Amierykanka zadušyła traich svaich dziaciej. Ciapier za sudom nad joj sočyć uvieś śviet, a niekatoryja žančyny stali ŭ jaje abaronu
36‑hadovaja amierykanka Lindsi Kłensi zabiła traich svaich dziaciej. Sud nad joj vyklikaŭ vialiki rezanans nie tolki ŭ ZŠA. Abarona śćviardžaje, što žančyna była ŭ stanie paślarodavaha psichozu i čuła hołas, jaki zahadvaŭ joj zabić dziaciej i siabie. Abvinavačańnie z hetym nie zhodnaje.
Lindsi Kłensi pracavała miedsiastroj u radzilnym adździaleńni. Razam z mužam Patrykam žančyna žyła ŭ Dakśbiery, štat Masačusiets, prykładna za 50 kiłamietraŭ ad Bostana. U pary było troje dziaciej: piacihadovaja Kora, trochhadovy Doŭsan i vaśmimiesiačny Kałan.
Uvaha! Hety materyjał utrymlivaje apisańni žorstkich scen.
Trahičny viečar
Uviečary 24 studzienia 2023 hoda Lindsi Kłensi zamoviła ježu na vynas i paprasiła muža zabrać jaje, a pa darozie kupić leki dla dački. Kala 17:30 Patryk vyjechaŭ z domu i viarnuŭsia kala 18:10.
Pakul Patryk jeździŭ pa leki i ježu, Lindsi zastałasia adna ź dziećmi. Jana adviała ich u padvał i zadušyła humavymi stužkami dla fizičnych praktykavańniaŭ. A paśla sprabavała skončyć žyćcio samahubstam.
Viarnuŭšysia, Patryk ubačyŭ u spalni kroŭ i adčynienaje akno, a na ziamli kala doma znajšoŭ paranienuju žonku. Jon patelefanavaŭ u 911, a zatym pajšoŭ šukać dziaciej i znajšoŭ usich traich biez prytomnaści ŭ padvale.
Piacihadovaja Kora i trochhadovy Doŭsan pamierli ŭ toj ža viečar u balnicy. Vaśmimiesiačnaha Kałana dastavili ŭ dziciačuju balnicu Bostana, dzie jon pamior praz try dni. Lindsi vyžyła, ale praz traŭmu pazvanočnika zastałasia paralizavanaj nižej pojasa.
Kłensi abvinavacili ŭ zabojstvie traich dziaciej. Jaje advakaty nie asprečvajuć, što dziaciej zabiła mienavita maci. Hałoŭnaja sprečka ŭ sudzie — ci mahła Kłensi ŭ toj momant uśviedamlać svaje dziejańni i nieści za ich kryminalnuju adkaznaść. Sud nad Kłensi pačaŭsia 27 lipienia 2026 hoda ŭ Plimucie, štat Masačusiets.
Paślarodavy psichoz?
Paśla naradžeńnia treciaha dziciaci Kłensi pačała skardzicca na depresiju, tryvožnaść i biessań. Jana źviartałasia pa miedycynskuju dapamohu i prymała psichijatryčnyja preparaty. Pavodle materyjałaŭ suda, ź vieraśnia 2022 hoda da zabojstva dziaciej jak minimum šeść miedycynskich śpiecyjalistaŭ vypisali joj 30 receptaŭ na 13 roznych preparataŭ.
Svajaki Kłensi taksama raskazvali pra paharšeńnie jaje stanu ŭ apošnija miesiacy pierad zabojstvami. Maci Lindsi Poła Mashroŭ śviedčyła, što dačka stanaviłasia ŭsio bolš tryvožnaj i bajaźlivaj, a taksama vykazvała suicyidalnyja dumki. Pa słovach siastry Lindsi Elisan, žančyna dzialiłasia ź joj dumkami pra samahubstva i vykazvała zakłapočanaść svaim psichičnym stanam.
Śviakroŭ Lindsi Śjuzan Kłensi zajaviła, što taja nieadnarazova źviartałasia pa dapamohu i bajałasia prymać pryznačanyja joj leki. Niezadoŭha da zabojstvaŭ, pavodle Śjuzan, Lindsi kazała joj, što joj patrebnaja dapamoha i što jana niepakoicca praz svoj stan.
U pačatku studzienia 2023 hoda Kłensi na piać dzion lehła ŭ psichijatryčnuju balnicu McLean Hospital. Psichijatr Alija Hudchart zaśviedčyła, što Lindsi była ŭ depresii i pakutavała ad značnych prablem sa snom, ale psichozu nie prajaŭlała. Hudchart apisała Kłensi jak žančynu, jakaja budavała płany na budučyniu, była addanaja dzieciam i mieła značnuju padtrymku siamji. Sama Kłensi admaŭlała, što maje namier zabić siabie abo naškodzić inšym.
Psichijatr Dženifier Tafts, jakaja nazirała Kłensi niekalki miesiacaŭ, u pačatku studzienia adznačyła paharšeńnie jaje stanu i vyrašyła źmianić leki.
Apošniaja kansultacyja adbyłasia 23 studzienia, za dzień da zabojstvaŭ. Pavodle Tafts, Kłensi vyhladała pryhniečanaj i kazała, što joj davodzicca prymušać siabie ŭstavać z łožka. Pry hetym jana admaŭlała dumki pra samahubstva abo zabojstva, a prykmiet psichozu psichijatr nie zaŭvažyła.
Što było ŭ telefonie Kłensi
Na pracesie vyvučali taksama natatki i historyju pošuku ŭ telefonie Kłensi. U asabistych natatkach jana pisała pra depresiju, ciažkaści z dohladam małodšaha dziciaci, razvažała pra leki i pra toje, što choča znoŭ adčuvać siabie narmalna.
U internecie Kłensi šukała infarmacyju pra psichoz, šyzafreniju, halucynacyi i psichijatryčnyja preparaty. Byli i zapyty, źviazanyja z samahubstvam.
Razam z tym u dzień zabojstvaŭ jana zajmałasia zvyčajnymi spravami. Kłensi była ź dziećmi na vulicy i adpraviła mužu fota dvuch ź ich sa śniehavikom.
Hetyja i inšyja abstaviny stali častkaj sprečki pra toje, u jakim psichičnym stanie Kłensi znachodziłasia ŭ momant zabojstvaŭ.
Pazicyja abarony
Adnym z hałoŭnych śviedkaŭ abarony staŭ sudovy psichijatr Filip Reźnik, paviedamlaje The Guardian. Raniej jon vystupaŭ ekśpiertam, u pryvatnaści, u spravie Andrea Jejts, jakaja ŭ 2001 hodzie zabiła svaich piaciarych dziaciej.
Reźnik pryjšoŭ da vysnovy, što ŭ dzień zabojstvaŭ Kłensi była ŭ stanie psichozu. Jana raskazvała jamu, što čuła mužčynski hołas, jaki zahadaŭ joj zabić dziaciej, a potym siabie. Kłensi taksama apisvała adčuvańnie, što nie kantraluje ŭłasnaje cieła.
Reźnik nazvaŭ heta «tryźnieńniem upłyvu». Pavodle jaho słoŭ, Kłensi adčuvała siabie «niby maryjanietka, za nitki jakoj ciahnie niechta inšy».
Psichołah Poł Ziejzieł, jaki taksama vystupaŭ na baku abarony, pryjšoŭ da vysnovy, što ŭ momant zabojstvaŭ Kłensi nie ŭśviedamlała supraćpraŭnaści svaich dziejańniaŭ.
Ekśpierty abvinavačańnia
Ekśpierty abvinavačańnia pryjšli da inšaj vysnovy.
Sudovy psichołah Kirk Chajłbrun niekalki razoŭ sustrakaŭsia z Kłensi padčas padrychtoŭki ekśpiertyzy i raspytvaŭ jaje pra padziei 24 studzienia. Jon nie paličyŭ viersiju pra hołas, jaki nibyta zahadvaŭ joj zabić dziaciej, najbolš vierahodnym tłumačeńniem taho, što adbyłosia.
Kłensi raskazała Chajłbrunu, što, dušačy kožnaha ź dziaciej, kazała: «Idzi da Boha, dzietka. Idzi da Boha».
Na dumku Chajłbruna, Kłensi zabiła dziaciej, bo sama źbirałasia skončyć žyćcio samahubstvam i nie chacieła pakidać ich bieź siabie. Słovy pra Boha jon źviazaŭ ź jaje pierakanańniem, što paśla śmierci jana i dzieci buduć razam u rai.
Chajłbrun dyjahnastavaŭ u Kłensi bipalarnaje rasstrojstva II typu. Adnak, na jaho dumku, jano nie pazbaŭlała jaje zdolnaści razumieć supraćpraŭnaść svaich dziejańniaŭ.
Pry hetym dyjahnazy ekśpiertaŭ abvinavačańnia razyšlisia. Psichijatr Aŭram Mak dyjahnastavaŭ u Kłensi ciažkuju depresiju, ale nie znajšoŭ dastatkovych padstaŭ kazać pra bipalarnaje rasstrojstva abo psichoz. U hałoŭnym Mak i Chajłbrun syšlisia: abodva ličać, što Kłensi mahła razumieć, što jaje dziejańni byli supraćpraŭnymi.
Apošnim ekśpiertam, jakoha vyklikała abvinavačańnie, staŭ sudovy psichijatr Hrehary Saataf. Jon pryznaŭ, što ŭ Kłensi byli psichičnyja prablemy, ale pryjšoŭ da vysnovy, što padčas zabojstvaŭ jana razumieła roźnicu pamiž pravilnym i niapravilnym i mahła kantralavać svaje pavodziny.
Saataf taksama źviarnuŭ uvahu na toje, što padčas lačeńnia ŭ psichijatryčnaj balnicy McLean u pačatku studzienia 2023 hoda son Kłensi palepšyŭsia. Paźniej u tym ža miesiacy jana pisała maci, što stała lepš spać, adznačyŭ ekśpiert.
Jon taksama pastaviŭ pad sumnieŭ apovied Kłensi pra mužčynski hołas. Saataf źviarnuŭ uvahu, što roznym ekśpiertam jana pa-roznamu raskazvała, kali mienavita pačała jaho čuć. Psichijatr taksama paličyŭ nietypovym, što raniej Kłensi nie skardziłasia na hałasy, a ŭ dzień zabojstvaŭ hołas raptoŭna źjaviŭsia, byŭ pastajannym i źnik paśla śmierci dziaciej.
Pazicyja muža
Nieŭzabavie paśla śmierci dziaciej Patryk Kłensi publična padtrymaŭ žonku. U zajavie jon paprasiŭ daravać Lindsi, jak daravaŭ jaje sam. Sprava Kłensi paśla hetaha vyklikała šyrokuju dyskusiju ŭ ZŠA pra paślarodavyja psichičnyja razłady.
Mnohija žančyny stali ŭ abaronu Lindsi, bo sami sutykalisia z paślarodavaj depresijaj i niedastatkovaj miedycynskaj dapamohaj padčas jaje. Inšyja nie razumiejuć, jak možna apraŭdvać zabojstva dziaciej.
Adnačasova ŭ sacyjalnych sietkach pačali raspaŭsiudžvacca kanśpirałahičnyja viersii, pavodle jakich dziaciej nibyta zabiŭ Patryk, a vinu ŭskłaŭ na žonku. Nijakich dokazaŭ jaho datyčnaści da zabojstvaŭ niama, i takich abvinavačańniaŭ jamu nie vystaŭlali.
U studzieni 2026 hoda Lindsi i Patryk paasobku padali hramadzianskija pazovy suprać niekalkich miedykaŭ, jakija lačyli jaje pierad zabojstvami. Jany abvinavačvajuć ich u niadbajnaści i nienaležnym akazańni miedycynskaj dapamohi.
Da hetaha času šlub Lindsi i Patryka raspaŭsia: Patryk padaŭ na razvod, a ŭ krasaviku 2026 hoda ažaniŭsia ź inšaj žančynaj.
Što ciapier
26 žniŭnia ŭ sudzie zaviaršylisia pakazańni śviedkaŭ. Za 21 dzień pracesu 12 prysiažnych vysłuchali 85 čałaviek. 27 žniŭnia abvinavačańnie i abarona vystupiać z zaklučnymi pramovami, paśla čaho prysiažnyja pačnuć abmiarkoŭvać vierdykt.
Kłensi abvinavačvajuć u troch zabojstvach pieršaj stupieni. Adnak prysiažnyja mohuć pryznać jaje vinavataj i pa mienš ciažkich abvinavačańniach — u zabojstvie druhoj stupieni abo nienaŭmysnym zabojstvie.
Jany taksama mohuć pryznać Kłensi nievinavataj z pryčyny adsutnaści kryminalnaj adkaznaści — kali vyrašać, što praź psichičny stan jana nie mahła ŭśviedamlać supraćpraŭnaść svaich dziejańniaŭ.
Za zabojstva pieršaj stupieni ŭ Masačusietsie praduhledžana pažyćciovaje źniavoleńnie biez prava na daterminovaje vyzvaleńnie. Kali ž Kłensi pryznajuć nievinavataj z pryčyny adsutnaści kryminalnaj adkaznaści, jaje mohuć nakiravać u dziaržaŭnuju psichijatryčnuju balnicu.
Ciapier čytajuć
«Na takuju ch**niu paviałasia». Rasijanka pryjechała ź Sibiry ŭ Biełaruś i ciapier z maciukami raskazvaje, jak tut składana žyć21
Kamientary