Камеры на дарогах усё ж пачалі лавіць аўто без тэхагляду? Беларус паказаў, як атрымаў штраф
Блогер паказаў, як атрымаў штраф за адсутнасць тэхагляду з камеры на маладзечанскай трасе.
Навіна, якая паставіла на вушы аўтамабілістаў і стварыла чэргі на тэхагляд
Тэма тэхагляду ў Беларусі актуалізавалася 12 сакавіка пасля таго, як ДАІ Гродзенскай вобласці апублікавала ў інстаграме навіну, што цяпер любая камера на дарозе нібыта можа фіксаваць няпройдзены тэхагляд.
«Усе камеры кантролю хуткасці, а таксама камеры маніторынгу па ўсёй Беларусі зараз паралельна правяраюць дзяржтэхагляд аўтамабіля. Калі яго няма, робяць аўтаматычнае фота, а следам вам прыляціць «ліст шчасця» са штрафам», — гаварылася ў заяве гродзенскай ДАІ.
І хоць інфармацыя выглядала не вельмі праўдападобнай, бо гаворка вялася абсалютна пра ўсе камеры маніторынгу, народ ламануў праходзіць тэхагляд. У выніку перад станцыямі пачалі ўтварацца велізарныя чэргі.
Пазней ДАІ Мінскай вобласці назвала фэйкам інфармацыю гродзенскіх калег і дадала, што звычайныя камеры відэаназірання і камеры рэспубліканскай сістэмы маніторынгу грамадскай бяспекі ў аўтаматычным рэжыме не могуць фіксаваць тыя ці іншыя парушэнні.
Як тады блогер атрымаў штраф?
Нягледзячы на тое, што агучаная ДАІ Гродзенскай вобласці інфармацыя была хлуслівай, у Беларусі ўсё ж ёсць камеры, здольныя ў аўтаматычным рэжыме фіксаваць аўтамабілі без тэхагляду.
Блогер з Маладзечна паказаў, што атрымаў штраф менавіта за адсутнасць тэхагляду, а не камплект хуткасць+тэхагляд, бо такія выпадкі, калі прыходзіў двайны штраф, сустракаліся і раней. Але ў такіх выпадках галоўным быў фактар таго, што машына трапляла ў поле зроку камеры праз перавышаную хуткасць.
Агулам жа штрафы за тэхагляд у тэставым рэжыме без прывязкі да хуткасці пачалі выпісваць яшчэ з лета 2023 года.
Адметна, што ў выпадку з блогерам штраф за адсутнасць тэхагляду з камеры ён атрымаў на наступны дзень пасля таго, як скончыўся той самы тэхагляд.
Блогеру выпісалі 21 рубель штрафу (0,5 базавых), бо на працягу года ён ужо атрымліваў папярэджанне.
Камера, на якую трапіў маладзечанец, знаходзіцца на маладзечанскай трасе ў вёсцы Красоўшчына.
У каментарах пад відэа адзін з карыстальнікаў таксама паведаміў, што раней атрымліваў штраф за адсутнасць тэхагляду з камер, якія фіксуюць сярэднюю хуткасць, што таксама гучыць праўдападобна з тэхнічнага пункту гледжання. Такія камеры збіраюць інфармацыю аб заездзе машыны на прамежак трасы і выездзе.
Каментары