«Niekatoryja tak — chi-chi, cha-cha — uspryniali». Łukašenka raskazaŭ pra niečakanyja vyniki nakiravańnia niadbajnych sielhasrabotnikaŭ u armiju
«Jany ziamlanki vykapali lepš, čym u Minsku kvatery abstalavali. Voś tabie i pjanicy, takija-siakija».
Alaksandr Łukašenka na naradzie pa asobnych pytańniach sacyjalna-ekanamičnaha raźvićcia padzialiŭsia niečakanymi vynikami nakiravańnia niadbajnych sielhasrabotnikaŭ u armiju, piša BiełTA.
Jon nahadaŭ raniejšy tezis: «treba pracavać, kali nie chočam vajavać».
«Pryviadu prykład. Niekatoryja tak — «chi-chi, cha-cha» — uspryniali, kali ja skazaŭ na sielektarnaj naradzie: niadbajnych, ałkaholikaŭ i inšych, chto nie choča pracavać na ziamli padčas uborki, — na «front». U armiju, u siły śpiecyjalnych apieracyj, na miažu — da Krupko i Parchomčyka, Chrenin (kiraŭniki Homielskaj i Bresckaj abłaściej adpaviedna i ministr abarony) — adkazny», — nahadaŭ jon.
Alaksandr Łukašenka adznačyŭ, što spačatku dumaŭ, što takich ludziej mohuć być tysiačy, ale ŭ vyniku z dapamohaj miascovych uładaŭ znajšli i pryzvali kala 500 čałaviek.
Jon raskazaŭ, što ŭžo nieadnojčy cikaviŭsia ŭ ministra abarony Viktara Chrenina, jak hetaje papaŭnieńnie ź liku niadbajnych rabotnikaŭ spraŭlajecca z armiejskaj słužbaj. I niekalki razoŭ prasiŭ pierapravieryć infarmacyju, kali jamu dakładvali, što ŭ armii da ich niama pytańniaŭ.
«Ja nie pavieryŭ. Kažu: «Pierapravier, sam pahladzi». Jašče raz praz tydzień pytajusia. Jon mnie: «Alaksandr Ryhoravič, dazvolcie zaachvocić». Kažu: «Ty što, zvarjacieŭ? Heta ž pjanicy, takija-siakija…» Tvary śvietłyja, pracujuć, vykonvajuć usio, što aficer skaža. Nu nijakich pretenzij», — raskazaŭ jon.
«A kažuć, što armija — heta nie łahier dla vychavańnia, jak Valfovič (dziaržaŭny sakratar Rady biaśpieki) skazaŭ. Tak, heta nie łahier. Ale škoła vychavańnia vielmi dobraja, — upeŭnieny Alaksandr Łukašenka. — Narmalnyja mužyki. Prajšli pierapadrychtoŭku. Ja kažu: «Usim zbroju, jak vajennym. Pieraapranuć, pahalić, pastryhčy. I tudy». Bajavoje zładžvańnie, usio zrabili pa apošnich standartach. Mabilnyja hrupy, taktyčnyja hrupy. Usio, što nam treba dla abarony miažy. My ž nie vajujem va Ukrainie, a abaraniać miažu treba. I nakiravali tudy 170 čałaviek adrazu».
Jon raskazaŭ, što i tam nie było nijakich pretenzij da hetych ludziej:
«Jany ziamlanki vykapali lepš, čym u Minsku kvatery abstalavali. Voś tabie i pjanicy, takija-siakija».
U suviazi z hetym, zaŭvažyŭ Alaksandr Łukašenka, uźnikaje pytańnie, čamu ich nie zmahli naležnym čynam arhanizavać na asnoŭnym miescy pracy: «My nie zmahli ich arhanizavać. A ŭ armii Chrenin sa svaimi aficerami arhanizavaŭ ich dziejnaść i prosić ich uznaharodzić.
Kažu: «Davaj pačniom z taho, što ty ich uznaharodziš, ja nie suprać». Budzie ŭznaharodžvać asobnych tam lepšych ludziej. Značyć, ludzi mohuć pracavać».
Jon taksama padkreśliŭ, što isnujuć peŭnyja mietady i ryčahi ŭździejańnia na tych, chto nie choča naležnym čynam vykonvać svaje pracoŭnyja abaviazki. Stavicca da ludziej treba pa-čałaviečy, ale i žalezabietonna patrabavać, skazaŭ jon.
U lipieni Łukašenka prapanavaŭ adpraŭlać niadbajnych čynoŭnikaŭ i rabotnikaŭ sielskaj haspadarki na vajskovyja zbory. Paśla hetaha Minabarony adpraviła vajenkamaŭ inśpiektavać sielhaspradpryjemstvy padčas žniva.
7 žniŭnia Łukašenka padčas naviedvańnia Vilejki i rajona zajaviŭ, što ŭ vojska nakiravali kala 500 niadbajnych čynoŭnikaŭ i śpiecyjalistaŭ. Jon prapanavaŭ pryciahnuć ich da rabot na zaniadbanych sielskahaspadarčych ziemlach Minskaj vobłaści.
«Vaźmicie hetyja dźvie bataljonna-taktyčnyja hrupy, jakija stvaryli ź niadbajnych čynoŭnikaŭ i śpiecyjalistaŭ. Razumiejecie, pra što idzie havorka? Ciapier ich kala 500 čałaviek. Ja ich nazyvaju — dźvie bataljonna-taktyčnyja hrupy», — zajaviŭ tady jon.
Kamientary
Ja spačatku taksama hladzieŭ na heta jak na trahikamiedyju. Nu drenna pracuje, tak zvołnicie jaho prosta, ale na jakoj padstavie u vojska?
Ale zaraz ja usie ž dumaju, što tut nie usie tak prosta, heta abkatka mabilizacyi. Jak rasiejcy na małych narodach, tak tut heta patrabujecca na kałhaśnikach "ałkašach", samaj vyhodnaj dla hetaha sacyjalnaj hrupy.