Ukraina niehałosna rasfarmiravała Internacyjanalny lehijon — zamiežnikaŭ adpraŭlajuć u šturmaviki

Internacyjanalny lehijon terytaryjalnaj abarony Ukrainy byŭ stvorany 27 lutaha 2022 hoda — praź niekalki dzion paśla pačatku poŭnamaštabnaha rasijskaha ŭvarvańnia. Inicyjatyva prezidenta Uładzimira Zialenskaha mieła vyrazny palityčny i simvaličny sens: dać zamiežnym dobraachvotnikam aficyjny, lehalny i zrazumieły miechanizm udziełu ŭ abaronie Ukrainy.

Što ŭjaŭlaŭ saboj Internacyjanalny lehijon

Za čas isnavańnia lehijona trochhadovyja kantrakty padpisali niekalki tysiač zamiežnikaŭ, choć zapłanavanuju ŭ 2022 hodzie kolkaść u 20 tysiač čałaviek nabrać tak i nie ŭdałosia.

U składzie Uzbrojenych sił Ukrainy zamiežniki atrymlivajuć takoje ž hrašovaje zabieśpiačeńnie, jak i ŭkrainskija sałdaty, ale, u adroźnieńnie ad apošnich, jany majuć prava skasavać kantrakt praz šeść miesiacaŭ słužby.

Z 2022 hoda ŭ Internacyjanalnym lehijonie nazirałasia značnaja ratacyja zamiežnych dobraachvotnikaŭ. U pačatku rasijskaha ŭvarvańnia pieravažali amierykancy, francuzy, brytancy, italjancy, biełarusy i hruziny, tady jak siońnia najvialikšy kantynhient składajuć vychadcy z Paŭdniovaj Amieryki — u pryvatnaści, kałumbijcy.

U 2025 hodzie Internacyjanalny lehijon składaŭsia z čatyroch bataljonaŭ, u kožnym ź jakich tearetyčna naličvałasia ad 400 da 600 čałaviek. Jon udzielničaŭ u važnych bitvach, takich jak vyzvaleńnie Charkaŭskaj vobłaści (u pryvatnaści, horada Kupiansk u 2022 hodzie), letniaje kontrnastupleńnie 2023 hoda ŭ vakolicach Bachmuta, i, narešcie, abarona Vaŭčanska i Časava Jara.

31 śniežnia 2025 hoda Hienieralny štab i Ministerstva abarony Ukrainy biez šyrokaj publičnaj ahałoski pryniali rašeńnie pra faktyčny rospusk Internacyjanalnaha lehijona. Jaho bajcam prapanavali pierajści ŭ šturmavyja pałki rehularnaj armii — padraździaleńni, što niasuć najciažejšyja straty i vykonvajuć najbolš niebiaśpiečnyja zadačy.

Pra budučy pieravod lehijanieraŭ paviedamili jašče 1 listapada 2025 hoda. Druhi bataljon lehijona abskardziŭ hetaje rašeńnie i damohsia adterminoŭki da 15 lutaha 2026 hoda. Adnak jaho bajcy ŭžo pieraviedzieny ŭ skład 253‑ha šturmavoha pałka 129‑j bryhady terytaryjalnaj abarony. Častka bajcoŭ apynułasia ŭ Kryvym Rohu biez vyrazna vyznačanych zadač, navučańnia i naležnych umoŭ, što vyklikała demaralizacyju i sychod častki asabovaha składu.

Načalnik štaba 2‑ha bataljona padpałkoŭnik Andrej Śpivak nazvaŭ rasfarmavańnie lehijona stratehičnaj pamyłkaj. Pavodle jaho słoŭ, heta była adzinaja struktura va Uzbrojenych siłach Ukrainy z całkam dvuchmoŭnym aficerskim składam, ułasnaj sistemaj naboru i padrychtoŭki, a taksama z sučasnaj taktykaj, zasnavanaj na spałučeńni kala dźviuch tracin apierataraŭ dronaŭ i adnoj traciny piachoty. Pieravod takich śpiecyjalistaŭ u šturmavyja padraździaleńni, ličyć jon, aznačaje stratu ŭnikalnych kampietencyj.

Pavodle źviestak niekalkich krynic ź pieršaha i treciaha bataljonaŭ, ich šerahi značna paradzieli ŭ 2025 hodzie praź vialikija bajavyja straty i, pierš za ŭsio, praz zvalnieńni pa ŭłasnym žadańni. Kala sotni lehijanieraŭ, jakija zastalisia ŭ hetych dvuch bataljonach, ź listapada 2025 hoda dałučylisia da 475‑ha šturmavoha pałka 92‑j bryhady abo inšych padraździaleńniaŭ — u zaležnaści ad ich zdolnaściaŭ i asabistych suviaziaŭ.

Druhomu bataljonu ŭdałosia zachavać 70% asabovaha składu, čym i tłumačycca jaho niežadańnie pieravodzicca ŭ inšuju čaść. Pra los čaćviortaha bataljona, jaki funkcyjanavaŭ jak centr padrychtoŭki i rekrutynhu, vydańnie nie paviedamlaje.

Što kažuć lehijaniery?

Reakcyja samich lehijanieraŭ, ź jakimi parazmaŭlali žurnalisty vydańnia, na likvidacyju bataljona roznaja. 27‑hadovy amierykaniec «Konar», jaki naradziŭsia va Ukrainie i ŭ dziacinstvie byŭ usynoŭleny ŭ ZŠA, padkreślivaje: dla jaho hałoŭnaje — praciahvać vajavać za krainu, adnak pry ŭmovie, što jaho raźviedvalnyja navyki buduć vykarystoŭvacca metazhodna.

Inšyja ž, jak dacki dobraachvotnik «Vikinh», usprymali Internacyjanalny lehijon najpierš jak biaśpiečnaje i zrazumiełaje asiarodździe dla zamiežnikaŭ — z kamandzirami, jakija razmaŭlajuć pa-anhlijsku, i z ulikam kulturnych asablivaściej.

Karł, 53‑hadovy amierykanski bajavy miedyk, nie vyklučaje razryvu kantrakta ŭ vypadku kančatkovaha rasfarmavańnia bataljona. Jon adkryta kaža pra rasčaravańnie vyšejšym kamandavańniem. Amierykancu zastavaŭsia hod da atrymańnia ŭkrainskaha hramadzianstva paśla zakančeńnia trochhadovaha kantrakta, ale praź pieravod hety termin faktyčna anulujecca i adlik pačynajecca nanova.

• 0
• 3
• 2
• 13
• 0
• 7
• 2
• 0