Ci vyhadna mieć elektramabil u Biełarusi? Raspytali ŭłaśnikaŭ

Volvo xc40

Ułaśnik šviedskaha elektramabila Volvo xc40 žyvie ŭ pryvatnym domie, tamu zaradžaje jaho ad chatniaj razietki pa 0,2969 rubla za kVt·hadzinu.

Pavodle słoŭ aŭtamabilista, kali na vulicy bolš za 15 hradusaŭ, 100 kiłamietraŭ prabiehu ŭ źmiašanym režymie abychodziacca jamu ŭ 7 rubloŭ 30 kapiejek. Zimoj u zaležnaści ad tempieratury cana 100 km prabiehu składaje ŭžo kala 10 rubloŭ.

Kali zaradžać parkietnik na hramadskich zaradnych stancyjach, košt 100 kiłamietraŭ prabiehu vyrastaje ŭ dva razy: da 15 rubloŭ pry zaradcy na chutkaj stancyi (pa 0,61 rubla za kVt·h) abo da 11,3 rubla, kali karystacca pavolnymi stancyjami padzaradki z taryfam 0,46 rubla za kVt·h.

U chałodny pieryjad, adpaviedna, heta budzie ŭžo ad 15 da 20 rubloŭ za 100 km prabiehu.

Adnak ułaśnik elektramabila śćviardžaje, što elektrakar — heta nie pra ekanomiju, a pra novyja ŭražańni i technałohii.

Pakupkaj elektramabila jon zadavoleny, choć u siamji jość jašče adno aŭto — bienzinavaje, jakoje vykarystoŭvajecca dla dalnich pajezdak.

Pavialičyć

BMW i3

Ułaśnica elektryčnaj BMW i3 kaža, što jaje mašyna spažyvaje ad 15 da 25 kVt·h na 100 kiłamietraŭ — u zaležnaści ad tempieratury i stylu jazdy.

Dziaŭčyna zaradžaje aŭtamabil na hramadskich zaradnych stancyjach, bo žyvie ŭ kvatery. Pa mahčymaści vybiraje chutkija zaradki (pa 0,61 rubla za kVt·h), tamu 100 kiłamietraŭ prabiehu joj abychodziacca ŭ 9—15 rubloŭ.

Cučasnyja dyzielnyja aŭto padobnaha pamieru źjadajuć pa 4-5 litraŭ dyzielu na 100 km pa trasie (10-13 rubloŭ) i 6-7 litraŭ pa horadzie (15-18 rubloŭ). 

Voyah Free

Jašče adzin surazmoŭca jeździć na Voyah Free. U adroźnieńnie ad vyšejzhadanych elektramabilaŭ Voyah maje ŭ dadatak 1,5-litrovy bienzinavy ruchavik i źjaŭlajecca paśladoŭnym hibrydam, bo koły pryvodziacca ŭ ruch vyklučna elektraruchavikom.

Bienzinavy ruchavik tut vykonvaje rolu hienieratara, jaki zaradžaje batareju.

Pavodle słoŭ ułaśnika, vyklučna na batarei mašyna moža prajechać kala 140 kiłamietraŭ u ciopły pieryjad i kala 100 kiłamietraŭ zimoj.

Pavialičyć

Pa padlikach mužčyny, u siarednim jaho aŭto spažyvaje kala 28 kVt·h na 100 kiłamietraŭ. Pakolki jon žyvie ŭ kvatery, to zaradžajecca na hramadskich zaradnych stancyjach. Na chutkaj zaradcy atrymlivajecca kala 17 rubloŭ za 100 km, na pavolnaj — 13 rubloŭ za sotniu.

Aŭtamabilist pryznajecca, što nie zaŭsiody znachodzić čas na zaradku, tamu časta jeździć pa horadzie vyklučna dziakujučy bienzinavamu ruchaviku-hienierataru.

Pakolki zapas chodu ŭ Voyah Free biez padzaradki nievialiki, na vialikich adlehłaściach amal uvieś čas pracuje bienzinavy ruchavik. U vyniku siaredni raschod paliva pa trasie składaje 9 litraŭ na 100 kiłamietraŭ, a heta ŭžo 23,4 rubla za sotniu. 

Vynikaje, što ekanomija na palivie ŭ vypadku z elektramabilami ci paśladoŭnymi hibrydami nie takaja ŭžo vialikaja, kali davodzicca zaradžać mašynu na hramadskich zaradkach, a nie ad chatniaj razietki.

Dla paraŭnańnia, dyzielnaja Volvo xc 90 z 2-litrovym ruchavikom spažyvaje pa trasie ŭ rajonie 7-7,5 litra dyzielu, što ŭ vyniku vylivajecca ŭ 18-20 rubloŭ na 100 km prabiehu.

Aŭto na mietanie bolš ekanamičnyja?

A kali paraŭnoŭvać z mašynami, što pracujuć na mietanie, to ekanomija na palivie ŭ elektramabilaŭ amal źnikaje.

Naprykład, 100 kiłamietraŭ u źmiašanym režymie na mikralitražcy VW Up ź litrovym ruchavikom, jakaja pa zavodskich charaktarystykach pracuje nie tolki na bienzinie, ale i na mietanie, abychodziacca ŭ 5—5,5 rubla.

A 100 kiłamietraŭ na Seat Leon z ruchavikom 1,4 litra kaštujuć 5 rubloŭ pry jaździe pa trasie i 6,5—7 rubloŭ u haradskich umovach.

Takim čynam, mietanavyja aŭtamabili z punktu hledžańnia raschodaŭ na paliva vyhladajuć bolš vyhadna, čym elektramabili. Pry hetym jany jašče i davoli ekałahičnyja.

Pavialičyć

Badaj adziny minus aŭto na mietanie — kolkaść zapravačnych stancyj. Pa ŭsioj krainie ich usiaho 27: čatyry znachodziacca ŭ Minsku, pa dźvie — u kožnym abłasnym centry, akramia Viciebska, dzie mietanavaja zapraŭka tolki adna. Tamu tym, chto žyvie ŭ takich haradach, jak Połack ci Navapołack, pra ekanomiju na palivie zastajecca tolki maryć.

• 4
• 0
• 8
• 2
• 0
• 1
• 0
• 0