Kamandujučym siłami NATO ŭ Jeŭropie moža stać naščadak biełaruskich imihrantaŭ u ZŠA
Novym Viarchoŭnym hałoŭnakamandujučym Abjadnanymi ŭzbrojenymi siłami NATO ŭ Jeŭropie moža stać hienierał-lejtenant pavietranych siłaŭ ZŠA Aleksus Hrynkievič (Alexus Grynkewich). Jak vyśvietliła «Svaboda», jahony pradzied pryjechaŭ u ZŠA na miažy XIX i XX stahodździaŭ ź Miensku.
Pavodle ahienctva Reuters, jakoje spasyłajecca na ananimnych amerykanskich i eŭrapiejskich aficyjnych asobaŭ, prezydent ZŠA Donald Tramp vyrašyŭ usio ž zachavać tradycyju — na čale NATO ŭ Eŭropie staić amerykanski hienerał.
Hetaje rašeńnie moža vyklikać palohku najpierš u eŭrapiejskich sajuźnikaŭ pa NATO ŭ kantekście žorstkaj rytoryki Vašynhtonu ŭ adras Bruselu i jaho skieptycyzmu što da vajny va Ŭkrainie.
Pentahon, Bieły dom i NATO pakul nie paćvierdzili hetuju infarmacyju, adnak, pavodle krynic Reuters, novym Viarchoŭnym hałoŭnakamandujučym Abjadnanymi ŭzbrojenymi siłami NATO ŭ Eŭropie (SACEUR — Supreme Allied Commander Europe) i Eŭrapiejskaha kamandavańnia (EUCOM) Uzbrojenych siłaŭ ZŠA moža stać hienerał-lejtenant pavietranych siłaŭ ZŠA 53-hadovy Aleksus Hrynkievič. Ad 2022 hodu hetyja pasady zajmaje hienerał Krystafer Kavoli, jaki kaardynavaŭ vajskovuju dapamohu Ŭkrainie ŭ vajnie z Rasiejaj.
Hienerał-lejtenant Hrynkievič ciapier uznačalvaje Aperatyŭnaje kiravańnie Kamitetu načalnikaŭ štaboŭ US ZŠA. Ciaham svajoj vajskovaj karjery jon byŭ pilotam źniščalnikaŭ F-16 Fighting Falcon i F-22 Raptor, nalataŭšy bolš za 2300 hadzin.
Biełaruskija karani Hrynkieviča
«Svaboda» daśledavała hienealahičnyja resursy, kab spraŭdzić, ci proźvišča imaviernaha kamandujučaha siłami NATO ŭ Eŭropie maje biełaruskaje pachodžańnie. Adkaz — maje.
Aleksus Hrynkievič — heta praŭnuk Illi Hrynkieviča, jaki na miažy XIX i XX stahodździaŭ emihravaŭ ź Miensku ŭ ZŠA.
Na hienealahičnych resursach my znajšli infarmacyju, što pradzied hienerała ZŠA Aleksusa Hrynkieviča naradziŭsia ŭ 1873 hodzie (u dakumentach fihurujuć roznyja daty, ale hetaja samaja imaviernaja) u Miensku (tady — častka Rasiejskaj imperyi) ŭ siamji Ściapana (Stefana) i Ahaty Hrynkievičaŭ. U 1899 hodzie jon stupiŭ na amerykanskuju ziamlu, dzie staŭ Elias Grinkevitch.
Paźniej napisańnie proźvišča ŭ anhłamoŭnych dakumentach transfarmavałasia ŭ Grynkewich.
Jakraz na miažu stahodździaŭ prypaŭ pačatak pieršaj masavaj chvali emihracyi ź biełaruskich ziemlaŭ Rasiejskaj imperyi ŭ ZŠA.
Jak tłumačyŭ historyk biełaruskaj emihracyi Vitaŭt Kipiel u knizie «Biełarusy ŭ ZŠA», pryčynaj tamu — reakcyjnaja rasiejskaja palityka, jakaja stałasia hałoŭnym faktaram ekanamična-palityčnaha zaniapadu kraju.
Asnoŭnuju masu emihrantaŭ z Paŭnočna-Zachodniaha kraju składali sialanie, mnohija ź jakich byli bieźziamielnymi. Jany šukali lepšaj doli i «abiacanaj ziamli».
7 kastryčnika 1906 hodu Elijas Hrynkievič ažaniŭsia z 22-hadovaj Anastasijaj Śnihirevič (Anastasia Snigerevitch, 1884—1945) — uradženkaj Vilni, dačkoj Adama Śnihireviča, jakaja apynułasia ŭ Ńju-Jorku ŭ 1901 hodzie.
Pavodle paśviedčańnia ab šlubie, cyrymonija adbyłasia ŭ Mikałajeŭskim sabory na Manhetanie — hałoŭnym chramie Rasiejskaj pravasłaŭnaj carkvy ŭ ZŠA. U dakumencie prafesija Hrynkieviča paznačana jak «rabočy». Imia baćki niaviesty było Adam, a adnym sa śviedkaŭ byŭ Fiodar Lach. Kraina pachodžańnia žanicha i niaviesty — «Rasieja». Zhodna z materyjałami pierapisu 1920 hodu, suženstva Hrynkievičaŭ razam z čatyrma dziećmi žyli ŭ Bruklinie, pracavali ŭ absłuzie hatelu. U ankiecie paznačana, što rodnaja mova abaich — «rasiejskaja».
Čamu paŭsiul u dakumentach emihrantaŭ ź Miensku i Vilni — «Rasieja» i «rasiejskaja mova»?
«Dla rehistrataraŭ i statystykaŭ [u ZŠA] sialanie-emihranty ź Biełarusi stalisia «rasiejcami», — pisaŭ Vitaŭt Kipiel u daśledavańni «Biełarusy ŭ ZŠA». — Pa ichnym prybyćci na amerykanskuju ziamlu ich sustrakali dy znoŭ ža rehistravali jak «rasiejcaŭ»… Dziakujučy biurakratyčnaj inercyi j niepadrychtavanaści słužboŭcaŭ uradu ZŠA biełarusy nie byli pryznavanyja ŭ jakaści apryčonaje nacyjanalnaje hrupy na praciahu cełych dziesiacihodździaŭ paśla ichnaha prybyćcia na bierahi Novaha Śvietu».
Adnym z čatyroch dziaciej Elijasa i Anastasii Hrynkievičaŭ byŭ Nikałas Hrynkievič (Nicholas Grynkewich, 1915—1969). Heta dzied hienerał-lejtenanta Aleksusa Hrynkieviča. Jahony baćka Hrehary Hrynkievič (Gregory Wayne Grynkewich, 1949—2012) byŭ viadomym navukoŭcam, jaki zapatentavaŭ 14 vynachodak u sfery ŭdaskanaleńnia pradukcyjnaści i vytvorčaści paŭpravadnikoŭ.
Pra pachodžańnie svajoj siamji hienerał-lejtenant Aleksus Hrynkievič, jakoha časta nazyvajuć «Hrynč» (Grynch), nikoli nia zhadvaŭ.
Ciapier čytajuć
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy17
Kamientary
A to siońniašniaje kiraŭnictva niešta sabaciruje hetuju inicyjatyvu biełarusaŭ.