Dźvie ŭdačy, dziakujučy jakim adbyłasia karjera novaha pres-sakratara MZS Rusłana Varankova
Raniej pasadu zajmali Andrej Savinych, Anatol Hłaz, a niekali — i Pavieł Łatuška.
U mai 2025 hoda pres-sakratarom Ministerstva zamiežnych spraŭ Biełarusi byŭ pryznačany Rusłan Varankoŭ. Heta nie samaja topavaja pasada ŭ ijerarchii, ale jana dazvalaje istotna pavialičyć paznavalnaść svajho imieni.
Siarod papiarednikaŭ Varankova moža ŭzhadać Andreja Savinych, jaki paśla pres-sakratarstva pabyŭ pasłom u Turcyi i paprasiŭsia ŭ Pałatu pradstaŭnikoŭ, a taksama Paŭła Łatušku — toj byŭ hołasam MZS u pačatku 2000-ch.
Čym ža Varankoŭ abaviazany svajoj karjery? A jon paśpieŭ papracavać bolš za šeść hadoŭ u ZŠA, kudy prahnuć trapić mnohija dypłamaty.
Stryječny dziadźka
U 2010-ch Rasija była inicyjataram, ruchavikom i hałoŭnym sponsaram stvareńnia hetak zvanaha kontrterarystyčnaha ŭpraŭleńnia AAN. Načalnik upraŭleńnia staŭ by namieśnikam hienieralnaha sakratara. A heta značnaja pasada, dy jašče i paŭsiłavaja.
U vyniku letam 2017-ha hetaje ŭpraŭleńnie było stvorana, i jahonym načalnikam i namieśnikam Antoniu Huteryša staŭ rasijski dypłamat Uładzimir Varankoŭ.
Niezadoŭha da jaho pryznačeńnia, kali ŭžo stała jasna, što ŭpraŭleńniu — być, u biełaruskaje pradstaŭnictva pry AAN u Ńju-Jorku byŭ zakinuty cichi daradca pa pravavych pytańniach Rusłan Varankoŭ, jaho ŭładkavali trecim sakratarom.
Vyhladaje imaviernym, abo, prynamsi, mahčymym, što Rusłan atrymaŭ pavyšeńnie ŭ vyniku tonkaha raźliku načalstva.
Reč u tym, što biełaruski juryst Rusłan Varankoŭ — heta svajak rasijskaha Uładzimira Varankova. Pradzied Rusłana i dzied Uładzimira — adzin čałaviek.
Im byŭ biełaruski sielanin, uradženiec vioski Ržaŭcy Škłoŭskaj vołaści Mahiloŭskaha pavieta Homielskaj hubiernii Alaksandr Varankoŭ.
U hetaha Alaksandra ŭ tych ža Ržaŭcach naradziłasia dva syny: pieršy Ivan u 1921-m, i druhi Alaksandr u 1927-m. Pa ich hienieałohija rodu raździaliłasia na dźvie krainy.
Starejšy, Ivan, pajšoŭ vučycca, trapiŭ u Maskvu, staŭ historykam prarasijskich pohladaŭ, prafiesaram Maskoŭskaha dziaržaŭnaha ŭniviersiteta. U jaho naradziŭsia syn Uładzimir — heta toj samy, jaki ciapier namieśnik Huteryša.
Imavierna, pry atrymańni rasijskich dakumientaŭ jaho i zapisali na rasijski ład — «Voronkovym».
U toj ža čas, rodny brat taho Ivana Alaksandraviča, Alaksandr, zastaŭsia žyć na małoj radzimie. I zastaŭsia — navat pa-rusku, i ŭsie jahonyja dzieci taksama — «Varankovym». U Alaksandra naradziŭsia syn Mikałaj, a ŭžo ŭ Mikałaja — Rusłan. Rusłan pajšoŭ u Ministerstva zamiežnych spraŭ.
Takim čynam, rasijski dypłamat Uładzimir Varankoŭ prychodzicca biełaruskamu dypłamatu Rusłanu Varankovu stryječnym dziadźkam.
Ci ŭdała spracavalisia pamiž saboj svajaki i ŭ jakich pytańniach, nieviadoma, ale ŭžo ŭ 2018-m Uładzimira Varankova ŭ Minsku prymaŭ Łukašenka, prosiačy pieradavać pryvitańnie Huteryšu i rassypajučysia ŭ padziakach za «aktyŭny ŭdzieł u arhanizacyi ŭ Minsku mižnarodnaj kanfierencyi vysokaha ŭzroŭniu na temu praduchileńnia i baraćby z teraryzmam u ličbavuju epochu».
Pavodle Łukašenki, biez Varankova hetaja kanfierencyja nie adbyłasia b.
«Dzivosna było daviedacca, što vaš baćka rodam ź vioski Ržaŭcy Škłoŭskaha rajona. […] Pieradavajcie pryvitańnie našaj małaj radzimie. Nie zabyvajciesia, pryjazdžajcie», — cisnuŭ Łukašenka na nastalhičny momant.
Chrosnaja maci pieršaj žonki
Nie ŭ kožnaha navat adoranaha vypusknika jurydyčnaha fakulteta BDU ŭ pryncypie karjera raźvivajecca tak imkliva i chutka, jak u Rusłana.
Jahonaje pryznačeńnie ŭ Ńju-Jork było ŭžo nie pieršym. I da taho ścipły ŭčorašni student jeździŭ na paru hod na rabotu ŭ Vašynhton.
Viadoma, byvaje roznaje. Ale možna dapuścić, što ŭ vialikaj stupieni karjera ścipłaha vypusknika jurfaka pajšła ŭ haru praz udały studencki šlub.
Pieršuju, užo byłuju žonku Rusłana, zvać Volha Malinoŭskaja.
Jana ŭradženka znakamitaha horada Škłova. Siońnia pracuje načalnicaj upraŭleńnia małoha i siaredniaha biznesu Bielinviestbanka.
U bankirskich asiarodkach viadoma, što Volha Malinoŭskaja — heta chrosnaja dačka Nadziei Jermakovaj, byłoj načalnicy Nacbanka i mocna nabližanaj da Łukašenki asoby.
«Biełpoł» paćvierdziŭ «Našaj Nivie», što Malinoŭskaja — sapraŭdy pieršaja žonka Varankova.
Ciapier Varankoŭ pakazvajecca na ludziach ź inšaj žančynaj.
Sam fakt chrosnaha carkoŭnaha svajactva składana paćvierdzić dakumientalna. Tamu tut my taksama źviarnulisia da baz «Biełpoła», kab pravieryć imaviernaści.
Atrymlivajecca, što na momant naradžeńnia Volhi — 1986 hod, — jaje maci pracavała ŭ škłoŭskim lashasie, a baćka — u škłoŭskim filijale «Mahiloŭenerha». U toj ža samy čas Nadzieja Jermakova žyła i pracavała taksama ŭ škłoŭskaj aščadkasie.
Volha Malinoŭskaja ŭsiu karjeru zrabiła ŭ bankach, pačynała ŭ Biełhazprambanku, potym byŭ Biełaruski narodny bank, potym — «SmartKansałtSajuz», potym — Bielinviestbank.
Ciapier čytajuć
Łukašenku na śviacie ŭ Aleksandryi supravadžała aficer Zajcava20
Kamientary
"Reč u tym, što biełaruski juryst Rusłan Varankoŭ — heta naŭprostavy svajak rasijskaha Uładzimira Varankova. Pradzied Rusłana i dzied Uładzimira — adzin čałaviek.
Im byŭ biełaruski sielanin, uradženiec vioski Ržaŭcy Škłoŭskaj vołaści Mahiloŭskaha ŭjezdu Homielskaj hubiernii Alaksandr Varankoŭ".