Minčanka pradała čatyrochpakajovuju kvateru i sama adviezła hrošy ŭ Maskvu machlaram
Žycharka Minskaha rajona pavieryła machlaram i zastałasia biez kvatery, paviedamlaje Śledčy kamitet. A ŭ biudžet ašukancaŭ prybyli $93 000 i 800 000 rasijskich rubloŭ (heta amal $10 000).
Hetaja historyja pačałasia sa zvyčajnaha zvanka na haradski telefon, piša Onliner.by.
Mužčyna na druhim kancy drotu pradstaviŭsia supracoŭnikam «Enierhazbytu» i spytaŭ, čamu 66-hadovaja biełaruska praihnaravała list ab biaspłatnaj zamienie ličylnika. Nibyta ŭ jaje zastaŭsia apošni šaniec paśpieć, inakš pasłuha abydziecca bolš čym u 600 rubloŭ. Dla paćvierdžańnia zajaŭki nieabchodna było tolki ŭzhadnić asabistyja danyja. Žančyna nadyktavała ŭsio, što ad jaje patrabavałasia.
Razmova praciahnułasia. «Rabotnik» pačaŭ raspytvać surazmoŭcu pra toje, dzie jana pražyvaje, u jakich bankach absłuhoŭvajecca, dzie pracuje i kolki atrymlivaje. Biełarusku hetyja pytańni anijak nie naściarožyli — jana adkazała na ŭsie.
Hetaja infarmacyja spatrebiłasia machlaram, jakija pačali atakavać svaju «metu» zvankami ŭ mesendžary, pradstaŭlajučysia supracoŭnikami Śledčaha kamiteta i Nacyjanalnaha banka Biełarusi.
Złačyncy pierakonvali: raniej žančyna razmaŭlała z machlarami. «Śledčy» papiaredziŭ pra chutki vobšuk u jaje kvatery, z-za jakoha biełaruscy nieabchodna «zadekłaravać» najaŭnyja hrošy, zdać kaštoŭnaści ŭ łambard, aformić takija ž, jak u afierystaŭ, kredyty i ŭsie atrymanyja hrošy pieravieści na biaśpiečny rachunak viedamstva. Vykanaŭšy ŭsie ŭkazańni, jana abmianiała srodki na rasijskuju valutu i pieraličyła ŭ Respubliku Armienija bolš za 800 tysiač rasijskich rubloŭ.
Ale machlary na hetym nie spynilisia. Jany pierakanali achviaru pradać 4-pakajovuju kvateru, paabiacaŭšy, što paśla ździełki na žyllo nakładuć aryšt i jano vierniecca nazad da zakonnaj uładalnicy.
Žančyna źviarnułasia ŭ ahienctva, vystaviła nieruchomaść na prodaž i praź niekalki miesiacaŭ sapraŭdy znajšła pakupnika. Kali paciarpiełaja atrymała hrošy ad ździełki, «śledčy» adpraviŭ jaje ŭ Maskvu. Tam jana pavinna była pieradać atrymanyja srodki «pradstaŭniku Nacbanka».
Ale pierad hetym — zabrać jašče adzin pakiet z hrašyma ŭ nieznajomki na vakzale. U haścinicy žančyna pieraličyła najaŭnaść: jaje častka — bolš za $86 000, čužaja — kala $13 600 i amal €12 000.
Usio heta jana addała kurjeru z hruzinskim akcentam, jaki nazvaŭ kodavyja słovy «Majo zdaroŭje».
Viarnuŭšysia ŭ Biełaruś, paciarpiełaja adpraviłasia da sapraŭdnych śledčych. Napiaredadni ich padstaŭny «kaleha» raspaviadaŭ joj pra toje, što taho samaha machlara z «Enierhazbytu» zatrymali — voś-voś pačnucca śledčyja dziejańni. Sustreŭšy žančynu, realnyja supracoŭniki viedamstva patłumačyli joj, što jana stała achviaraj złačyncaŭ.
Ciapier čytajuć
Cichanoŭski na mitynhu ŭ Varšavie: Ja złamaju hety režym VIDEA4
Kamientary