Rasija adpraviła na MKS lotčyka, jakoha va Ukrainie asudzili za dziaržaŭnuju zdradu
32-hadovy Alaksiej Zubrycki staŭ pieršym u historyi kasmanaŭtam z pryhavoram pa artykule ab dziaržaŭnaj zdradzie. Pryhavor zavočna vynies Vińnicki haradski sud 11 sakavika 2025 hoda.
Rasślednicki prajekt Radyjo Svaboda «Sistema» pierakazvaje klučavyja momanty z sudovaha dakumienta.
8 krasavika 2025 hoda z kasmadroma Bajkanur da Mižnarodnaj kaśmičnaj stancyi adpraviŭsia čarhovy ekipaž na borcie rakiety «Sajuz». Rasijskija ŭłady prymierkavali zapusk da 80-hodździa Pieramohi i raźmiaścili na rakiecie vyjavu pomnika «Radzima-maci». U składzie — amierykaniec Džoni Kim i dvoje hramadzian RF: Siarhiej Ryžykaŭ i Alaksiej Zubrycki.
Zubrycki — uradženiec Zaparoskaj vobłaści. Lejtenant Uzbrojenych sił Ukrainy, słužyŭ lotčykam avijacyjnaha źviana ŭ składzie adnoj z voinskich častak USU, što dysłakavałasia ŭ Krymie.
Paśla pačatku krymskaj aneksii kamandavańnie pryznačyła jaho ŭ inšuju častku na macierykovaj terytoryi Ukrainy i vyznačyła termin prybyćcia — da 12 maja 2014 hoda. Sud vyjaviŭ: «Da ŭstanoŭlenaha terminu [Zubrycki] na słužbu nie prybyŭ i pra svajo miescaznachodžańnie kamandavańniu nie paviedamiŭ, choć abjektyŭna abaviazany byŭ i moh heta zrabić».
Zhodna z rašeńniem suda, Zubrycki, «budučy hramadzianinam Ukrainy, dakładna viedajučy pra ŭsie vyšejzhadanyja abstaviny, u pieryjad z 22.03.2014 pa 13.05.2014, znachodziačysia ŭ Sievastopali, naŭmysna, z karyślivych pamknieńniaŭ, ździejśniŭ pierachod na bok voraha i hetym nanios škodu suvierenitetu, terytaryjalnaj cełasnaści i niedatykalnaści, abaranazdolnaści, dziaržaŭnaj, ekanamičnaj i infarmacyjnaj biaśpiecy Ukrainy».
Sud paličyŭ dakazanym, što abvinavačany słužyŭ u rasijskich vojskach bolš za 10 hadoŭ, uklučajučy pieryjad poŭnamaštabnaj vajny.
Sapraŭdy, pavodle bijahrafii na sajcie Centra padrychtoŭki kasmanaŭtaŭ, z 2014 pa 2018 hod Zubrycki słužyŭ u voinskich častkach u akupavanym Krymie i na poŭdni Rasii — heta 38-y, 31-y źniščalnyja avijacyjnyja pałki, 960-y šturmavy avijapołk.
U 2018-m Zubrycki pačaŭ šlach da zorak — byŭ zaličany ŭ atrad kasmanaŭtaŭ. A ŭ kancy 2024 hoda, pavodle infarmacyi na sajcie «Roskosmasu», prachodziŭ padrychtoŭku ŭžo na placoŭcy Jeŭrapiejskaha kaśmičnaha ahienctva ŭ Kiolnie.
Va Ukrainie Zubrycki zavočna pryhavorany da 15 hadoŭ pazbaŭleńnia voli z kanfiskacyjaj majomaści pa artykułach «dziaržaŭnaja zdrada» i «deziercirstva».
Ciapier čytajuć
Łukašenka: My chočam z Pakistana śpiecyjalistaŭ, a nie prosta moładź. I najpierš u Baranavičy34
Kamientary