Azaronak napisaŭ pra palitemihranta — paśla hetaha brata i baćku taho kinuli za kraty
Hamialčuk Mikałaj Stahurski paśla adjezdu za miažu raskazaŭ, što jaho sprabavali vierbavać śpiecsłužby. Paśla hetaha pra jaho napisaŭ Azaronak, a pa jaho małodšaha brata Źmitra i baćku pryjšli siłaviki. Źmicier raskazaŭ pra tyja padziei.
«Bajsoł» źbiraje hrošy, kab dapamahčy Źmitru Stahurskamu ŭładkavacca za miažoj — paŭdzielničać možna tut.
«Ci ty chočaš zładzić niejki terakt?»
Hamialčuk Mikałaj Stahurski ŭ 2022 hodzie pracavaŭ u restaranie chutkaha charčavańnia, kali jaho zatrymali pa palityčnaj administracyjnaj spravie i pasprabavali zavierbavać. Pa zadańni śpiecsłužbaŭ jon źviazaŭsia z «Bajsołam» i paprasiŭ dapamohu, a potym źniaŭsia ŭ repartažy dla dziaržTB z raskazam, što byccam by nie atrymaŭ ad «Bajsoła» nijakaj dapamohi.
U vyniku Stahurski vyrašyŭ pierapynić kantakty z orhanami i źjechaŭ ź Biełarusi.
Na toj čas Źmicier, małodšy brat Mikałaja, tolki skančvaŭ škołu. Paźniej jon pastupiŭ u Rečycki ahrarny kaledž, vučyŭsia na zaatechnika, i paśpieŭ dabracca da pieraddypłomnaj praktyki — pa stanie na luty 2025-ha Źmicier jakraz jaje prachodziŭ.
Źmitru na toj čas było 19 hadoŭ, jon žyŭ u Homieli. Adnojčy rankam, kali chłopiec źbiraŭsia iści na praktyku, da jaho pačali łamacca ŭ dźviery:
«Padychodžu da dźviarej, baču — tam dvoje mužčyn u cyvilnym adzieńni. Dźviery byli adčynienyja, i jany ŭvajšli spakojna. Adrazu ž adabrali telefon i pačali sovać mnie papierki, što jany ź milicyi. Mnie pazvaniła mama, dyk jany prosta vyklučyli moj telefon.
Potym jany prajšli ŭ pakoj dla vobšuku. Prasiŭ u ich order — spačatku praihnoryli, potym paabiacali dać order paźniej, ale ŭ vyniku tak i nie dali».
Źmitra advieźli ŭ adździaleńnie milicyi, dzie pačali raspytvać nakont brata:
«Pytalisia: davaj kažy, my viedajem, što ty ź im kamunikuješ. «Mahčyma, jon ciabie tuzaje za niejkija nitački? Ci ty chočaš zładzić niejki terakt?» Adkazvaŭ, što ja ciapier vučusia i ŭ mianie ničoha takoha niama ŭ płanach».
Tady Źmitru pačali pahražać, što padkinuć narkotyki, jon pačuŭ razmovu siłavikoŭ pra toje, jaki dla jaho možna prydumać kryminalny artykuł. Skončyłasia tym, što ŭ telefonie chłopca znajšli padpisku na pablik «Homiel anłajn» i prysudzili 15 sutak aryštu za padpisku na «ekstremiscki» kanał.
Jašče da suda, u «małpoŭniku», Źmicier sustreŭ svajho baćku. Stahurskaha-starejšaha zatrymali praz hadzinu paśla jaho, jamu taksama vypisali 15 sutak. Samoha Źmitra ŭ izalatary mocna ŭdaryli pa nazie — maŭlaŭ, «niapravilna stajaŭ». Chłopiec atrymaŭ razryŭ mieniska i dahetul adčuvaje bol.
Na Stahurskich źviarnuli ŭvahu paśla pahrozaŭ ad Ryhora Azaronka. 25 studzienia 2025-ha prapahandyst apublikavaŭ u svaim telehram-kanale post supołki «Ich ždiet sud», aŭtary jakoha byccam by bačyli ŭ dziejańniach Mikałaja Stahurskaha čatyry kryminalnyja artykuły.
«Dačakaŭsia, pakul vypuściać baćku — jon vyjšaŭ sivy»
Svaje 15 sutak Źmicier pravioŭ ź inšymi «ekstremistami» — dyrektaram taksaparka, prahramistam i kiraŭnikom adździeła ŭ adnoj z homielskich arhanizacyj. Kaža, što stavilisia da ich, «jak da bydła» — maciukalisia, nazyvali vyradkami.
Spaŭ chłopiec na padłozie, dvojčy chadziŭ na dopyty. Na apošnim pačali pahražać, što paviazuć u les, złamajuć nahu ci niešta padkinuć.
Kali Źmicier vyjšaŭ ź izalatara, jaho sustreła maci:
«Jana mnie potym apisała, što ja byŭ bledny, hladzieŭ u adnu kropku i bajaŭsia joj niešta skazać. Dačakaŭsia, pakul vypuściać baćku — jon vyjšaŭ sivy i taksama bajaŭsia niešta skazać».
Praz tydzień Źmitru pazvanili i skazali, što jon moža pryjści pa svoj noŭtbuk, jaki ŭ jaho zabrali padčas vobšuku. I z taho času pačalisia pahrozy:
«Kazali: my možam ciabie niedzie zakryć, kali ty kamuści raskažaš [pra aryšt]. Taksama i baćku pahražali, što pasadziać mianie, kali jon kamuści raskaža. I tamu, praz hetyja pahrozy, mnie daviałosia źjechać».
Baćka Źmitra taksama pakinuŭ Biełaruś. Mužčyna maje izrailskaje hramadzianstva ŭ dadatak da biełaruskaha, ale pierad aryštam u jaho zabrali abodva pašparty — daviałosia rabić novy dakumient.
Sam Źmicier ciapier asvojvajecca ŭ Jeŭropie i padumvaje znoŭ pajści vučycca.
«Naša Niva» — bastyjon biełaruščyny
PADTRYMAĆ
Kamientary