Błohier Eduard Palčys znachodziŭsia za kratami ź vieraśnia 2020 hoda. Sud, jaki adbyŭsia ŭ kancy 2021 hoda, prysudziŭ jamu 13 hadoŭ kałonii. Kali Eduard byŭ u źniavoleńni, u jaho naradziłasia dačka.
Palityčny błohier i aktyvist Eduard Palčys byŭ zatrymany 27 vieraśnia 2020 hoda, tady jamu prysudzili 30 sutak administracyjnaha aryštu. Adnak na volu paśla sutak jon nie vyjšaŭ. Błohiera pieraviali ŭ SIZA, vystavili abvinavačvańnie ŭ «arhanizacyi masavych biesparadkaŭ» pa č. 1 art. 293 KK.
Potym dadali jašče try kryminalnyja artykuły: art. 130 (raspavalvańnie varožaści), art. 342 (arhanizacyja dziejańniaŭ, jakija hruba parušajuć hramadski paradak), art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś).
Śledčy kamitet zajaŭlaŭ, što asnoŭnaj zbrojaj Palčysa źjaŭlalisia stvoranyja i kiravanyja im internet-resursy, u tym liku telehram-kanał i staronki ŭ sacyjalnych sietkach, jakija «zachapili bolšuju častku aŭdytoryi krainy, ich davier i vykarystoŭvalisia dla kiravańnia śviadomaściu natoŭpu, skłanieńnia da zapłanavanych złačynnych dziejańniaŭ».
Sud, jaki adbyŭsia ŭ śniežni 2021 hoda ŭ zakrytym režymie, prysudziŭ błohieru 13 hadoŭ kałonii. Śviedkam pa spravie Palčysa prachodziŭ Raman Pratasievič.
Akramia hetaha, pa pazovie prakuratury horada Minska z Eduarda Palčysa sudom było pastanoŭlena spahnać zvyš 575 tysiač rubloŭ škody, naniesienaj dziaržaŭnym pradpryjemstvam.
U žniŭni 2022 hoda błohieru zrabili bolš žorstkim pakarańnie i adpravili na try hady z kałonii ŭ mahiloŭskuju turmu №4. Paśla adbyćcia terminu adpravili nazad u kałoniju.
Na voli jaho čakali žonka i dačka Emilija, jakaja naradziłasia ŭžo paśla taho, jak baćka trapiŭ za kraty.
Eduard Palčys naradziŭsia ŭ Lidzie 28 kastryčnika 1990 hoda. U škole staŭ łaŭreatam śpiecyjalnaha fondu prezidenta Biełarusi pa sacyjalnaj padtrymcy adoranych dziaciej. Paśla zakančeńnia škoły pastupiŭ na histfak BDU. Pierad samym dypłomam chłopiec vyrašyŭ kinuć vučobu, kab nie adpracoŭvać raźmierkavańnie.
U 2014 hodzie pracavaŭ markietołaham pa sacyjalnych sietkach u adnoj ź minskich kampanij, a taksama padzarablaŭ repietytaram pa historyi.
Eduard atrymaŭ viadomaść jak zasnavalnik sajta 1863x.com, jaki jon sam nazyvaŭ «adkazam tym rasijskim prapahandystam, jakija ŭ 2014‑m pačali infarmacyjna atakavać Biełaruś». Spačatku jon vioŭ jaho ananimna, padpisvaŭsia nikam «Džon Silvier».
5 maja 2015 hoda Palčys byŭ zatrymany supracoŭnikami KDB i abvinavačany pa častcy pieršaj artykuła 130 Kryminalnaha kodeksa Biełarusi (raspalvańnie rasavaj, nacyjanalnaj abo relihijnaj varožaści abo roźni).
Paśla dopytu i dvuchdzionnaha znachodžańnia ŭ IČU Minska błohiera nakiravali na sudova-psichijatryčnuju ekśpiertyzu ŭ RNPC psichičnaha zdaroŭja ŭ Navinkach, paśla jakoj adpuścili pad padpisku ab niavyjeździe. Praź niejki čas błohieru pradjavili jašče adno abvinavačvańnie pa častcy 2 artykuła 343 Kryminalnaha kodeksa Biełarusi (raspaŭsiudžvańnie parnahrafičnych materyjałaŭ).
Uvosień Palčys vyjechaŭ va Ukrainu, ale zatym vyrašyŭ viarnucca ŭ Biełaruś. U pačatku 2016 hoda jon byŭ zatrymany pry pierasiačeńni ŭkrainska-rasijskaj miažy. Tolki ŭ mai Palčysa ekstradziravali ŭ Biełaruś. U kastryčniku 2016 hoda błohier byŭ asudžany na 1 hod i 9 miesiacaŭ «chimii» i vyzvaleny ŭ sudovaj zali.
U 2019 hodzie Palčys skancentravaŭsia na telehram-kanale PALCHYS.
Paśla vychadu na volu Palčys praciahnuŭ zajmacca sajtam, pryčym zrabiŭ heta svaim asnoŭnym zaniatkam. Na praciah pracy prasiŭ hrošaj u ludziej, tyja pieraličvali. Vychodziła niedzie 500 dalaraŭ na miesiac. Kazaŭ, što za takija hrošy kvateru i mašynu nie kupiš, ale žyć možna.
U 2018 hodzie błohier staŭ adnym z arhanizataraŭ śviatkavańnia 100‑hodździa BNR.
U 2020 hodzie, paśla taho jak 15 červienia Palčysu prysudzili 15 sutak za ŭdzieł u nibyta niezakonnaj akcyi Cichanoŭskaha na Kamaroŭcy, jon pačaŭ chavacca ad uładaŭ. U kancy vieraśnia błohier vyrašyŭ źjechać z krainy, ale 27 vieraśnia nie pryjšoŭ u damoŭleny čas da kiroŭcy, jaki mieŭsia dastavić jaho da miažy. Praź niekalki dzion blizkija jaho adšukali na Akreścina.
Palčys na svaim prykładzie pakazaŭ, što biełaruski nacyjanalizm moža być papularnym. Błohier zaachvočvaŭ tysiačy ludziej spaznavać historyju Biełarusi, pieraasensoŭvać našu spadčynu i sučasnaść.
Kamientary