Suprać byłoha kapitana zbornaj Ukrainy pa futbole raspačali spravu ab sadziejničańni Rasii
Prakuratura va Ukrainie paviedamiła pra zaviadzieńnie kryminalnaj spravy ŭ dačynieńni da byłoha kapitana zbornaj Ukrainy pa futbole Anatola Cimaščuka. Były paŭabaronca «Šachciora», «Zienita» i «Bavaryi» padazrajecca ŭ sadziejničańni dziaržavie-ahresaru, havorycca na sajcie ofisa Hienieralnaha prakurora.
Jak śćviardžajecca ŭ paviedamleńni prakuratury, Cimaščuk jak asistent hałoŭnaha treniera «Zienita» ŭ vieraśni 2024 hoda ŭdzielničaŭ u tavaryskim matčy, udzielniki jakoha dapamahali źbirać hrošy na padtrymku vajskovych padraździaleńniaŭ.
Pa vynikach matča majki hulcoŭ pradavalisia na aŭkcyjonie. Hrošy, jak śćviardžajecca, byli nakiravanyja padraździaleńniu desantnikaŭ, sfarmiravanamu z futbolnych fanataŭ. Za heta Cimaščuku moža pahražać da 12 hadoŭ źniavoleńnia.
Aŭkcyjon, pra jaki havorycca ŭ paviedamleńni prakuratury, byŭ praviedzieny paśla tavaryskaha matča «Zienita» i kazachstanskaha «Kajrata». Arhanizatary zajaŭlali, što hrošy buduć nakiravanyja žycharam Kurskaj vobłaści, jakija paciarpieli ad bajavych dziejańniaŭ paśla nastupu ŭkrainskich padraździaleńniaŭ na terytoryi rehijona. Pra mahčymuju pieradaču hrošaj vajennym arhanizatary nie zhadvali.
46-hadovy Cimaščuk — lidar zbornaj Ukrainy pa kolkaści matčaŭ, trochrazovy čempijon Ukrainy i ŭładalnik troch kubkaŭ i Supierkubka krainy.
U sakaviku 2022 hoda Ukrainskaja asacyjacyja futboła pazbaviła jaho tytułaŭ, vyklučyła z rejestra hulcoŭ nacyjanalnaj kamandy i pažyćciova dyskvalifikavała za toje, što jon praciahnuŭ pracu ŭ Rasii paśla lutaŭskaha ŭvarvańnia va Ukrainu. Hetyja rašeńni byli admienieny ŭ listapadzie 2024 hoda Spartyŭnym arbitražnym sudom u Łazanie.
Akramia taho, Rada nacyjanalnaj biaśpieki i abarony Ukrainy ŭviaoa suprać futbalista sankcyi i pazbaviła jaho dziaržaŭnych uznaharod, nahadvaje Rasijskaja słužba Radyjo Svaboda.
Ciapier čytajuć
Maštabny zboj u troch biełaruskich bankach: z rachunkaŭ źnikajuć hrošy3
Kamientary