«Adzin hladzieŭ telefon, druhi razmaŭlaŭ, a treci ŭ baku naziraŭ». Jak ciapier pravodziać dopyty na miažy Biełarusi ź ES
Što na minułych tydniach pisali karystalniki pryhraničnych telehram-čataŭ pra pravierki telefonaŭ i dopyty na biełaruskaj miažy, vyvučyła BGmedia.
Jak siłaviki praviarajuć biełarusaŭ na miažy
Karystalniki pryhraničnych čataŭ paćviardžajuć infarmacyju, što ludziej dapytvajuć i zatrymlivajuć nie tolki na ŭjeździe ŭ Biełaruś, ale i na vyjeździe.
Taki incydent zdaryŭsia 10 lipienia z pasažyram aŭtobusa Minsk — Vilnius:
«U 16.05 vyjezd ź Minska pa raskładzie. U 21.25 zajechali ŭ RB. U 21.40 start kantrolu. Byŭ dopyt. Adnaho čałavieka źniali z aŭtobusa».
A 11 lipienia ŭ punkcie propusku «Brest» dapytvali dziaŭčynu. U aŭtobus jana nie viarnułasia:
«Miažu prajšli chutka, ale čakali z dopytu 4 hadziny. Adnu dziaŭčynu tak i nie adpuścili».
Na pytańni, ci dapytvajuć na miažy tych, chto doŭha nie byŭ u krainie, adkazy roznyja. Voś dva, jakija napisali na minułym tydni:
«Vybaračna biaruć. Maja siastra ź biełaruskim pašpartam 5 hadoŭ nie była ŭ Biełarusi. Biedny aŭtobus cełuju hadzinu jaje čakaŭ, bo «naš słužyciel» 20 chvilin ź joj razmaŭlaŭ, a potym astatni čas u baku kuryŭ, ale jaje nie adpuskaŭ, pakul jana kipiš nie padniała. Nie viedaju, što tvorać».
«Varšava — Minsk, 8 lipienia. U 16.05 pravierka pašpartoŭ u aŭtobusie na biełaruskaj miažy. Prajšli chutka, na razmovy nie bačyła, kab kahości advodzili. Ja nie była 6 hadoŭ u RB i maralna była da razmovy hatovaja, ale jaje nie było. Aŭtobus z renthiena doŭha čakali. Vyjechali ŭ Minsk u 22.00».
U pryhraničnych čatach pišuć, što dopyty na miažy Biełarusi ź Jeŭrasajuzam pravodziać kožny dzień. Ich nazyvajuć «razmovami», «dyjałohami», «filtracyjaj», «apytańniem».
Voś niekatoryja paviedamleńni, u jakich jość peŭnyja padrabiaznaści:
«11 lipienia. U 07.15 pašpartny kantrol u biełarusaŭ. U 10.45 aŭtobus vyjechaŭ z renthienu RB. U 13.10 vyjechali ź miažy RB. Doŭha čakali ludziej z dopytu».
«11 lipienia ŭ 15.15 — pašpartny i mytny kantrol Biełarusi. Chvilin 30 čakali aŭtobus z renthiena i hadziny paŭtary — ludziej z razmoŭ. U 17.00 vyjezd ź miažy».
«Tarespal — Brest. U 14 hadzin 12 lipienia padsieŭ u šosty aŭtobus. Polski ruch zaniaŭ 5 hadzin. Što hetyja tavaryšy ŭ pahonach robiać, naohuł nie zrazumieła. Prajšli pašpartny kantrol i mytniu za 5 chvilin na čałavieka. Z aŭtobusa, jaki stajaŭ napieradzie, pry mnie zabrali šeść ci siem čałaviek u niejkuju kamoru kala pašpartnaha kantrolu. Vidać, z-za takich dziejańniaŭ i kałaps».
«12 lipienia ŭ našym aŭtobusie na razmovu pajšli 5 čałaviek, usie biełarusy».
«Adštampavalisia i doŭha stajali ŭžo kala našych. Aŭtobus na renthien. U 10.15 sieli ŭ aŭtobus. Na pašpartnym 7 čałaviek na razmovu zabrali. Stajali, čakali. Šmat aŭtobusaŭ nas abjechała. U 12.25 vyjezd u RB».
«Aŭtobus Vilnius — Hrodna, 13 lipienia. U 01.25 padjechali da biełarusaŭ. U 01.30 zajšli na pašpartny kantrol. Dźviuch žančyn zaprasili na razmovu, ale vielmi chutka adpuścili. U 02.25 vyjechali ź miažy».
«RP — RB, 13 lipienia. U 02.00 padjechali na pašpartny kantrol, pierad nami 2 aŭtobusy. U 02.49 pašpartny kantrol RB. U 03.50 prajšli pašpartny, čakajem čałavieka z razmovy. U 04.50 vyjechali z punkta propusku».
«Urocłaŭ — Minsk (ź pierasadkaj u Maryjampali), 14 lipienia. U 11.10 pačatak pašpartnaha kantrolu RB z usimi rečami praz skanier. 5 čałaviek na razmovy, aŭtobus na renthien. Vyjezd ź miažy ŭ 12.25».
Jak siłaviki praviarajuć inšaziemcaŭ na miažy
U pryhraničnych čatach adznačajuć, što dapytvajuć na miažy Biełarusi naohuł usich inšaziemcaŭ.
«Nie tolki ŭkraincaŭ biaruć — niemcaŭ, palakaŭ i h. d. Usich inšaziemcaŭ».
Siamja ŭkraincaŭ sama raskazała, jak ich dapytvali na miažy Biełarusi z Łatvijaj:
«Sama razmova niadoŭha — chvilin 5—10. Doŭha čakali, nas z ahulnaj čarhi prybrali, my sumna nazirali, jak usie prachodziać i prajazdžajuć. Hadziny 2, napeŭna, a potym u kaniec čarhi».
Taksama biełarusy adznačajuć, što na minułym tydni ŭkraincaŭ dapytvali doŭha i staranna. Niekatorych nie ŭpuścili ŭ krainu.
«RP — RB, 9 lipienia. U 09.30 — biełaruski pašpartny kantrol. U 10.00 vyjšli z pašpartnaha kantrolu RB, čakajem aŭtobus z pravierki, potym čakajem hramadzian Ukrainy. U 10.55 vyjazdžajem».
«U 14.44 [10 lipienia] mama pisała, što prajšli našych, za joj było paru čałaviek jašče. Ukraincaŭ šmat było, skazali, hadzin 5—8 dopytu zabiaśpiečana, zaraz zvaniła im, nie padymaje, budzie što viadoma, adpišu».
«10 lipienia šmat aŭtobusaŭ, plus vielmi šmat ukraincaŭ zabirajuć na dopyty i amal usie aŭtobusy na skanier».
«RP — RB, 11 lipienia. U 18.30 paklikali na pašpartny kantrol Biełarusi. U 19.35 prajšli, 3 ukraincaŭ nie puścili ŭ Biełaruś, čakajem jašče ludziej. U 20.05 vyjazdžajem».
«RP — RB, 11 lipienia. Prachodžańnie ŭnutry zaniało 8 hadzin. Vielmi pavolna ŭsio. Ukraincaŭ asabliva doŭha praviarajuć».
Ale časam zdarajecca cud, i ŭkraincaŭ nie zabirajuć na dopyty na miažy Biełarusi. Taki vypadak adbyŭsia 11 lipienia ŭ punkcie propusku «Brest».
«U aŭtobusie było šmat ukraincaŭ, čałaviek 10 dakładna, stajali na ŭjeździe pierad biełaruskim šłahbaumam, zajšoŭ pamiežnik, spytaŭ, jakija ŭ ŭkraincaŭ pašparty, ci jość u ich rasijskija pašparty. Potym uvieś aŭtobus adpravili na pašpartny kantrol prama ŭ budcy pierad šłahbaumam na ŭjeździe ŭ RB. Nivodnaha ŭkrainca nie zabrali na dopyt. Ale piekła pačałosia na biełaruskaj mytni».
Što pytajucca ŭ čatach pra pravierki telefonaŭ i razmovy na miažy Biełarusi
U asnoŭnym u pryhraničnych čatach pra pravierki telefonaŭ i razmovy pytańni zadajuć hramadzianie Ukrainy. Abo biełarusy, jakija chočuć pryjechać u krainu z ukraincami, čakajuć u siabie ŭ hości ŭkraincaŭ. Adno z takich pytańniaŭ:
«Usim pryvitańnie! Intymnaje pytańnie: chočam źjeździć u RB z Polščy, dziaŭčyna-ŭkrainka. Mohuć być niejkija składanaści na miažy? Mocna čaplajucca? U abodvuch (ja biełarus) telefony pravierać? Pytańni ŭ adekvatnaj maniery ci z razradu: «Vy chavajecie ŭ siabie vorahaŭ rejcha?!»
Na takija pytańni zvyčajna adkazvajuć razhornuta. I dzielacca padrabiaznaściami dopytaŭ.
«Usio adekvatna, čynna i kulturna. U jaje telefon dakładna buduć staranna praviarać. Pytańni adekvatnyja: dzie žyviacie, čym zajmajeciesia i h. d. Kali, viadoma, ničoha padazronaha nie znojduć».
«Pytańni z razradu: adkul jedziecie, kudy, navošta, dzie płanujecie pražyvać padčas znachodžańnia ŭ RB i h. d. Nu i telefon pravierać na prapahandu, łajki, reposty i h. d.»
«Kali jość hramadzianstva Ukrainy, to 100% na filtracyju. Kali hramadzianstva RB, to na razmovu, kali zaśviacilisia ŭ padziejach 2020 hoda, albo nie byli ŭ RB bolš za hod, to mohuć vyklikać, a mohuć i nie vyklikać».
«Kali tolki hramadzianstva Rasii, to nie. U mianie rasijski i češski — nikoli nie kličuć. U majoj žonki češski i ŭkrainski pašpart — zaŭsiody idzie na razmovy z prahladam telefona. U apošni raz naohuł troje kamitetčykaŭ było. Adzin hladzieŭ telefon, druhi razmaŭlaŭ, a treci ŭ baku naziraŭ».
«Pryjdziecca prajści filtracyju z razmovaj z asabistam i pravierkaj sacsietak, telefona i h. d. na najaŭnaść čaho-niebudź suprać RF abo RB. Kali znojduć, to razvarot z pastanoŭkaj štampa ŭ pašparcie ŭ admovie na ŭjezd [u Biełaruś] na niavyznačany termin».
Ciapier čytajuć
Dačka Nadziei Jermakovaj pastaŭlaje rybu ŭ kałonii, balnicy i siłavikam8
Kamientary