Stała viadoma, kaho z rasijskich vajskoŭcaŭ lačyli ŭ balnicach Homielščyny ŭ pačatku vajny

Za pieršyja 21 miesiac poŭnamaštabnaha ŭvarvańnia Rasii va Ukrainu praz balnicy Homiela i Chojnikaŭ prajšli 898 rasijskich vajskoŭcaŭ i bajcoŭ Rashvardyi.

Žurnalisty BRC daviedalisia pra heta, atrymaŭšy dostup da bazy Hałoŭnaha vajskova-miedycynskaha ŭpraŭleńnia Ministerstva abarony RF.

U balnicach Homielščyny akazvali dapamohu bajcam 16-j asobnaj hvardziejskaj bryhady admysłovaha pryznačeńnia HRU. Adzin z rasijskich vajennych ahladalnikaŭ vykazvaŭ zdahadku, što mienavita hetaja bryhada brała pad kantrol Čarnobylskuju AES u pačatku ŭvarvańnia, ale dahetul dokazaŭ hetamu nie było. Taksama žurnalisty znajšli źviestki pra bajcoŭ Centru śpiecyjalnaha pryznačeńnia «Kubinka-2», jakija ŭdzielničali ŭ zachopie Krymu ŭ 2014 hodzie.

Piersanału biełaruskich balnic zabaranili raspaviadać pra sakretnych pacyjentaŭ. Pra heta BRC na ŭmovach ananimnaści paviedamiŭ były supracoŭnik adnoj ź miedyčnych ustanoŭ Homielskaj vobłaści:

«Vielmi žorstka tabie, jak heta skazać, raili nie dzialicca hetaj infarmacyjaj ni z kim i ni pra što. Bo možaš paciarpieć i ty, i tvaja siamja».

U homielskich balnicach lažaŭ adzin z udzielnikaŭ apieracyi 24 lutaha 2022 hoda, kali rasiejcy sprabavali zachapić aeradrom «Antonaŭ» u Hastomieli. Raman Ziazin pastupiŭ z ranieńniem tvaru i adkrytym pierałomam nižniaj skivicy.

Pavialičyć

Pra tyja padziei jon raskazaŭ u śniežni 2024 hoda ŭ intervju rasijskamu telekanału «Źviezda»: «My vyrušyli niepasredna ŭ pryharad i sam horad Hastomiel, dzie ja atrymaŭ ranieńnie. I byŭ evakujavany».

Na pačatku šyrokamaštabnaha ŭvarvańnia Ziazinu byŭ 21 hod. U 2018-m jon dałučyŭsia da «Junarmii» — dziciača-junackaha ruchu, stvoranaha pa inicyjatyvie ŭžo byłoha ministra abarony Rasii Siarhieja Šajhu. Staryja profili Ramana Ziazina, a taksama jašče troch dastaŭlenych u biełaruskija balnicy rasijskich vajskoŭcaŭ — Sabuchi Baładava, Paŭła Nikicina i Maćvieja Šypunava — znajšli ŭnutry sistemy «Junarmii» ajci-admysłoŭcy arhanizacyi KibOrg.

Pavialičyć

Ziazin na front nie viarnuŭsia. Ciapier jon — kursant vajennaha instytuta fizkultury.

Paśla bitvy za Hastomiel u balnicy Homiela trapili 68 paranienych rasijskich amapaŭcaŭ. 

Staršy lejtenant palicyi Alaksiej Artamonaŭ atrymaŭ try askiepkavyja ranieńni i pierałom. Staršaha siaržanta palicyi Ivana Dziukanava dastavili z čerapna-mazhavoj traŭmaj i ŭdaram. Andrej Lavonaŭ pastupiŭ u homielskuju balnicu 6 sakavika z čerapna-mazhavoj traŭmaj i kantuzijaj. U balnicu trapiŭ i staršy siaržant palicyi Andrej Chitroŭ.

Pavialičyć

U homielskaj balnicy prachodzili lačeńnie taksama troje amapaŭcaŭ z Krasnajarska. Adzin ź ich — Illa Čurakaŭ — atrymaŭ askiepkavaje ranieńnie akurat u dzień masavaha zabojstva cyvilnych u Hastomieli. Dvoje inšych — heta Siarhiej Capkoŭ i Dzianis Katkoŭ.

Jašče dvoje rasiejcaŭ — Munko-Žarhał Žałmajeŭ i Zoryk Zyhbin — prybyli ŭ Homiel 9 sakavika 2022 hoda. Abodva atrymali askiepkavyja ranieńni i fihurujuć u śpisie, znojdzienym miascovymi žycharami kala Žytomirskaj trasy, u vioscy Biarozaŭka. Viadoma, što Zyhbina dastavili ŭ haradskuju balnicu. 25 sakavika ź minava-vybuchovaj traŭmaj u tuju ž balnicu pastupiŭ Dźmitryj Ciarenćjeŭ. Usie troje słužyli ŭ vajskovaj častcy №46108 z Ułan-Ude.

Adzin z mahčymych udzielnikaŭ zabojstvaŭ u Bučy — Alaksandr Kvitko z pazyŭnym «Škipier», kamandzir 6-j roty pskoŭskich desantnikaŭ — pastupiŭ u homielskuju balnicu 28 sakavika 2022 hoda z askiepkavymi ranieńniami šyi, ruki, halonki i jahadzicy.

Pavialičyć

Pavodle źviestak prajekta «Schiemy», Kvitko znachodziŭsia pa adrasie vulica Jabłonskaja, 144 u Bučy, dzie trymali miascovych čalcoŭ terytaryjalnaj abarony pierad ich rasstrełam. Heta žurnalistam paćvierdziła miascovaja žycharka, jakaja paznała jaho pa fotazdymku.

Akramia taho, Kvitko moža być datyčny da zabojstva piensijanierki Ałły Minajevaj, čyjo cieła znajšli ŭ jaje ŭłasnym domie. Pra heta žurnalistam «Radyjo Svaboda» paviedamili ŭ hałoŭnym śledčym upraŭleńni Nacpalicyi Ukrainy.

Pavodle danych z bazy Hałoŭnaha vajenna-miedyčnaha ŭpraŭleńnia Ministerstva abarony RF, akramia biełaruskich balnic, ź lutaha 2022 hoda da siaredziny červienia 2024-ha miedyčnuju dapamohu rasijskim vajskoŭcam akazvali ŭ anieksavanym Krymie, na akupavanych terytoryjach Danieckaj i Łuhanskaj abłaściej Ukrainy, a taksama ŭ samoj Rasii. Pavodle acenki «Radyjo Svaboda», za hety pieryjad praz vajennyja špitali RF i Krymu prajšło kala 166 tysiač sakretnych pacyjentaŭ.

• 1
• 0
• 2
• 5
• 2
• 0
• 16
• 0