Kamiery na darohach usio ž pačali łavić aŭto biez techahladu? Biełarus pakazaŭ, jak atrymaŭ štraf
Błohier pakazaŭ, jak atrymaŭ štraf za adsutnaść techahladu z kamiery na maładziečanskaj trasie.
Navina, jakaja pastaviła na vušy aŭtamabilistaŭ i stvaryła čerhi na techahlad
Tema techahladu ŭ Biełarusi aktualizavałasia 12 sakavika paśla taho, jak DAI Hrodzienskaj vobłaści apublikavała ŭ instahramie navinu, što ciapier lubaja kamiera na darozie nibyta moža fiksavać niaprojdzieny techahlad.
«Usie kamiery kantrolu chutkaści, a taksama kamiery manitorynhu pa ŭsioj Biełarusi zaraz paralelna praviarajuć dziaržtechahlad aŭtamabila. Kali jaho niama, robiać aŭtamatyčnaje fota, a śledam vam prylacić «list ščaścia» sa štrafam», — havaryłasia ŭ zajavie hrodzienskaj DAI.
I choć infarmacyja vyhladała nie vielmi praŭdapadobnaj, bo havorka viałasia absalutna pra ŭsie kamiery manitorynhu, narod łamanuŭ prachodzić techahlad. U vyniku pierad stancyjami pačali ŭtvaracca vielizarnyja čerhi.
Paźniej DAI Minskaj vobłaści nazvała fejkam infarmacyju hrodzienskich kaleh i dadała, što zvyčajnyja kamiery videanazirańnia i kamiery respublikanskaj sistemy manitorynhu hramadskaj biaśpieki ŭ aŭtamatyčnym režymie nie mohuć fiksavać tyja ci inšyja parušeńni.
Jak tady błohier atrymaŭ štraf?
Niahledziačy na toje, što ahučanaja DAI Hrodzienskaj vobłaści infarmacyja była chłuślivaj, u Biełarusi ŭsio ž jość kamiery, zdolnyja ŭ aŭtamatyčnym režymie fiksavać aŭtamabili biez techahladu.
Błohier z Maładziečna pakazaŭ, što atrymaŭ štraf mienavita za adsutnaść techahladu, a nie kamplekt chutkaść+techahlad, bo takija vypadki, kali prychodziŭ dvajny štraf, sustrakalisia i raniej. Ale ŭ takich vypadkach hałoŭnym byŭ faktar taho, što mašyna traplała ŭ pole zroku kamiery praź pieravyšanuju chutkaść.
Ahułam ža štrafy za techahlad u testavym režymie biez pryviazki da chutkaści pačali vypisvać jašče ź leta 2023 hoda.
Admietna, što ŭ vypadku z błohieram štraf za adsutnaść techahladu z kamiery jon atrymaŭ na nastupny dzień paśla taho, jak skončyŭsia toj samy techahlad.
Błohieru vypisali 21 rubiel štrafu (0,5 bazavych), bo na praciahu hoda jon užo atrymlivaŭ papiaredžańnie.
Kamiera, na jakuju trapiŭ maładziečaniec, znachodzicca na maładziečanskaj trasie ŭ vioscy Krasoŭščyna.
U kamientarach pad videa adzin z karystalnikaŭ taksama paviedamiŭ, što raniej atrymlivaŭ štraf za adsutnaść techahladu z kamier, jakija fiksujuć siaredniuju chutkaść, što taksama hučyć praŭdapadobna z techničnaha punktu hledžańnia. Takija kamiery źbirajuć infarmacyju ab zajeździe mašyny na pramiežak trasy i vyjeździe.
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu16
Kamientary