Dva hady kałonii i bujny štraf dali chłopcu za ŭdzieł u mierapryjemstvach «Aktyŭnymi być fajna»
22-hadovaha chłopca, jakoha pryznali vinavatym u ŭdziele ŭ dziejnaści tak zvanaha ekstremisckaha farmavańnia «Aktyŭnymi być fajna», prysudzili da dvuch hadoŭ pazbaŭleńnia voli i štrafu ŭ 500 bazavych vieličyń (21 tysiača rubloŭ), paviedamlajuć «Minsk-Naviny».
Chłopiec, pavodle śledstva, dałučyŭsia da farmavańnia ŭ lutym 2022 hoda. «U intaresach «Aktyŭnymi być fajna» jon udzielničaŭ u anłajn i afłajn treninhach, arhanizavanych hetym ekstremisckim farmavańniem na terytoryi Minska i Mahilova, a taksama ŭ 2023—2024 hadach pryniaŭ udzieł u mierapryjemstvach na terytoryi Litoŭskaj Respubliki ŭ jakaści pradstaŭnika hetaha abjadnańnia», —kažuć u prakuratury.
Prakuratura ličyć, što hetyja mierapryjemstvy mieli metaj uciahvańnie hramadzian Biełarusi ŭ ekstremisckuju dziejnaść praz kulturnyja, adukacyjnyja i inšyja prajekty.
Na sudzie małady čałaviek pryznaŭ, što ŭśviedamlaŭ nakiravanaść dziejnaści arhanizacyi, ale nie ŭśviedamlaŭ surjoznaści nastupstvaŭ svaich dziejańniaŭ. Sud pryznaŭ jaho vinavatym pavodle č. 3 art. 361-1 Kryminalnaha kodeksa (udzieł u ekstremisckim farmavańni).
ABF (Aktyŭnymi Być Fajna) — arhanizacyja niefarmalnaj adukacyi, zasnavanaja ŭ Biełarusi ŭ 2015 hodzie, heta prajekt pa papularyzacyi mietodyki šviedskich vučebnych hurtkoŭ.
Da 2021 hoda ABF pracavała ŭ roznych haradach Biełarusi, uklučajučy ŭsie abłasnyja centry. Paśla prymusovaj likvidacyi arhanizacyi ŭ Biełarusi jana adnaviła svaju dziejnaść u Litvie, Polščy i Hruzii jak inicyjatyva biełaruskaj dyjaspary. Skraznymi temami dziejnaści źjaŭlajucca pravy čałavieka, fieminizm, hiendarnaja roŭnaść, ekałahičnaść i inkluziŭnaje hramadstva.
Kamientary
Chłopca škada, ale takija nda nam niepatrebnyja!
I ŭvohule, skažycie, a pasiŭnym być nie fajna? Heta nie dyskryminacyja?