Byłoha kamandujučaha rasijskimi vojskami va Ukrainie Suravikina sasłali ŭ Ałžyr

Na fotazdymkach, zroblenych na ałžyrskich vajskovych mohiłkach Deli Ibrahim, Suravikin źniaty na čale kałony supracoŭnikaŭ dyppradstaŭnictva. Jon kročyć pobač z vajskovym ataše Rasii Uładzimiram Cukanavym da mahiły savieckaha sałdata Astapčanki.

U podpisie da publikacyi hienierał paznačany jak «kiraŭnik hrupy rasijskich vajskovych śpiecyjalistaŭ u Ałžyry», pry hetym jahonaje imia nie zhadvajecca.

Suravikin uznačaliŭ rasijskuju hrupoŭku va Ukrainie ŭ kastryčniku 2022 hoda — nieŭzabavie paśla sieryi bujnych paražeńniaŭ, u vyniku jakich armija Rasii ŭciakła z Charkaŭskaj vobłaści. Paśla pryznačeńnia jon inicyjavaŭ masiravanyja ŭdary pa ŭkrainskaj enierhietyčnaj infrastruktury, u vyniku jakich surjozna paciarpieli praktyčna ŭsie niajadziernyja elektrastancyi krainy. U listapadzie taho ž hoda Surovikin aficyjna abviaściŭ ab adstupleńni rasijskich vojskaŭ z Chiersona — adzinaha abłasnoha centra, zachoplenaha rasijskaj armijaj za ŭvieś čas poŭnamaštabnaha ŭvarvańnia.

U studzieni 2023-ha Suravikina na pasadzie kamandujučaha hrupoŭkaj US RF va Ukrainie zamianiŭ načalnik Hienštaba Valeryj Hierasimaŭ. A paśla buntu, arhanizavanaha Jaŭhienam Pryhožynym u červieni 2023 hoda, hienierał uvohule źnik z publičnaj prastory. Rasijskaje Minabarony aficyjna nie abviaščała pra adstaŭku Suravikina, adnak užo ŭ vieraśni jahonaje imia było vydalenaje z sajta viedamstva.

Pavodle źviestak The New York Times, jakaja spasyłajecca na amierykanskich čynoŭnikaŭ, znajomych z raźvieddanymi, Suravikin zahadzia viedaŭ pra płany Pryhožyna.

Nieŭzabavie paśla buntu The Moscow Times, sa spasyłkaj na krynicy, blizkija da Minabarony, paviedamiła pra aryšt hienierała. Kreml admoviŭsia tady davać aficyjnyja kamientary. Paźniej ahienctva Bloomberg pisała, što Suravikin byŭ dapytany vajskovaj prakuraturaj.

U vieraśni 2023 hoda The New York Times, spasyłajučysia na dvuch amierykanskich čynoŭnikaŭ i krynicu ŭ Minabarony Rasii, paviedamlała, što hienierał byŭ vyzvaleny nieŭzabavie paśla hibieli Pryhožyna. Užo ŭ tym ža miesiacy «Kommiersant'» sa spasyłkaj na krynicu ŭ asiarodździ Suravikina paviedamiŭ, što hienierał znachodzicca ŭ Ałžyry ŭ składzie delehacyi Minabarony i, vierahodna, budzie pryznačany na pasadu, źviazanuju z «uschodnim napramkam».

U lutym 2025 hoda člen kamiteta Dziarždumy pa abaronie Viktar Sobaleŭ paćvierdziŭ: Suravikin znachodzicca ŭ Afrycy i vykonvaje funkcyi vajskovaha daradcy.

• 0
• 1
• 2
• 0
• 0
• 0
• 0
• 0