Brytaniec, jaki adsiadzieŭ 38 hadoŭ u turmie za zabojstva, vyjšaŭ na volu: jon akazaŭsia nievinavatym
Prysud byŭ admienieny apielacyjnym sudom paśla taho, jak u staroj spravie źjavilisia novyja dokazy.
Brytaniec Piter Salivan, jaki amal 40 hadoŭ pravioŭ u turmie pa abvinavačańni ŭ zabojstvie aficyjantki, vychodzić na volu. Prysud byŭ admienieny apielacyjnym sudom paśla taho, jak u staroj spravie źjavilisia novyja dokazy, piša Bi-bi-si.
21-hadovaja Dajan Sindał była zhvałtavanaja i zabitaja ŭ 1986 hodzie pa darozie z pracy dadomu ŭ horadzie Bierkienched na zachadzie Anhlii.
Na apielacyju sprava letaś była viernutaja śpiecyjalnaj kamisijaj pa rasśledavańni mahčymych sudovych pamyłak CCRC — paśla taho jak u ŭzorach śpiermy, zachavanych ź miesca złačynstva, byli vyjaŭlenyja raniej niezaŭvažanyja frahmienty DNK, što ŭkazvajuć na nieviadomaha złačyncu.
Kali navinu pra admienu prysudu paviedamili samomu Salivanu, jaki prysutničaŭ na pasiedžańni pa videasuviazi z turmy, jon tolki raspłakaŭsia i zakryŭ rot rukoj.
Na dadzieny momant heta, pa ŭsioj bačnaści, samaja praciahłaja sudovaja pamyłka ŭ historyi brytanskaha prava, ździejśnienaja ŭ dačynieńni da žyvoha źniavolenaha.
U zajavie samoha Salivana, začytanaj jaho advakatam, toj zapeŭnivaje, što na svaich sudździaŭ «nie złujecca i nie kryŭduje».
«Sa mnoj abyšlisia nadzvyčaj niespraviadliva, — havorycca ŭ tekście zajavy, — ale heta nijak nie pamianšaje taho ahidnaha, žachlivaha zabojstva, jakoje adbyłosia».
«Praŭda doryć svabodu», — śćviardžaje nievinavata asudžany.
Vystupajučy pa zaviaršeńni słuchańniaŭ, siastra Salivana Kim Śmit zajaviła, što «ŭ dadzienym vypadku prajhrali ŭsie» i vykazała siamji zahinułaj aficyjantki svaje ščyryja spačuvańni.
«Jany zastalisia biez dački — i jaje ŭžo nie viarnuć, — patłumačyła Śmit. — A voś my Pitera viarnuli, tamu ciapier pavinny pasprabavać litaralna zbudavać jaho žyćcio z nula», — skazała jana.
«Vielmi škada, što padobnaje naohuł adbyłosia»
Jak u adzin hołas zajavili i śledčyja, i prakurory, na momant zabojstva nieabchodnych technałohij dla analizu i paraŭnańnia ŭzorkaŭ śpiermy prosta nie isnavała.
Pradstaŭnik boku abvinavačvańnia Dankan Atkinsan pryznaŭ, što znojdzieny dokaz padryvaje asnovy vyniesienaha Salivanu abvinavaŭčaha prysudu, tamu pry paŭtornym razhladzie spravy prakuratura na im nastojvać nie budzie.
Troje sudździaŭ Karaleŭskaha suda pravasudździa Łondana admianili prysud i zajavili, što ŭ ich «niama sumnieńniaŭ u tym, što ŭ intaresach pravasudździa novyja hienietyčnyja dokazy pryznać nieabchodna i metazhodna». Adzin z sudździaŭ, łord Chołrojd, udakładniŭ, što charaktar paškodžańniaŭ na ciele achviary «vidavočna ŭkazvaje na seksualny aśpiekt napadu», i ŭ takim vypadku nieabchodna pryznać, što z vysokaj dolaj vierahodnaści znojdzieny bijałahičny materyjał byŭ pakinuty sapraŭdnym zabojcam.
«Niama nijakich padstaŭ mierkavać, što da zabojstva byŭ datyčny bolš jak adzin čałaviek, — adznačyŭ jon, — hetaksama jak i niama nijakich śviedčańniaŭ taho, što śpierma mahła być pakinuta ŭ vyniku seksualnaha kantaktu, jaki adbyŭsia pa ŭzajemnaj zhodzie».
Paviedamlajecca, što Piter Salivan užo byŭ vyzvaleny na volu — amal adrazu paśla zaviaršeńnia pasiadžeńnia.
U źniavoleńni jon pravioŭ 38 hadoŭ i amal vosiem miesiacaŭ — abo, u ahulnaj składanaści, 14 113 dzion.
Ciapier čytajuć
Vybityja dźviery, maski-šou, zatrymańnie top-mieniedžaraŭ. Pačaŭsia pahrom «Jeŭraopta»15
Kamientary