Upłyŭ Miełanii Tramp na muža byŭ niedaacenieny. Ukraina atrymała niečakanaha sajuźnika ŭ jaje asobie
Dziacinstva pieršaj łedzi ŭ byłoj Juhasłavii i spačuvańnie da ciažkaha stanovišča Ukrainy, mahčyma, paŭpłyvali na rašeńnie prezidenta ZŠA adpravić rakiety «Petryjot».
Pieršaja łedzi ZŠA Miełanija Tramp mahła paŭpłyvać na rašeńnie svajho muža, Donalda Trampa, ab pieradačy Ukrainie zienitna-rakietnych kompleksaŭ Patriot. Pavodle artykuła ŭ amierykanskim vydańni The Times, mienavita Miełanija, jakaja naradziłasia ŭ byłoj Juhasłavii, stała «niezvyčajnym sajuźnikam» prezidenta Ukrainy Uładzimira Zialenskaha ŭ Biełym domie.
Padčas razmovy z žurnalistami Tramp raskazaŭ pra razmovy z žonkaj: «Ja viartajusia dadomu i kažu pieršaj łedzi: «Ja siońnia havaryŭ z Uładzimiram, u nas była cudoŭnaja razmova». A jana adkazvaje: «O, praŭda? A tam jašče adzin horad tolki što razbambili».
Hetaja cytata śviedčyć, što 55-hadovaja Miełanija maje značna bolšy ŭpłyŭ na palityku muža, čym mnohija mierkavali.
Jaje cikavaść da vajny va Ukrainie možna patłumačyć jaje pachodžańniem. Naradziŭšysia za «žaleznaj zasłonaj» u 1970 hodzie, Miełanija raniej vykazvała zachapleńnie Ronaldam Rejhanam, prezidentam, jaki dapamoh pakłaści kaniec chałodnaj vajnie.
Jana časta razmaŭlaje sa svaim synam Beranam pa-słaviensku, i aboje jany zachoŭvajuć pašparty Jeŭrasajuza.
Mery Džordan, aŭtar knihi «Mastactva jaje ździełki: niepramoŭlenaja historyja Miełanii Tramp», skazała: «Heta [simpatyja Miełanii da Ukrainy] zusim nie dziŭna, uličvajučy, što jana vyrasła ŭ byłoj Juhasłavii [Miełanija — słavienka, z narodu, jaki byŭ aryjentavany na Zachad, a nie na Rasiju] — krainie, jakaja nie mieła lubovi da Rasii». I dadała: «Jana maje bolš dośviedu, čym inšyja ludzi ŭ kabiniecie, kab vykazać svaju pazicyju».
Pa słovach Džordan, baćka Miełanii, Viktar Knaus, jakomu 81 hod, praciahvaje jeździć u Słavieniju, dzie vychoŭvałasia Miełanija, što aznačaje, što jana zastajecca ŭ kursie jeŭrapiejskaj palityki. «Jaje radzima całkam padtrymlivaje Ukrainu, i ludzi tam aburanyja tym, što ZŠA raptam mohuć pierastać uzbrojvać Ukrainu», — skazała Džordan.
Raniej Miełanija ŭžo vykazvałasia suprać rasijskaj ahresii. U lutym 2022 hoda, kali Pucin pačaŭ poŭnamaštabnaje ŭvarvańnie, Tramp nazvaŭ jaho «hienijem», adnak Miełanija acharaktaryzavała hibiel mirnych žycharoŭ jak «žudasnuju» i zaklikała ludziej dapamahać ukraincam praz Čyrvony Kryž.
Choć Tramp maje šyrokaje koła daradcaŭ u śfiery nacyjanalnaj biaśpieki i zamiežnaj palityki, mienavita hołas jaho žonki, napeŭna, maje najbolšaje značeńnie.
«Jon słuchaje tolki tych, chto blizki da jaho. Asabliva, kali ich proźvišča — Tramp», — padsumoŭvaje Mery Džordan.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary
Pavaha Miełani..