vyšejšaje z mahčymych złačynstvaŭ, tamu ŭ ich terminy, jak u zabojcaŭ, terarystaŭ i hetak dalej.
I treciaja pryčyna, jakaja ŭžo bolš nas viartaje ŭ śfieru palityčnaha analizu, zaklučajecca ŭ tym, što, jak dobry handlar, jon razumieje, što prama zaraz jon za ich nie atrymaje taho, čaho moža atrymać».
Jak vopytny hulec, Łukašenka, pa słovach Šrajbmana, prytrymlivaje kozyr palitźniavolenych da taho momantu, kali zmoža ich «pradać pa maksimalna darahim košcie», kali šmat jakija prablemy, kštałtu niezadavolenaści vybarami, stanuć nieaktualnymi, zabuducca ŭ tym liku i krainami Zachadu. U vyniku zastaniecca tolki prablema palitviaźniaŭ.
«Pakul usie faktary nie syducca razam, pakul, pa-pieršaje, nie sucišycca praha pomsty, a ź inšaha boku nie budzie adčuvańnia, što hety kozyr pradajecca nie prosta tak, ja dumaju, što (Łukašenka — NN) budzie trymać niejkuju častku palitviaźniaŭ».
Da taho ž Šrajbman sumniavajecca, što kali b palitviaźniaŭ vypuścili prosta ciapier, heta sapraŭdy pryviało b da admieny sankcyj.
Ciapier čytajuć
U Vieniesuele budzie nie prosta vyzvaleńnie palitviaźniaŭ, a amnistyja, pryčym za ŭsie hady. A miascovuju «amierykanku» pieratvorać u hramadskuju prastoru1616
U Vieniesuele budzie nie prosta vyzvaleńnie palitviaźniaŭ, a amnistyja, pryčym za ŭsie hady. A miascovuju «amierykanku» pieratvorać u hramadskuju prastoru16
Ahientka Kardaš vykarystoŭvała seks, kab źbirać infarmacyju pra kalinoŭcaŭ i zavierbavać ukrainskaha kamandzira. A kurataru KDB pisała pra jaho: «Moj łoch»3535
Kamientary