Polskaja avijakampanija LOT patłumačyła zalot svajho samalota ŭ Biełaruś
Zvyčajna jeŭrapiejskija sudny ahinajuć Biełaruś.
Pasažyrski samalot LOT, jaki lacieŭ ź Vilni ŭ Varšavu, 1 vieraśnia nienadoŭha ŭvajšoŭ u pavietranuju prastoru Biełarusi praz umovy nadvorja. Pra heta MOST paviedamili ŭ polskaj avijakampanii.
«Padčas rejsa LO772 ź Vilni ŭ Varšavu, jaki vykonvaŭsia 1 vieraśnia, pa maršrucie palotu — ad Siejnaŭ, kala polska-litoŭskaj miažy, až da Astruva-Mazavieckaha — farmiravaŭsia mocny navalničny front. Dziela zabieśpiačeńnia biaśpieki palotu kamandzir pavietranaha sudna pa ŭzhadnieńni z dyśpietčarskaj słužbaj kiravańnia pavietranym rucham u Vilniusie paprasiŭ skarektavać kurs i atrymaŭ na heta dazvoł. Zatym samalot pierajšoŭ pad kiravańnie polskaj rajonnaj dyśpietčarskaj słužby», — adkazali ŭ avijakampanii LOT na zapyt MOST.
Tam dadali, što LOT nie vykonvaje rejsy z vykarystańniem pavietranaj prastory Biełarusi, a 1 vieraśnia samalot apynuŭsia tam tolki na niekalki dziasiatkaŭ siekund u vyniku karekciroŭki kursa, źviazanaj z umovami nadvorja.
«Heta byŭ adzinkavy incydent, pradyktavany mierkavańniami biaśpieki i jaki adbyŭsia pa ŭzhadnieńni z dyśpietčarskaj słužbaj kiravańnia pavietranym rucham», — patłumačyli ŭ avijakampanii.
Rejs LO772 Vilnia — Varšava 1 vieraśnia pierasiek miažu Biełarusi, pralacieŭšy nad Hrodzienskaj vobłaściu.
U mai 2021 hoda Jeŭrapiejskaje ahienctva avijacyjnaj biaśpieki (EASA) rekamiendavała avijakampanijam z krain ES paźbiahać palotaŭ praź Biełaruś. Takoje rašeńnie było pryniata paśla prymusovaj pasadki ŭ Minsku samalota Ryanair z Ramanam Pratasievičam na borcie. Adnak praviły dapuskajuć taki pralot, kali vykarystańnie biełaruskaj pavietranaj prastory nieabchodnaje «dla zabieśpiačeńnia biaśpiečnaj ekspłuatacyi pavietranaha sudna pry niepradbačanych abstavinach».
Kamientary