KDB dakazvaje, što ŭzłom ich sajta i publikacyja bazy danosaŭ byli častkaj ich ža śpiecapieracyi
A ŭsio, maŭlaŭ, dla taho, kab viarnuć ź Litvy Paŭła Bialucina.
Kamitet dziaržaŭnaj biaśpieki Biełarusi pierakonvaje, što ŭzłom aficyjnaha sajta viedamstva, jaki adbyŭsia ŭ pačatku 2024 hoda, nibyta byŭ častkaj ich ža śpiecapieracyi. A ŭsio dla taho, kab zaciahnuć u krainu aktyvista «Narodnaj Hramady» Paŭła Bialucina, jaki nibyta zadumvaŭ udar dronami pa Astravieckaj AES i inšych stratehičnych abjektach.
Nahadajem, u krasaviku 2024 hoda «Kibierpartyzany» pachvalilisia tym, što jašče ŭvosień 2023 zmahli prabracca ŭnutr sajta KDB i dastać adtul usiu dastupnuju infarmacyju. Hučnym skandałam stała publikacyja 40 tysiač zvarotaŭ u KDB, jakija adpraŭlalisia praz formu na sajcie.
Sama źlitaja baza zvarotaŭ u KDB sapraŭdnaja. Hetamu jość roznyja paćviardžeńni. «Naša Niva» źviazvałasia ź niekatorymi danosčykami (voś i voś), jakija źviartalisia ŭ KDB, i čyje danyja byli ŭ bazie. Jany pryznavalisia, što pisali čekistam.
Siarod stukačoŭ byli znojdzienyja imiony niekalkich aktyvistaŭ, u tym liku i siabra «Narodnaj Hramady» Paŭła Bialucina.
Da 2020 hoda jon byŭ u kole kamunikacyi Mikoły Aŭtuchoviča.
Bialucina ŭ svoj čas sudzili za «abrazu pradstaŭnika ŭłady» i dali dva hady chatniaj chimii — heta dakładny fakt. A toje, što paśla na jaho zaviali jašče adnu kryminalnuju spravu za «hvałt abo pahrozu hvałtu da pradstaŭnika ŭłady», — heta tolki jaho słovy. Tak ci inačaj, Bialucin vyjechaŭ u Litvu i prybiŭsia da «Narodnaj Hramady».
Jak stała viadoma sa źlitaj bazy danosaŭ, 31 studzienia 2017 hoda jon napisaŭ nastupnaje paviedamleńnie: «Dobry dzień. U mianie jość niekatoryja padstavy mierkavać, što hramadzianin RB Aŭtuchovič Mikałaj Mikałajevič pradumvaje i pačynaje ažyćciaŭlać padrychtoŭku da sproby ŭzbrojenaha zachopu ŭłady ŭ našaj respublicy. Pra sprobu daviedaŭsia sa słoŭ hr. Aŭtuchoviča M.M.».
Paśla taho, jak stała viadoma pra hety danos, Bialucina vyklučyli z «Narodnaj Hramady». Jaho tłumačeńni byli niaŭciamnymi. «Kali dać sapraŭdnuju infu, to ŭsio pierahorniecca», — zahadkava kazaŭ jon.
Paśla hetaha Bialucin praciahvaŭ žyć u Litvie, jaho žonka tym časam znachodziłasia ŭ Biełarusi.
U mai 2025 hoda stała viadoma, što Bialucin niejkim čynam apynuŭsia ŭ Biełarusi i byŭ aryštavany. KDB pakazaŭ, jak za im sačyli ŭ aeraporcie Stambuła. Adnak zastavałasia niezrazumiełym, ci jon palacieŭ u Biełaruś dobraachvotna.
30 červienia 2025 hoda ANT pakazaŭ film «Harpun», pryśviečany historyi Bialucina.
Śćviardžajecca, što nasamreč kadebisty nibyta ŭručnuju dadali zvarot Bialucina ŭ bazu zvarotaŭ. A paśla nibyta dali «Kibierpartyzanam» spampavać bazu. «Jany atrymali dostup da błoka, jaki śpiecyjalna byŭ pakinuty dla ich», — havorycca ŭ filmie.
Paśla taho, jak stała viadoma pra toje, što Bialucin — danosčyk, jamu admovili ŭ dazvole na žycharstva ŭ Litvie.
Jon sprabavaŭ trapić u Hiermaniju ci Partuhaliju, ale nie atrymałasia.
Jak Bialucin viarnuŭsia ŭ Biełaruś, nie paviedamlajecca.
Zrešty, heta ŭžo jak minimum druhaja historyja, kali siłaviki sprabujuć zrabić vyhlad, što heta nie ich uzłamali, a jany nibyta viali ŭśviadomlenuju špijonskuju hulniu. Kali ŭ listapadzie 2020 hoda ŭ internecie źjavilisia pierachoplenyja razmovy pres-sakratarki Łukašenki Natalli Ejsmant ź Dźmitryjem Baskavym, to siłaviki pasadzili Ejsmant — aktrysu pa adukacyi — u słužbovy kabiniet KDB, i jana pramaŭlała dakładna tyja ž słovy, što hučali na zapisu. Tłumačyłasia, što jaje razmova nasamreč była častkaj niejkaha apieratyŭnaha ekśpierymientu i što jana nie znachodziłasia na Płoščy Pieramien u viečar zabojstva Ramana Bandarenki.
Ciapier čytajuć
Mikoła Statkievič pavinšavaŭ biełarusaŭ z Dniom Voli, zapisaŭšy pieršaje VIDEA paśla vyzvaleńnia3
Kamientary