U budynku HUBAZiKa ŭ centry Minska adkryjuć małuju scenu teatra Janki Kupały
U stalicy pačynajuć rychtavacca da 1000-hodździa horada, jakoje adbudziecca ažno ŭ 2067 hodzie. Ale niekatoryja źmieny musiać adbycca ŭžo ŭ najbližejšyja hady.
U administracyi Centralnaha rajona Minska pačałosia hramadskaje abmierkavańnie prajekta «Minskhrada», jaki musić źmianić histaryčny centr horada.
U paviedamleńni havorycca, što materyjały prajekta buduć dastupnyja na sajcie, ale pa fakcie nie vykładziena ničoha, akramia niečytelnaj schiemy častki horada. Kab daviedacca choć niešta pra prajekt, treba asabista naviedać administracyju rajona.
Heta nie novy prajekt, a ŭniasieńnie źmien u raniej pryniaty horadabudaŭničy prajekt detalovaha płanavańnia rekanstrukcyi, restaŭracyi, adnaŭleńnia i dobraŭparadkavańnia histaryčnaha centra Minska.
Niekatoryja źmieny adnosiacca až da 2067 hoda, a heta značyć, što dakumient padrychtavany da adznačeńnia 1000-hodździa Minska. Niahledziačy na taki surjozny jubilej, u prajekcie niama ničoha revalucyjnaha i ŭnikalnaha, nie adčuvajecca palityčnych ambicyj zrabić Minsk znoŭ vialikim.
Zbolšaha dakumient prapanuje kaśmietyčnyja źmieny, stvarajučy iluziju pracy biez realnaha palapšeńnia i vypraŭleńnia starych pamyłak u histaryčnaj haradskoj prastory.
U čas vajny i jašče bolš u čas chruščoŭskaj pierapłaniroŭki horada Minsk straciŭ bolšuju častku zabudovy, pry hetym na jaje miescy ŭ niekatorych vypadkach nie źjaviłasia ŭvohule ničoha. Zamiest adnaŭleńnia stračanych vulic i zabudovy prapanujucca novyja hramadskija prybiralni i płošča dla masavych hulańniaŭ nasuprać «Halerei», dzie jana i tak užo isnuje. Ci, naprykład, prapanujecca vypravić zabudovu Zybickaj «srodkami dobraŭparadkavańnia i haradskoha dyzajnu».
Jość niekalki hłabalnych idej. Horadabudaŭniki ŭsio jašče nie adpuskajuć nadzieju razhruzić ad transpartu Vierchni horad, pabudavaŭšy tunel pad płoščaj Svabody. Na realizacyju hetaha płanu byŭ realny šaniec u 2022 hodzie, kali abvaliŭsia puciepravod cieraź Niamihu, ale im nie skarystalisia, a ŭ aŭralnyja terminy pa zahadzie Łukašenki pabudavali novy most.
Dumajuć i pra toje, jak źviazać razroźnienyja kavałki histaryčnaha centra ŭ adno cełaje. Płanujuć źmienšyć šyryniu prajeznych častak vulicy Niamiha i vulicy Bahdanoviča, pad apošniaj puścić praciah vulicy Zybickaj u bok Zamčyšča. Taksama płanujuć adnavić płaniroŭku Nova-Miaśnickaj vulicy, jakaja kaliści ahinała vały zamka, i prapuścić jaje praz padziemny tunel, praciahnuŭšy ad Rakaŭskaha pradmieścia da Zamčyšča. Ideja złučyć Vierchni horad, Trajeckaje pradmieście i Zamčyšča piešachodnymi mastami ŭžo častkova realizujecca.
Na Zamčyščy ŭsio jašče płanujuć stvaryć muziejny kompleks z adnaŭleńniem abaronnych zbudavańniaŭ i zamkavaj bramy staražytnaha Mienska.
Pra toje, jak vyhladali ścieny i brama Mienskaha zamka, nieviadoma ničoha. Usie rekanstrukcyi hruntujucca na frahmientach nižnich viancoŭ zrubaŭ, jakija zachavalisia ŭ ziamli. U biełaruskaj navukovaj tradycyi, śledam za savieckaj, hetyja pareštki, jak my pisali raniej, vidać, interpretujuć pamyłkova. Adnaŭleńnie takich abjektaŭ —heta najčyściejšaja fantazija, škodnaja dla navuki.
Na terytoryi Nižniaha rynku (ciapier płošča 8 Sakavika) płanujuć adnavić histaryčnuju płaniroŭku i zabudovu «pa vynikach kompleksnych navukovych daśledavańniaŭ i vynikaŭ konkursu prajektaŭ». Ale raniej ułady addavali pieravahu nie detalovamu i navukova abhruntavanamu prajektu rehienieracyi dla hetaj terytoryi ad Tavarystva achovy pomnikaŭ, a viasiołamu «bałahančyku» aŭtarstva Siarhieja Bahłasava.
Bolšaść hetych źmien adniesieny na dalokuju pierśpiektyvu, na pieryjad paśla 2030 hoda. Ale jość i niekalki cikavych rečaŭ, jakija musiać być realizavany ŭžo ŭ nastupnyja piać hadoŭ.
Naprykład, sumnaviadomamu HUBAZiKu daviadziecca pakinuć svoj budynak pa Revalucyjnaj vulicy, 3, bo jaho płanujuć rekanstrujavać pad małuju scenu teatra imia Janki Kupały. Dla hetaha da byłoha doma minskaha vice-hubiernatara zrobiać prybudovu z dvara.
U dvarach HUBAZiKa i archikafiedralnaha sabora Najśviaciejšaj Dzievy Maryi chočuć raźbić vystavačny skvier. Pobač pašyrać majsterniu-muziej skulptara Ivana Misko. Jašče adzin muziej — historyi raźvićcia charčovaj pramysłovaści — źbirajucca adkryć u domie pa Rakaŭskaj vulicy, 30.
Cudam acalełyja davajennyja damki na Špalernym zavułku, jaki taksama znachodzicca ŭ miežach histaryčnaha centra, pojduć pad znos. Zavułak praciahnuć da vulicy Mielnikajcie i pabudujuć tam ofisy i žyły dom z padziemnym parkinham.
Hramadskaje abmierkavańnie prachodzić z 9 krasavika 2025 pa 24 krasavika 2025 hoda. Materyjały dla aznajamleńnia pradstaŭleny ŭ faje 1-ha pavierchu budynka administracyi Centralnaha rajona, na sajcie ich niama. Zaŭvahi i prapanovy ŭ piśmovaj formie z paznakaj «hramadskija abmierkavańni» buduć prymacca pa 24 krasavika 2025 hoda ŭklučna pa adrasie: 220004, h. Minsk, vuł. Mielnikajcie, 6.
«Naša Niva» — bastyjon biełaruščyny
PADTRYMAĆ
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu1515
«Na vybarach prezidenta ja b hałasavaŭ za Łatušku». Hutarka z patencyjnym śpikieram KR Arciomam Bruchanam — pra śmierć maci, tatuiroŭki i Mielnikavu15
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ11
Kamientary