«Pryjazdžaju — voziera niama». U Łahojskim rajonie za dva dni źnik vadajom
U redakcyju Onlíner źviarnuŭsia žychar Łahojskaha rajona Dźmitryj. Jak śćviardžaje mužčyna, litaralna za dva dni ŭ lesie źnik vadajom. Jašče ŭ niadzielu jon pryjazdžaŭ u hetuju miascovaść u hryby — voziera było na miescy, a ŭžo da aŭtorka vada praktyčna całkam syšła.
Sam Dźmitryj žyvie niepadalok hod.
— Heta pieršaje voziera ŭ tutejšych miaścinach, jakoje ja ŭbačyŭ, i mianie ŭrazili pryroda i jaje niekranutaść. Voziera vielmi malaŭničaje, tut žyvuć babry, vodzicca stronha. Rybu tut, praŭda, łoviać pieravažna zimoj. Uletku rabić heta ź bieraha składana — chiba što z łodki.
Pavodle słoŭ surazmoŭcy, vadajom štučny. U narodzie jaho nazyvajuć Dalva, bo jon znachodzicca prykładna za 200 mietraŭ ad adnajmiennaha miemaryjalnaha kompleksu. Hidratechničnaje zbudavańnie pablizu i sama damba daŭno zakinutyja.
— Mahčyma, u byłyja časy jaho niejak vykarystoŭvali, a ciapier heta prosta miesca dla miedytacyj. Moža, ciapier tudy trapili halinki, liście, i skid vady byŭ uskładnieny, voziera pierapoŭniłasia i razmyła dambu. Bo pryčyn dla ŭzdymu vady nie było: hetyja dni byli biez apadkaŭ.
Ja dumaŭ uziać jaho ŭ arendu, ale heta lasnyja ŭhodździ, tamu ŭziaŭ inšaje voziera z padobnaj kanstrukcyjaj, dzie taksama časta praryvała dambu. Ciapier jak haspadar saču za jaje cełasnaściu, štodnia čyšču vadaskid, jaki taksama znachodzicca ŭ avaryjnym stanie. Zbudavaŭ jašče i druhi avaryjny vadaskid — u žniŭni mienavita jon vyratavaŭ maju dambu. Za noč uzrovień vady praz apadki padniaŭsia na 30 santymietraŭ, ale ŭsio acaleła.
Dźmitryj užo źviarnuŭsia z pytańniem nakont situacyi ŭ Łahojskuju rajonnuju inśpiekcyju Minpryrody.
U Łahojskaj rajonnaj inśpiekcyi Ministerstva pryrodnych resursaŭ i achovy navakolnaha asiarodździa raskazali «Minskaj praŭdzie», što ŭčora ŭ Viber im pryjšło paviedamleńnie z kaardynatami zhadanaha voziera. U inśpiekcyi paviedamili, što ŭ nastupnyja dni abśledujuć vadajom i vyśvietlać pryčynu skidu vady.
Kamientary