Z-błohiera, jaki niečakana zaklikaŭ addać Pucina pad sud, adpravili ŭ psichbalnicu
Rasijskaha praŭładnaha błohiera i aŭtara danosaŭ Ilju Ramiasło, jaki raptoŭna rasčaravaŭsia ŭ dziejnaj uładzie Rasii i vystupiŭ suprać Uładzimira Pucina, adpravili ŭ psichijatryčnuju kliniku.
U Sankt-Pieciarburhu praŭładny błohier i juryst Ilja Ramiasło, jaki raniej prasłaviŭsia šmathadovaj baraćboj z Alaksiejem Navalnym i kryminalnymi spravami suprać FBK, byŭ špitalizavany ŭ psichijatryčnuju balnicu №3. Hetuju infarmacyju, jakuju spačatku raspaŭsiudzili Z-kanały, a potym «Fantancy» paćvierdzili niepasredna ŭ daviedačnaj słužbie miedycynskaj ustanovy.
Kanały pišuć, što z ranicy 19 sakavika Ramiasło, jaki napiaredadni daŭ sieryju intervju z antypucinskimi vykazvańniami, pierastaŭ adkazvać na telefonnyja zvanki i niekalki hadzin nie źjaŭlaŭsia ŭ sacsietkach.
Rezki pavarot u losie błohiera adbyŭsia paśla taho, jak 17 sakavika jon apublikavaŭ manifiest «Piać pryčyn, pa jakich ja pierastaŭ padtrymlivać Uładzimira Pucina».
U svaim tekście Ramiasło nazvaŭ vajnu z Ukrainaj tupikovaj, zajaviŭ pra razbureńnie rasijskaj ekanomiki, udušeńnie svabody słova i praźmierna doŭhaje znachodžańnie prezidenta pry ŭładzie.
Niahledziačy na čutki pra ŭzłom akaŭnta, na nastupny dzień błohier asabista paćvierdziŭ svajo aŭtarstva i daŭ sieryju intervju. Adnak užo z ranicy 19 sakavika jon pierastaŭ vychodzić na suviaź, paśla čaho stała viadoma pra jaho znachodžańnie ŭ psichijatryčnaj klinicy.
Kamientary
"Z-błohier niečakana nazvaŭ Pucina nielehitymnym i zaklikaŭ addać jaho pad sud" .
-NN
jon pad FSB pracuje, FSB:šniki heta zrabili. Tak, Novy 1917 na šlachu !