Byłaja delehatka Kaardynacyjnaj rady raskazała, jak ciapier kiruje kvietkavym biznesam u Varšavie
Mieniedžarka i aktyvistka Hanna Kraŭčanka niekalki hod prapracavała ŭ niekamiercyjnych biełaruskich prajektach, ale niadaŭna vyrašyła zaniacca biznesam. U vieraśni 2024 hoda žančyna vykupiła kvietkavuju kramu ŭ Varšavie.
U padkaście «Žemčuh» Kraŭčanka raskazała, što ŭsio žyćcio zachaplałasia kvietkami — heta ŭ jaje ad maci, jakaja vyroščvała ich na pryvatnym učastku. Muž rehularna daryŭ Hańnie bukiety, ale, kali vybiraŭ ich sam, kampazicyja nie zaŭsiody joj padabałasia.
Tady na śviatkavańnie Novaha hoda jon prezientavaŭ joj padpisku ad kvietkavaj majsterni. Pradukcyja spadabałasia biełaruscy. Praź niekatory čas Kraŭčanka daviedałasia, što zasnavalniki ŭžo nie mohuć vydatkoŭvać šmat siłaŭ na raźvićcio biznesu.
«Mnie było kryŭdna, bo razumieła, što biznes moža prosta spynić dziejnaść. Finansavaja madel, jakuju vybrali ad samaha pačatku, nie pracavała tak, jak jany čakali. Ja zrazumieła, što pytańnie ŭ mieniedžmiencie i finansach, a heta jakraz maja śpiecyfika», — padzialiłasia žančyna.
U toj ža čas u inšych prajektach Hanna adčuvała niedachop prafiesijnaha raźvićcia, tamu vyrašyła vykupić maleńkuju kampaniju. Uładalniki pahadzilisia — z 2 vieraśnia 2024 hoda joj naležyć 85% biznesu.
Zaraz biełaruska naładžvaje pracesy ŭ kampanii tak, kab sprava stała «stabilnym, spakojnym biznesam». Ale ci heta atrymajecca, pradprymalnica budzie razumieć pa vynikach hoda — kvietki, jak jana kaža, siezonny dachod.
Čaściej za ŭsio pakupniki ŭ kramie — biełarusy ci ŭkraincy, jakija pierajechali ŭ Varšavu. Bukiety zakazvajuć i biznesy. Padpisku na kvietki aformili taksama žychary adnaho ź luksavych padjezdaŭ u horadzie.
U Kaardynacyjnaj radzie minułaha sklikańnia aktyvistka vystupała ad frakcyi «Moładzievy nastup».
Z 2021 hoda Kraŭčanka kiruje svaim niekamiercyjnym prajektam «RuchBot», jaki źbiraje biełaruskija hramadzianskija inicyjatyvy, da ich možna dałučycca. U 2022-2024 hadach žančyna pracavała ŭ Centry novych idej i ŭ kampanii pa vyzvaleńni palitviaźniaŭ Politzek.
Da 2020 hoda vypusknica BDEU była mieniedžarkaj u biełaruskich kampanijach Bely-grad i «Futbierh».
Kamientary
Bukiet mnie vielmi spadabaŭsia.