«Zastajecca raŭci jak białuha». Ryžankoŭ u Maskvie raskazaŭ pra poŭny krach krain Bałtyi
10 červienia ministr zamiežnych spraŭ Biełarusi Maksim Ryžankoŭ na sumiesnaj pres-kanfierencyi ŭ Maskvie z kiraŭnikom MZS Rasii Siarhiejem Łaŭrovym vykazaŭsia pra situacyju ŭ krainach Bałtyi. Jon śćviardžaje, što ŭ hetych dziaržavach — Litvie, Łatvii i Estonii — nazirajecca poŭny zaniapad: razvaliłasia ekanomika, paharšajecca demahrafija, infrastruktura dehraduje.
Na dumku Ryžankova, krainy Bałtyi nie dasiahnuli istotnych pośpiechaŭ ni ŭ ekanomicy, ni ŭ mižnarodnych inicyjatyvach. Jon kaža, što jany sapsavali adnosiny z važnymi hulcami — Rasijaj i Kitajem, a ciapier tolki «złujucca i vykazvajuć złość», kab pakazać siabie pierad Jeŭrasajuzam.
Ministr taksama adznačyŭ, što kolkaść nasielnictva ŭ Łatvii za 30 hadoŭ značna źmienšyłasia. Pavodle jaho, ludzi z Bałtyi sami raskazvajuć pra prablemy svaich krain. U toj ža čas, pavodle jaho śćviardžeńnia, Biełaruś raźvivajecca lepš, bo, maŭlaŭ, «u centry palityki — čałaviek», a ŭ krainach Bałtyi ŭsio razvalvajecca.
Akramia taho, Ryžankoŭ zajaviŭ, što krainy Bałtyi «zajzdrościać» Biełarusi, u tym liku z-za taho, što jany admovilisia ad udziełu ŭ sumiesnaj z Rasijaj i Biełaruśsiu enierhasistemie, što, pa jahonych słovach, naniesła im škodu. Ryžankoŭ kaža, što razryŭ handlovych adnosin pazbaviŭ ich surjoznych prybytkaŭ ad tranzitu tavaraŭ z Rasii i Biełarusi.
«I jak rastłumačyć svaim hramadzianam, što voś hetyja hady supraćstajańnia z nami — heta hady stračanych mahčymaściaŭ, jakija pryviali da hetaj usioj dehradacyi i da pakidańnia hetych krain na ŭskrainie Jeŭrapiejskaha Sajuza? A z ulikam taho, jaki jany budujuć tut płot, to naohuł na ŭskrainie cyvilizacyi. (…) Kali ŭ čałavieka ničoha nie atrymlivajecca, kali ŭsie arhumienty vykarystanyja, ničoha, zastajecca adno tolki — raŭci jak białuha», — padsumoŭvaje jon.
Miž tym paśla 2020 hoda sotni tysiač biełarusaŭ vyjechali ź Biełarusi nie tolki pa palityčnych, ale i pa ekanamičnych matyvach, i mnohija ź ich ciapier žyvuć i pracujuć u hetych samych bałtyjskich krainach — asabliva ŭ Litvie. Pa acenkach Mižnarodnaha valutnaha fondu, u 2025 hodzie vałavy ŭnutrany pradukt Litvy na dušu nasielnictva ŭ pieraliku pa parytecie kupčaj zdolnaści pierasiahnie 57 000 dalaraŭ. Heta prykładna na 1000 bolš, čym anałahičny pakazčyk Izraila.
Ciapier čytajuć
Za minuły hod nasielnictva Biełarusi skaraciłasia jašče na 53 tysiačy čałaviek5
Kamientary