Jak pracuje Biełaruskaja akademija: jeŭrapiejskaja adukacyja na rodnaj movie

Ź inicyjatyvaj stvareńnia asiarodździa, jakoje dapamoža jak zachavać akademičnuju supolnaść Biełarusi, akademičnyja svabody i tradycyi, tak i pradstavić mahčymaści biełaruskaj moładzi atrymać vyšejšuju adukacyju pa jeŭrapiejskich standartach na rodnaj movie, u 2020 hodzie vystupiła prafiesarka Śviatłana Sialvierstava.

Śviatłana sama paciarpieła ad represij — jašče ŭ 2014 hodzie jana była zvolnienaja z Hrodzienskaha dziaržaŭnaha ŭniviersiteta. Adnak biez pracy nie zastałasia — stała prafiesarkaj Biełastockaha techničnaha ŭniviersiteta Politechnika Białostocka. Žančyna prykłała šmat namahańniaŭ, kab znajści finansavańnie i placoŭku.

Pavialičyć

Svaju pracu «Biełaruskaja akademija» pačała 9 kastryčnika 2020 hoda. Zaniatki startavali viasnoj 2021-ha. Technałohii anłajn-navučańnia abjadnali vykładčykaŭ i studentaŭ z roznych krain. Pieršaj śpiecyjalnaściu, na jakuju adkryli nabor, stała «administravańnie ŭ dziaržaŭnych orhanach i biznesie». Paźniej dadałasia «ekanomika» sa śpiecyjalizacyjaj «mieniedžmient i miedyjacyja».

Ciapier u «Biełaruskaj akademii» pracuje kala 50 vykładčykaŭ, u tym liku zvyš 10 daktaroŭ navuk. Za čatyry hady było praviedziena čatyry nabory studentaŭ na pieršuju stupień adukacyi i dva — dla mahistarskaj prahramy, adbyŭsia pieršy vypusk, arhanizavana čatyry mižnarodnyja kanfierencyi, vydadziena čatyry numary navukovaha recenzavanaha časopisa.

Z maja 2024 hoda «Biełaruskaja akademija» atrymała novy status. Z hramadskaj inicyjatyvy jana pieraŭtvaryłasia ŭ Biełastocki filijał Vyšejšaj škoły kadraŭ mieniedžmientu ŭ Koninie — faktyčna asobny fakultet.

Pavialičyć

Jak adznačaje prafiesarka Sialvierstava, ciapier Akademija maje prava aficyjna vieści nabor, samastojna arhanizoŭvać vučebny praces. Pry hetym jana ŭvachodzić u strukturu polskaj vyšejšaj škoły, padparadkoŭvajecca polskamu zakanadaŭstvu i im ža abaronienaja.

Navučańnie na druhoj stupieni karystajecca značnaj papularnaściu siarod biełarusaŭ, jakija ŭžo majuć biełaruskija dypłomy ab vyšejšaj adukacyi, ale nie mohuć ich nastryfikavać. Paśla dvuch hadoŭ navučańnia, jakoje, zaŭvažym, pravodzicca na ruskaj ci biełaruskaj movie, mahistry atrymlivajuć polski dypłom, najaŭnaść jakoha istotna palahčaje dostup da rynku pracy i lehalizacyi.

Mahčymaść atrymańnia jeŭrapiejskaj adukacyi na rodnaj movie — istotnaja pieravaha «Biełaruskaj akademii». Jak viadoma, polskija VNU ŭviali bolš žorstkija patrabavańni dla zamiežnych studentaŭ: ciapier patrabujecca paćviardžeńnie vałodańnia movaj navučańnia (polskaj ci anhlijskaj) na ŭzroŭni nie nižej za V2.

Pry hetym u dypłomie, jaki atrymlivaje vypusknik Biełastockaha filijała Vyšejšaj škoły kadraŭ mieniedžmientu ŭ Koninie, paznačana, što navučańnie viałosia na «ruskaj / biełaruskaj / polskaj» movach. Heta daje prava jaho ŭładalniku nie zdavać ekzamien pa polskaj movie, jaki zvyčajna patrabujecca pry atrymańni hramadzianstva.

Akademija dapamahaje navukoŭcam, vykładčykam i studentam atrymlivać hranty na daśledavańni i navučańnie, prachodzić stažyroŭki pa prahramach abmienu Erasmus, MOST, SALT a taksama ŭdzielničać u prahramach rełakacyi. Naprykład, ciapier robiacca zachady pa dapamozie studentam, što pražyvajuć u Hruzii i Kazachstanie, pierajechać u Polšču.

«Biełaruskaja akademija» pakul nievialikaja — usiaho piać hrup, ź jakich dźvie — mahistarskija. Pry hetym jana pačała supracoŭničać z Abjadnańniem ukrainskich škoł za miažoj, zaklučyła pahadnieńnie ab supracoŭnictvie ź Jeŭrapiejskim humanitarnym univiersitetam. Adnym z vynikaŭ hetaj supracy pavinna stać sumiesnaja padrychtoŭka mahistraŭ pa śpiecyjalnaści «ekanomika», a taksama sumiesnaja prahrama MVA.

Biełastocki filijał Vyšejšaj škoły kadraŭ mieniedžmientu ŭ Koninie («Biełaruskaja akademija») užo viadzie nabor na novy navučalny hod pa śpiecyjalnaści «administravańnie ŭ dziaržaŭnych orhanach i biznesie» na pieršuju i druhuju stupień navučańnia. Skany dakumientaŭ možna dasłać pa elektronnaj pošcie. Pry hetym nie patrabujecca daviedka ab nastryfikacyi i dakumient, jaki padćviardžaje vałodańnie polskaj movaj.

Bolš padrabiaznuju infarmacyju pra nieabchodnyja dakumienty i košt navučańnia možna atrymać na aficyjnym sajcie.

• 18
• 1
• 0
• 0
• 0
• 0
• 0
• 0