U Mahilovie napadała 25 sm śniehu. Heta bolš, čym za ŭsiu minułuju zimu
Pavodle Biełhidramieta, 5 krasavika ŭ Mahiloŭskaj vobłaści nazirałasia składanaja mietearałahičnaja situacyja: paryvy vietru dasiahali 15 m/s (maksimalnaja chutkaść — u Horkach), vypała šmat mokraha śniehu. U Mahilovie zafiksavali vyšyniu śniehu ŭ 25 sm. Heta bolš, čym za ŭsiu minułuju zimu.
Pavodle infarmacyi RUP «Mahiloŭenierha», u vyniku niepahadzi bieź śviatła zastalisia 128 nasielenych punktaŭ, 15 małočnatavarnych fierm i 5 kacielniaŭ.
Na ranicu 6 krasavika ŭsio jašče adklučanymi zastajucca 98 transfarmatarnych padstancyj, 46 nasielenych punktaŭ, 5 MTF u Biełynickim, Babrujskim, Drybinskim i Asipovickim rajonach. Enierhietyki praciahvajuć adnaŭlenčyja pracy.
Padraździaleńni MNS ździejśnili 12 vyjezdaŭ dla ŭborki pavalenych dreŭ u roznych rajonach vobłaści. Pavodle źviestak viedamstva, paciarpiełych niama.
Niekatoryja ciahniki na ŭčastku Asipovičy-Mahiloŭ iduć z adchileńniem ad hrafika. Z-za niespryjalnych umoŭ nadvorja 6 krasavika na ŭčastku Asipovičy-Mahiloŭ čyhunki adbyłosia padzieńnie dreŭ na čyhunačnyja šlachi.
Niepahadź taksama zakranuła Minskuju vobłaść, paviedamlaje RUP «Minskenierha». Najbolš paciarpieli Puchavicki i Słucki rajony — z-za nalipańnia śniehu i mocnaha vietru paškodžany linii elektrapieradač.
Na ranicu 6 krasavika biez elektryčnaści zastavalisia žychary bolš čym 130 nasielenych punktaŭ.
U «Minskenierha» padkreślivajuć, što śpiecyjalisty pracujuć kruhłasutačna, kab maksimalna chutka adnavić elektrazabieśpiačeńnie.
Kamientary