У будынку ГУБАЗіКа ў цэнтры Мінска адкрыюць малую сцэну тэатра Янкі Купалы
У сталіцы пачынаюць рыхтавацца да 1000-годдзя горада, якое адбудзецца ажно ў 2067 годзе. Але некаторыя змены мусяць адбыцца ўжо ў найбліжэйшыя гады.
У адміністрацыі Цэнтральнага раёна Мінска пачалося грамадскае абмеркаванне праекта «Мінскграда», які мусіць змяніць гістарычны цэнтр горада.
У паведамленні гаворыцца, што матэрыялы праекта будуць даступныя на сайце, але па факце не выкладзена нічога, акрамя нечытэльнай схемы часткі горада. Каб даведацца хоць нешта пра праект, трэба асабіста наведаць адміністрацыю раёна.
Гэта не новы праект, а ўнясенне змен у раней прыняты горадабудаўнічы праект дэталёвага планавання рэканструкцыі, рэстаўрацыі, аднаўлення і добраўпарадкавання гістарычнага цэнтра Мінска.
Некаторыя змены адносяцца аж да 2067 года, а гэта значыць, што дакумент падрыхтаваны да адзначэння 1000-годдзя Мінска. Нягледзячы на такі сур’ёзны юбілей, у праекце няма нічога рэвалюцыйнага і ўнікальнага, не адчуваецца палітычных амбіцый зрабіць Мінск зноў вялікім.
Збольшага дакумент прапануе касметычныя змены, ствараючы ілюзію працы без рэальнага паляпшэння і выпраўлення старых памылак у гістарычнай гарадской прасторы.
У час вайны і яшчэ больш у час хрушчоўскай перапланіроўкі горада Мінск страціў большую частку забудовы, пры гэтым на яе месцы ў некаторых выпадках не з’явілася ўвогуле нічога. Замест аднаўлення страчаных вуліц і забудовы прапануюцца новыя грамадскія прыбіральні і плошча для масавых гулянняў насупраць «Галерэі», дзе яна і так ужо існуе. Ці, напрыклад, прапануецца выправіць забудову Зыбіцкай «сродкамі добраўпарадкавання і гарадскога дызайну».
Ёсць некалькі глабальных ідэй. Горадабудаўнікі ўсё яшчэ не адпускаюць надзею разгрузіць ад транспарту Верхні горад, пабудаваўшы тунэль пад плошчай Свабоды. На рэалізацыю гэтага плану быў рэальны шанец у 2022 годзе, калі абваліўся пуцеправод цераз Нямігу, але ім не скарысталіся, а ў аўральныя тэрміны па загадзе Лукашэнкі пабудавалі новы мост.
Думаюць і пра тое, як звязаць разрозненыя кавалкі гістарычнага цэнтра ў адно цэлае. Плануюць зменшыць шырыню праезных частак вуліцы Няміга і вуліцы Багдановіча, пад апошняй пусціць працяг вуліцы Зыбіцкай у бок Замчышча. Таксама плануюць аднавіць планіроўку Нова-Мясніцкай вуліцы, якая калісьці агінала валы замка, і прапусціць яе праз падземны тунэль, працягнуўшы ад Ракаўскага прадмесця да Замчышча. Ідэя злучыць Верхні горад, Траецкае прадмесце і Замчышча пешаходнымі мастамі ўжо часткова рэалізуецца.
На Замчышчы ўсё яшчэ плануюць стварыць музейны комплекс з аднаўленнем абаронных збудаванняў і замкавай брамы старажытнага Менска.
Пра тое, як выглядалі сцены і брама Менскага замка, невядома нічога. Усе рэканструкцыі грунтуюцца на фрагментах ніжніх вянцоў зрубаў, якія захаваліся ў зямлі. У беларускай навуковай традыцыі, следам за савецкай, гэтыя парэшткі, як мы пісалі раней, відаць, інтэрпрэтуюць памылкова. Аднаўленне такіх аб’ектаў —гэта найчысцейшая фантазія, шкодная для навукі.
На тэрыторыі Ніжняга рынку (цяпер плошча 8 Сакавіка) плануюць аднавіць гістарычную планіроўку і забудову «па выніках комплексных навуковых даследаванняў і вынікаў конкурсу праектаў». Але раней улады аддавалі перавагу не дэталёваму і навукова абгрунтаванаму праекту рэгенерацыі для гэтай тэрыторыі ад Таварыства аховы помнікаў, а вясёламу «балаганчыку» аўтарства Сяргея Багласава.
Большасць гэтых змен аднесены на далёкую перспектыву, на перыяд пасля 2030 года. Але ёсць і некалькі цікавых рэчаў, якія мусяць быць рэалізаваны ўжо ў наступныя пяць гадоў.
Напрыклад, сумнавядомаму ГУБАЗіКу давядзецца пакінуць свой будынак па Рэвалюцыйнай вуліцы, 3, бо яго плануюць рэканструяваць пад малую сцэну тэатра імя Янкі Купалы. Для гэтага да былога дома мінскага віцэ-губернатара зробяць прыбудову з двара.
У дварах ГУБАЗіКа і архікафедральнага сабора Найсвяцейшай Дзевы Марыі хочуць разбіць выставачны сквер. Побач пашыраць майстэрню-музей скульптара Івана Міско. Яшчэ адзін музей — гісторыі развіцця харчовай прамысловасці — збіраюцца адкрыць у доме па Ракаўскай вуліцы, 30.
Цудам ацалелыя даваенныя дамкі на Шпалерным завулку, які таксама знаходзіцца ў межах гістарычнага цэнтра, пойдуць пад знос. Завулак працягнуць да вуліцы Мельнікайце і пабудуюць там офісы і жылы дом з падземным паркінгам.
Грамадскае абмеркаванне праходзіць з 9 красавіка 2025 па 24 красавіка 2025 года. Матэрыялы для азнаямлення прадстаўлены ў фае 1-га паверху будынка адміністрацыі Цэнтральнага раёна, на сайце іх няма. Заўвагі і прапановы ў пісьмовай форме з пазнакай «грамадскія абмеркаванні» будуць прымацца па 24 красавіка 2025 года ўключна па адрасе: 220004, г. Мінск, вул. Мельнікайце, 6.
«Наша Нiва» — бастыён беларушчыны
ПАДТРЫМАЦЬ
Цяпер чытаюць
«Памеры палохаюць». Як выглядае знутры новаадкрыты гандлёвы цэнтр у «Мінск-Свеце» ФОТЫ6
Каментары