U Biełarusi padaražejuć novyja aŭtamabili, a vybar u dyleraŭ stanie bolš ścipłym. Što źmianiajecca

Što źmienicca?

Pa fakcie padpisanyja ŭradam źmieny — heta chutčej viartańnie na davajennyja rejki, čym niešta pryncypova novaje. Ale heta nie robić padzieju mienš važnaj.

Reč u tym, što da 2022 hoda bolš za 80% novych mašyn, jakija aficyjna pradavalisia ŭ Biełarusi, byli rasijskaj vytvorčaści. A pakolki ŭ adkaz na rasijskuju ahresiju suprać Ukrainy suśvietnyja aŭtavytvorcy zakryli svaje zavody na terytoryi RF i prypynili pastaŭki kampanientaŭ dla AŭtaVAZa, na rynku chutka ŭźnik deficyt.

Kab zhładzić prablemu, biełaruskija ŭłady spraścili praviły ŭvozu aŭto jurydyčnymi asobami, dazvoliŭšy pastaŭlać u krainu mašyny biez atrymańnia siertyfikata «Adabreńnie typu transpartnaha srodku» (ATTS).

Heta dazvoliła jurydyčnym asobam aficyjna pastaŭlać aŭtamabili biez atrymańnia ATTS, jaki moža kaštavać navat niekalki socień tysiač dalaraŭ dla adnoj abo niekalkich madelaŭ aŭto. U dadatak jaho atrymańnie zaciahvajecca pa časie, i ŭvieś praces moža lohka zaniać ceły hod.

Zamiest darahoha ATTS dastatkova było atrymać zaklučeńnie ab acency adzinkavaha transpartnaha srodku. To bok siertyfikacyja stała chutčej farmalnaściu.

Ale pastanova №372 skasoŭvaje sproščany paradak uvozu aŭtamabilaŭ jurydyčnymi asobami. Jana ŭstupaje ŭ siłu 8 žniŭnia — praz 30 dzion paśla jaje aficyjnaha apublikavańnia.

Zialonaja śviatło dla «elektryčak» da 2026 hoda

Pry hetym dziejańnie častki punktaŭ dakumienta nie raspaŭsiudžvajecca na zaklučeńni ab acency adzinkavaha transpartnaha srodku, aformlenyja da ŭstupleńnia ŭ siłu hetaj pastanovy, kali razmova idzie pra aŭto z ruchavikami ŭnutranaha zharańnia abo hibrydy.

Dla elektramabilaŭ pierachodny pieryjad budzie dziejničać da 1 studzienia 2026 hoda.

Pavialičyć

Heta zroblena dla taho, kab pastaŭščyki mahli zaviaršyć pastaŭki mašyn, jakija ŭžo byli zamoŭlenyja abo nabytyja ŭ trecich krainach.

Raznastajnaści stanie mienš

Viartańnie da staroj schiemy, kali impart aŭto jurydyčnymi asobami dazvoleny tolki paśla atrymańnia darahoha ATTS, pryviadzie da taho, što pastaŭščyki buduć vymušanyja admovicca ad pastavak šerahu madelaŭ. A ceny na madeli, što atrymajuć siertyfikat, vyrastuć, bo jon kaštuje niatanna.

Pakolki z-za apisanych novaŭviadzieńniaŭ častka marak i madelaŭ moža źniknuć z prodažu, ludzi, jakija nabyli takija aŭto, mohuć sutyknucca ź situacyjaj, kali, pa-pieršaje, budzie deficyt zapčastak, a pa-druhoje, ich aŭto budzie maksimalna niezapatrabavanym na druhasnym rynku, bo jany buduć vielmi redkimi praz adsutnaść novych pastavak. 

Reč u tym, što značnaje spraščeńnie ŭmoŭ impartu aŭto jurydyčnymi asobami pryviało da taho, što ŭ Biełarusi ciaham apošnich hadoŭ źjaviłasia šmat «šerych» aŭtasałonaŭ, jakija aficyjna pastaŭlali i pradavali aŭto, nie budučy pry hetym aficyjnymi dylerami.

Prodažam novych aŭto pačali zajmacca ŭ tym liku kampanii, što raniej pracavali tolki z aŭto pad zamovu, bo adsutnaść nieabchodnaści atrymlivać ATTS davała takuju mahčymaść.

Pavialičyć

Jak praviła, razmova idzie pra elektramabili kitajskaj vytvorčaści, jakija litaralna zapałanili biełaruski rynak novych aŭto. I heta nie dziŭna, bo ŭmovy dla impartu elektramabilaŭ jurydyčnymi i fizičnymi asobami amal adnolkavyja.

Dla aŭto z ruchavikami na tradycyjnym palivie i hibrydaŭ mytnaja nahruzka pamiž fizičnymi i jurydyčnymi asobami značna adroźnivajecca, tamu nieaficyjnyja dylery rabili staŭku na elektrakary.

Pry hetym važna adznačyć, što ŭ vypadku ź fizičnymi asobami nijakich źmien nie budzie. Pry pryvatnym imparcie aŭto ź lubym typam ruchavika atrymańnie dadatkovych siertyfikataŭ, jak i raniej, nie patrabujecca.

Tym nie mienš sam fakt viartańnia da davajennych patrabavańniaŭ śviedčyć pra toje, što rasijski i biełaruski aŭtapramy mienš čym za try z pałovaj hady całkam pierabudavali vytvorčaść i łancužki pastavak i ciapier mohuć samastojna zadavolić popyt.

Belgee i Lada zachapili rynak

Praŭda, dla šarahovych aŭtaamataraŭ pazityvu ŭ hetym mała. Vybar marak i madelaŭ u paraŭnańni z davajennym pieryjadam źmienšyŭsia, maksimalna «kitajazavaŭsia», a ceny na aŭto vyraśli.

Jak vynik, kala dźviuch tracin prodažaŭ novych aŭto ŭ aficyjałaŭ ciapier prypadaje ŭsiaho na dźvie marki: biełaruska-kitajskija Geely/Belgee i rasijskuju Lada.

Paśla viartańnia ATTS raznastajnaści stanie jašče mienš, a ceny vyrastuć, tamu całkam vierahodna, što dola Geely/Belgee i Lada budzie jašče bolšaj. Ale što dla šarahovaha aŭtaamatara drenna, to vielmi dobra dla Belgee. Mienavita dziakujučy vajnie i sankcyjam, biełaruska-kitajski aŭtavytvorca zmoh atrymać kala 50% rynku novych aŭto ŭ Biełarusi. Viartańnie da starych normaŭ tolki ŭzmacnić ich pazicyju na rynku.

• 2
• 0
• 1
• 0
• 0
• 2
• 3
• 0