Litoŭski hienierał raskazaŭ, što mahło zdarycca z čaćviortym amierykanskim vajskoŭcam, jakoha šukajuć
Na litoŭskim vajskovym palihonie ŭ litoŭskim Padbrodździ praciahvajecca pošukava-vyratavalnaja apieracyja. Armija ZŠA raniej paviedamiła, što paśla taho, jak z bałota na terytoryi palihona dastali zatanuły braniravany evakuatar M88, unutry jaho byli znojdzieny cieły troch zahinułych amierykanskich vajskoŭcaŭ. Pošuki čaćviortaha sałdata praciahvajucca, piša Lietuvos rytas.
Načalnik štaba abarony Litoŭskaj armii hienierał-lejtenant Remihijus Bałtrenas 31 sakavika ŭviečary na terytoryi palihona paviedamiŭ apošnija naviny.
«Vadałazy praciahvajuć svaju pracu. Jany nyrajuć, šukajučy miescy, dzie moža znachodzicca sałdat, vykarystoŭvajučy peŭnyja prykmiety. Dadatkova zadziejničanyja vadzianyja sanary, jakija dapamahajuć vyjavić mahčymyja miescy jaho znachodžańnia. Treci mietad — heta vykarystańnie drona sa skanavalnym abstalavańniem. Jon skanuje vodnuju pavierchniu, kab vyznačyć mahčymyja miescy znachodžańnia sałdata», — rastłumačyŭ hienierał.
Pavodle jaho słoŭ, hetyja raboty buduć praciahvacca ŭsiu noč.
Pošuki ŭskładniajucca tym, što ŭ poŭnaj ciemry ciažka namacać navat vielizarnuju braniravanuju mašynu, a znajści ŭ tvani čałaviečaje cieła jašče ciažej. Adzinaje, što moža krychu palehčyć pracu, — heta toje, što cieła sałdata pavinna znachodzicca niedzie pobač ź miescam, dzie znajšli mašynu:
«Pošuki pačalisia mienavita ŭ hetym rajonie, i ciapier my pašyrajem zonu ŭ baki. Vadałazy vielmi mietadyčna padzialili ŭvieś učastak na kvadraty i pracujuć ź imi», — adznačyŭ Remihijus Bałtrenas.
Na jakoj hłybini moža znachodzicca cieła vajskoŭca, dakładna nie viadoma.
Vykazaŭsia hienierał i pra toje, jakim čynam adzin z čatyroch vajskoŭcaŭ moh apynucca za miežami mašyny.
«Dakładna kazać pra heta vielmi składana, ale, vierahodna, siła vady i hrazi, ź jakoj braniavanaja mašyna nyrnuła ŭ vadu, svaim ciskam mahła vykinuć sałdata z samoj mašyny».
Paćvierdziłasia hibiel na palihonie ŭ Padbrodździ tolki troch amierykanskich vajskoŭcaŭ. Adzin źnik bieź viestak
Vajskovuju mašynu z amierykanskimi vajskoŭcami, što zatanuła na palihonie ŭ Litvie, dastali
Pałkoŭnik armii ZŠA pra pošuk źnikłych vajskoŭcaŭ u Padbrodździ: Za 24 hady słužby ja nie bačyŭ ničoha padobnaha
Ekśpiert pra źniknieńnie amierykanskich vajskoŭcaŭ u Litvie: Jość try viersii
U Litvie na miažy ź Biełaruśsiu paśla vučeńniaŭ źnikli čaćviora amierykanskich vajskoŭcaŭ
Ciapier čytajuć
Kamanda maleńkaha karybskaha vostrava Kiurasaa ŭpieršyniu ŭ historyi zhulaje na čempijanacie śvietu pa futbole. Što za vostraŭ i jak takoje atrymałasia?33
Kamientary