«Kibierpartyzany»: Nie treba raździmać paniku, što režym usio moža ŭzłamać, pračytać, pra ŭsio daviedacca. Nie, nie moža

— U pakazanaj na hetym tydni stužcy ANT «Śpiecaperacyja «Harpun» pra spravu Paŭła Bialucina havorycca, što ŭ zdabytuju «Kibierpartyzanami» bazu dadzienych KDB byŭ upliščany falšyvy danos Bialucina na Mikałaja Aŭtuchoviča. Jak možna zrazumieć z tłumačeńnia KDB samaja taja vyciečka bazy była maštabnaj apieracyjaj dezinfarmacyi. Ci možacie vy abvierhnuć hetuju viersiju?

— Ja navat nie viedaju, jak kamientavać, ščyra kažučy, hetuju łuchtu. Heta niejki novy ŭzrovień kazak z boku režymu, z boku KDB. Uzłom sajtu KDB, a taksama zajavy i danosy, jakija tam znachodzilisia, heta, nahadaju, kala 40 000 dakumientaŭ, byli vieryfikavanyja žurnalistami. To bok žurnalisty navat telefanavali ludziam i vyśviatlali, što hetyja danosy ci niejkija zajavy byli napisanyja realnymi ludźmi, jakija heta paćvierdzili.

Pa-druhoje, jak u pryncypie možna ŭjavić, što KDB u noč uzłomu jaho sajtu zmoh sfabrykavać 40 000 zajavaŭ. Tolki ciapier, praź niekalki hadoŭ, paśla taho, jak heta raźlaciełasia pa ŭsich ŚMI, paśla taho, jak jany zhubili špijonaŭ, jak jany zhubili davier ludziej, jakija raniej pisali hetyja zajavy na ich sajt — tolki ciapier jany zajavili, što ŭsio heta sfabrykavali tolki dziela taho, kab dyskredytavać niejkaha noŭnejma. Heta prosta śmiešna słuchać.

Tady, paśla ŭzłomu «Kibierpartyzany» abnarodavali techničnyja paramietry ŭzłamanaj bazy dadzienych KDB. Možam, jašče raz pradstavić hetyja paramietry, kali kamuści heta cikava.

— Źjaŭlalisia źviestki pra toje, što ŭ zdabytaj vami bazie byli niestykoŭki — danos u bazie jość, kaardynaty danosčyka jość, a niama takoha čałavieka pa takim adrasie. Ci nasamreč takoha nie było?

— Ja nahadaju, što tam byli nie tolki danosy, Niekatoryja ludzi pisali nie pa palityčnych pryčynach, a pa absalutna inšych, pobytavych pryčynach. I całkam mahčyma, što niekatoryja ludzi pisali ad imia inšych ludziej. Takija vypadki, zrazumieła, byli. Ale varta nahadać, što sam Bialucin, darečy, nie admaŭlaŭ taho, što jon pisaŭ hety danos na Aŭtuchoviča. Navat u jaho vypadku abviaržeńnia nie było, było paćvierdžańnie.

— Ci jeść infarmacyja pra Bialucina ŭ inšych infarmacyjnych bazach, jakija majuć «Kibierpartyzany»? Moža pašpart na inšaje imia, moža jakaja inšaja infarmacyja.

— Nie, niama. Inšaha pašpartu ŭ jaho nie było znojdziena. Adzinaje, što znajšli, dyk administracyjnuju spravu ŭ 2020 hodzie za ŭdzieł u niesankcyjanavanaj akcyi.

— U biełaruskaj historyi paśla parazaŭ paŭstańniaŭ hramadzianskaja i palityčnaja supolnaść adnaŭlałasia vielmi pavolna: ludzi aściarožna naładžvali suviazi, źbiralisia, hurtavalisia ŭ korčmach, u pryvatnych damach, u lehalnych tavarystvach. Ciapier jość internet, mesendžery, sacsietki. Ale ci nie robić ich najaŭnaść praces kansalidacyi navat bolš składanym, čym 100 ci 150 hadoŭ tamu? ČKB, płan «Pieramoha», «Hajun» — raskryvać sakrety ŭmiejuć nie tolki «Kibierpartyzany». Śpiecsłužby kažuć — my ŭsio možam uzłamać, usie sakrety viedajem ci daviedajemsia. Praŭdu kažuć?

— U mianie advarotnaje pytańnie: a što jany sapraŭdy ŭzłamali? Jany ŭmiejuć pracavać kłasičnymi mietadami, kahości zachapić, zdabyć parol, załahinicca i potym užo tam dalej vyciahvać infarmacyju. Ale pieršy krok — heta zaŭsiody niejki fizyčny kantakt. Ci jany ŭvodziać svajho ahienta, ci zachoplivajuć kahości, ale realnych uzłomaŭ na techničnym uzroŭni my nikoli nie bačyli. Jany navat nie mohuć abaranić svaje sietki ad «Kibierpartyzanaŭ», a ŭžo atakavać niekaha — dla hetaha patrabujecca inšy ŭzrovień. I tam niama ničoha navat blizkaha da taho, što jość u «Kibierpartyzanaŭ».

Tak, jany ŭmiejuć karystacca kłasyčnymi metadami śpiecsłužbaŭ. U ich jość resursy, u ich jość ludzi. Jany adsočvajuć internet-aktyŭnaść unutry Biełarusi, my pra heta zaŭsiody papiaredžvajem. I my na našym telehram-kanale raspaviadajem, jak biaśpiečna karystacca internetam. I ŭ Biełarusi i za jaje miežami. I vykanańnie hetych paradaŭ moža praduchilić zachop ludziej, čym zajmajucca śpiecsłužby.

Zrazumieła, što treba być aściarožnymi, ale nie treba raździmać paniku, što režym usio moža ŭzłamać, usio pračytać, pra ŭsio daviedacca. Nie, nie moža. Jany lubiać rabić vyhlad svajoj usiemahutnaści, u tym liku i techničnaj. Ale nasamreč jany pracujuć chutčej na čałaviečych uraźlivaściach. Ale takoj ža była praca śpiecsłužbaŭ i 100, i 150 hadoŭ tamu.

I zaraz jość mahčymaści, kab biaśpiečna vykarystoŭvać technałohii suprać režymu. Technična my ich apiaredžvajem. Ale treba być aściarožnymi, nie panikavać i razumieć, što hałoŭnyja ŭraźlivaści — čałaviečyja, a nie techničnyja.

Darečy, jany i adnosna siabie razvažajuć nasamreč hetak ža. Chacia jany i navat sam Łukašenka pryznavali techničny ŭzrovień «Kibierpartyzanaŭ», ale paśla kožnaha pravału šukajuć, praz kaho infarmacyja vyciekła, jakaja ŭ ich znajšłasia čałaviečaja ŭraźlivaść. I praściej pryznačyć vinavataha, čym pryznać, što kamanda nieprafiesijnych chakieraŭ zmahła nanieści takuju škodu ich sistemam.

• 17
• 1
• 0
• 0
• 0
• 0
• 0
• 0