Trybuna stadyjona budučaha supiernika minskaha «Dynama» ŭ jeŭrakubkach nazvana ŭ honar futbalista, jaki pamior padčas matča
Minskaje «Dynama» sastupiła pa vynikach dvuch matčaŭ bałharskamu «Łudahorcu» ŭ pieršym raŭndzie kvalifikacyi Lihi čempijonaŭ i praciahnie baraćbu ŭ kvalifikacyi Lihi kanfierencyj, dzie supiernikam u druhim raŭndzie budzie čempijon Ałbanii «Ehnacija». Što heta za kłub, raźbiraŭsja «Priessboł».
«Ehnacii» — 90 hadoŭ. Ale niahledziačy na taki pavažany ŭzrost, «Ehnacija» ź nievialikaha haradka Rrahožynie ŭ 5 tysiač čałaviek [mienavita tak praz dva «r» pišacca nazva haradka — Rrogozhinë — NN] vystupała ŭ najmacniejšym dyvizijonie čempijanatu Ałbanii usiaho piać siezonaŭ.
Upieršyniu jana trapiła ŭ vyšejšuju lihu ŭ 2004 hodzie, adnak adrazu ž vylecieła. Druhi raz — u 2021-m, i nieŭzabavie ŭžo zamacavałasia na vierchniaj prystupcy pjedestała. Spačatku, u čempijanacie 2021/22, «Ehnacija» zmahałasia za vyžyvańnie, finišavaŭšy vośmaj. U nastupnym jana zavajavała bronzu, a potym dva załatyja miedali zapar. Imklivy ŭzdym amal nieviadomaj jašče piać hadoŭ tamu kamandy vyhladaje siensacyjnym.
U 2017 hodzie rrahožyncy pieramahli ŭ trecim dyvizijonie, u 2021-m — u druhim, a jašče praz try hady stali čempijonami. Taksama jany dvojčy vyjhrali Kubak krainy (2023 i 2024). Byli blizkija da treciaj zapar pieramohi, ale nie atrymałasia — u mai 2025-ha prajhrali ŭ finale «Dynama Sici» ŭ sieryi pienalci.
Pry hetym skład «Ehnacii» hučnymi imionami i proźviščami nie vyznačaŭsia i nie vyznačajecca. Imaviernych pryčyn ryŭka ŭvierch vidać niekalki. Pa-pieršaje, umiełaja praca trenierskaha štaba i pravilna spłanavany kadravy padbor futbalistaŭ. Pryčym nijakich hrandyjoznych srodkaŭ na ich zaprašeńnie (nabyćcio) nie traciłasia. Chutčej za ŭsio, sprava ŭ abumoŭlenych i svoječasovych vypłatach zarpłaty.
Pa-druhoje, možna źviarnuć uvahu na asłableńnie ŭzroŭniu ałbanskaha čempijanatu. Za apošnija siem hadoŭ kraina ŭ kłubnym rejtynhu UEFA spaŭzła z 34-ha miesca na 46-je.
Heta ŭ niečym nahadvaje siońniašni biełaruski futbolny piejzaž, kali kraina skaciłasia ŭ rejtynhu na 52-ju pazicyju, i MŁ ź Viciebska, što letaś hulaŭ u pieršaj lizie, paśla pieršaha kruha ź vialikim adryvam uznačaliŭ turnirnuju tablicu. Ale Viciebsk — chacia b abłasny centr, a Rrahožynie — haradok na 5 tysiač čałaviek.
Zatoje tam pabudavali hrandyjozny pa miascovych maštabach stadyjon: «Ehnacija-Arena», uviedzienaja ŭ ekspłuatacyju paru hadoŭ tamu, umiaščaje 4267 hledačoŭ.
U studzieni 2025 hoda arenu prainśpiektavali delehaty UEFA, i stadyjon atrymaŭ «katehoryju 3». Na im paŭtara miesiaca tamu ŭžo pravodzilisia matčy finalnaha turniru junackaha (U-17) čempijanatu Jeŭropy.
Adna z trybun «Ehnacija-Areny» nosić imia Rafaela Dvamieny. Forvard zbornaj Hany (najlepšy bambardzir «Ehnacii» ŭ čempijanatach 2022/23—2023/24) 11 listapada 2023 hoda na 23-j chvilinie matča z «Partyzani» straciŭ prytomnaść ad spynieńnia serca i pamior pa darozie ŭ balnicu.
Dvamiena byŭ uklučany ŭ simvaličnuju zbornuju čempijanatu-2022/23. U joj z rrahožynskich futbalistaŭ taksama fihuravaŭ hałkipier Alen Šery (ciapier u «Kaljary»), pravy chaŭbiek brazilec Fiernanda Madejras, aporny paŭabaronca Albana Aleksi i centralny abaronca Renata Małota.
Narešcie, u zbornaj apošniaha čempijanatu 2024/25 ad «Ehnacii» źjavilisia novyja pradstaŭniki: hałkipier Marya Dajsináni, centr paŭabaronca Sierdžya Ujka i levy vinhier Rehi Łuškja (jon z 16 hałami staŭ najlepšym bambardziram kamandy).
Uznačalvaje supiernika minčukoŭ Edlir Tetova (1983). Trenierski staž u jaho nievialiki, a «Ehnacijaj» jon kiruje ŭžo druhi raz. Upieršyniu — z 4 červienia pa 15 kastryčnika 2022 hoda. Adnak 27 studzienia 2023 hoda jaho viarnuli nazad. I z taho času ŭ jaho skarboncy značacca dva čempijonskija zołaty i dva Kubki.
Zastajecca skazać, što kali ŭ svajoj krainie «Ehnacija» ŭžo ŭźniałasia na viaršyniu, to na mižnarodnaj arenie pakul jašče topčacca la padnožža, pra što śviedčyć vynik supraćstajańnia ź isłandskim «Brejdablikam» — 1:0, 0:5.
Pieršy matč «Dynama» — «Ehnacija» projdzie ŭ čaćvier, 24 lipienia, i pačniecca ŭ 20:00. Hulnia ŭ adkaz — 31 lipienia.
Pieramožca vychodzić u treci raŭnd kvalifikacyi Lihi kanfierencyj, prajhraŭšy pakidaje jeŭrakubki.
«Ehnacija», darečy, nazva ŭ honar staražytnaj darohi, što złučała Rym z pravincyjami ŭ Hrecyi i teratoryjaj sučasnaj Ałbanii, u toj ža Hrecyi jość niamała nazvaŭ vulic, jakija nazyvajucca Ehnacija.
-
Trenier, jaki pryvioŭ kłub da srebra ŭ čempijanacie Biełarusi, budzie treniravać kamandu ź piataha dyvizijona pieršynstva Polščy
-
Forvard minskaha «Dynama» Dyłan Dziube i jašče čatyry chakieisty pryznanyja nievinavatymi pa spravie ab seksualnym hvałcie
-
Hałoŭny trenier «Niomana» vykanaŭ dziŭny taniec paśla pieramohi ŭ matčy Lihi kanfierencyj
Ciapier čytajuć
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu42
Kamientary