Prablemy nastolki surjoznyja, što daŭnija ambicyi Kitaja pierahnać ZŠA i stać najbujniejšaj ekanomikaj śvietu mohuć adkłaścisia na dziesiacihodździ. Kali ŭvohule kali-niebudź ździejśniacca.
Era imklivaha ekanamičnaha rostu Kitaja nabližajecca da zaviaršeńnia — kanstatuje The Wall Street Journal u svaim analityčnym materyjale.
Padzieńnie rynku nieruchomaści
Nieruchomaść była adnym z klučavych drajvieraŭ rostu Kitaja, ale hety bum pryvioŭ da ahramadnych strataŭ. Siońnia kraina maje kala 80 miljonaŭ pustych ci niedabudavanych kvater, što amal udvaja pieravyšaje ahulny žyllovy fond ZŠA.
Jak padličyli ŭ Barclays, mieładrama na rynku nieruchomaści z 2021 hoda pryviała da straty $18 trłn pryvatnaha kapitału. Hetaje niečuvanaje marnatraŭstva, u spałučeńni z nastupstvami žorstkaha kantrolu padčas pandemii, častkova pryviali da taho, što kitajskija spažyŭcy niaschilny ciapier svabodna vydavać hrošy.
Hara daŭhoŭ
Ciaham amal usioj pieršaj dekady XXI stahodździa zapazyčanaść Kitaja vyhadna kantrastavała z zapazyčanaściu ZŠA i Jeŭrazony. U pieršym vypadku jana nie pieravyšała 150% ad VUP, u toj čas jak u druhim jana časta była značna vyšej za 200%.
Adnak naprykancy dekady situacyja rezka źmianiłasia: doŭh Kitaja pačaŭ niastrymna raści. U 2024 hodzie ahulnaja zapazyčanaść Kitaja — uklučajučy ŭrad, chatnija haspadarki i karparacyi — skłała amal 300% hadavoha VUP. U ZŠA i Jeŭrazonie hety pakaźnik składaje kala 250%.
Značnaja častka kitajskaha doŭhu — «schavanaja» i znachodzicca na bałansie miascovych uradavych finansavych struktur, jakija pracujuć pa-za aficyjnym ulikam. Hetyja struktury aktyŭna pazyčali na raźvićcio infrastruktury, žylla i pramysłovych prajektaŭ, što zamaskiravała sapraŭdny maštab miascovych daŭhavych abaviazacielstvaŭ.
Pramysłovaja «pieravytvorčaść» i demahrafija
Dziasiatki hadoŭ madel rostu Kitaja abapirałasia na masavyja inviestycyi ŭ pramysłovaść. Heta spačatku dazvoliła stvaryć važnuju infrastrukturu, raźvić miehapolisy i zrabić Kitaj vytvorčaj majsterniaj śvietu. Adnak praciahłyja inviestycyi ŭ zavody, asabliva ŭ pieradavyja technałohii, takija jak elektramabili i adnaŭlalnaja enierhija, pryviali da chraničnaj pieravytvorčaści.
Ceny vytvorcaŭ padajuć užo dva hady, bo zavody sprabujuć realizavać liški pradukcyi. Heta prymušaje kitajskich eksparcioraŭ zapaŭniać hłabalnyja rynki tannymi tavarami, što vyklikaje handlovyja sprečki z ZŠA, Jeŭrasajuzam i navat krainami, jakija raźvivajucca, takimi jak Brazilija i Indyja. Usie jany imknucca abaranić svaje ŭłasnyja haliny ad pramysłovaj ekspansii Kitaja.
Čarhovaja prablema — demahrafija. Pracoŭnaje nasielnictva Kitaja źmianšajecca. Hetaja demahrafičnaja źmiena stvaraje surjoznuju pieraškodu dla adnaŭleńnia vysokich tempaŭ rostu ekanomiki, jakaja raniej abapirałasia na vialiki rezierv tannaj pracoŭnaj siły.
Kitaj zastajecca viadučaj siłaj u hłabalnaj vytvorčaści i novych technałohijach. Ale kab zachavać ustojlivaść, krainie spatrebicca bolš hłybokaja restrukturyzacyja i novyja formy stymulavańnia ekanomiki. Pierśpiektyva «abahnać ZŠA» stanovicca ŭsio bolš blakłaj, a hałoŭnaja zadača na dadzieny momant — zachavać prynamsi ciapierašnija pazicyi ŭ śviecie.
Ciapier čytajuć
Muž Siamaški byŭ nie adzinym, chto atrymaŭ pašpart prykryćcia 13 lutaha 2018 hoda41
Kamientary
Kab takija prahnozy nie akazalisia wishful thinking.