Na «Hrodna-Azot» raskazali, jak supracoŭnikaŭ praviarajuć na palihrafie. Heta tolki paharšaje situacyju z deficytam kadraŭ
Ciapier na pradpryjemstvie nie chapaje bolš za 700 rabotnikaŭ.
Apošnija hady na viadučych zavodach supracoŭnikaŭ adpraŭlajuć na palihraf. Takaja praktyka jość, naprykład, na pradpryjemstvach, jakija pracujuć na abaronnuju pramysłovaść — AAT «Biełaruskaje optyka-miechaničnaje abjadnańnie», AAT «Pielenh». Ci stratehična važnych — jak «Hrodna-Azot».
Jak raskazali «Našaj Nivie» supracoŭniki «Hrodna-Azot», padobnaja praktyka paharšaje situacyju ź niedachopam kadraŭ. Ale heta nie spyniaje kiraŭnictva praciahvać zvalniać niełajalnych. Palihraf davodzicca prachodzić jak pry pracaŭładkavańni (prynamsi na adkaznyja pasady, prostych rabočych na palihraf zvyčajna nie adpraŭlajuć), tak i pry praciahu damovy.
Praz palihraf u pieršuju čarhu prachodziać supracoŭniki ź liku «niadobranadziejnych», kali paŭstaje pytańnie praciahvać kantrakt. Taksama mohuć vyklikać tych, kaho paličać padazronym praź niejkija dziejańni abo vykazvańni na pracy.
Niaredka ludziam nie praciahvajuć kantrakt mienavita paśla niaŭdałaha prachodžańnia pravierki na palihrafie.
Taki padychod pryvioŭ da taho, što na zavodzie jość abstalavańnie, jakim nie mohuć karystacca, bo niama adpaviednych śpiecyjalistaŭ, raskazaŭ adzin z supracoŭnikaŭ pradpryjemstva. Starych vyhnali, a znajści novych na ich miesca nie mohuć praz toje, što daloka nie ŭsie kandydaty prachodziać adbor mienavita pa palityčnym kryteryi.
Azotaviec kaža, što pry prachodžańni palihrafa zadajuć roznyja pytańni, kab zrazumieć, nakolki ščyra ty lubiš dziejnuju ŭładu.
Kali pa vynikach pravierki ŭźnikajuć sumnievy, to nichto nie hladzić na tvaje pracoŭnyja jakaści ci dośvied pracy. Ciapier pieršasnaje, kab čałaviek lubiŭ Łukašenku, a nie byŭ dobrym śpiecyjalistam.
Niedachop kadraŭ paćviardžaje i kolkaść adkrytych vakansij na pradpryjemstvie. Na AAT «Hrodna-Azot» razam ź filijałam «Chimvałakno» adkryta 216 vakansij na 720 pracoŭnych miescaŭ.
Deficyt kadraŭ nazirajecca nie tolki siarod rabočych śpiecyjalnaściej, ale i ŭ siarod kiraŭnictva zavoda.
Inšy surazmoŭca, jaki pracuje ŭ adnym z daččynych pradpryjemstvaŭ «Hrodna-Azota», kaža, što palihraf mohuć prymianiać u tym liku dziela praduchileńnia ŭciečki infarmacyi pra abychod sankcyj pradpryjemstvam. Pa jaho słovach, niahledziačy na składanaści i vykryćcio niekatorych schiem, zavodu dahetul udajecca pastaŭlać pradukcyju ŭ Jeŭropu.
Raniej BRC pisaŭ, što «Hrodna Azot» abychodzić sankcyi i pastaŭlaje svaju pradukcyju ŭ ES, vydajučy svoj karbamid za ŭźbiekski i vykarystoŭvajučy firmy-prakładki.
Zhodna z dakumientami, apublikavanymi «Radyjo Svaboda» ŭ 2024 hodzie, «Hrodna-Azot» pastaŭlaŭ svaju pradukcyju i va Ukrainu. Pradukcyja z Hrodna traplała tudy pad vyhladam vyrablenaj u Turkmienistanie praz Rasiju i Bałharyju z dapamohaj kampanii, zarehistravanaj hramadzianinam Turcyi ŭ AAE.
«Naša Niva» — bastyjon biełaruščyny
PADTRYMAĆ
Kamientary