MZS Litvy nie budzie razhladać prapanovu miascovaha deputata ab anulavańni akredytacyi ofisa Cichanoŭskaj
Litoŭskaje ministerstva ličyć, što hetaja akredytacyja pavinna zachoŭvacca, pakul hramadzianie Biełarusi nie zmohuć svabodna i demakratyčna vyrašać budučyniu svajoj dziaržavy.
Litoŭskaje ministerstva zamiežnych spraŭ zajaviła, što prośba deputata Vitaŭtasa Sinicy ab admienie akredytacyi, vydadzienaj pradstaŭnictvu na čale ź lidaram biełaruskaj apazicyi Śviatłanaj Cichanoŭskaj, razhladacca nie budzie. Pra heta piša LRT.
«Pytańnie ab admienie akredytacyi hetaha pradstaŭnictva ŭ ciapierašni čas nie abmiarkoŭvajecca, pakolki status, pradstaŭleny pradstaŭnictvu, dazvalaje jamu dziejničać, vykonvać funkcyi, mabilizavać demakratyčnyja siły», — havorycca ŭ adkazie ministerstva.
Čynoŭniki taksama dadali, što akredytacyja pradstaŭnictva Cichanoŭskaj pavinna zachoŭvacca da taho času, pakul hramadzianie Biełarusi i ich demakratyčnyja siły nie zmohuć svabodna i demakratyčna vyrašać budučyniu svajoj dziaržavy».
Pradstaŭnik Nacyjanalnaha abjadnańnia ŭ Siejmie Vitaŭtas Sinica 26 lipienia źviarnuŭsia ŭ Hienprakuraturu krainy, kab jana acaniła, ci nie parušajuć vykazvańni Siarhieja Cichanoŭskaha ab mahčymaściach stvareńnia ŭ Litvie biełaruskich aŭtanomnych astravoŭ pałažeńniaŭ Kryminalnaha kodeksa i pryncypaŭ terytaryjalnaj cełasnaści krainy.
«Cichanoŭskija nie asudžajuć litvinizm, zaklikajuć Siejm razam šukać histaryčnuju praŭdu pra Vialikaje Kniastva Litoŭskaje, byccam Litva jašče jaje nie znajšła, na svaich psieŭdapašpartach prysvojvajuć sabie simvał «Vicisa» («Pahoni»), krytykujuć abmiežavańni mihracyjnaj palityki i, u rešcie rešt, zahavaryli pra «astravy», — kazaŭ deputat.
U zvarocie ŭ prakuraturu Sinica adznačaŭ, što častka 1 artykuła 121 Kryminalnaha kodeksa praduhledžvaje kryminalnuju adkaznaść dla tych, chto «udzielničaŭ u hrupie, jakaja maje metu niezakonnym sposabam źmianić kanstytucyjny ład Litoŭskaj dziaržavy, pasiahać na jaje niezaležnaść, parušyć terytaryjalnuju cełasnaść».
Vitaŭtas Sinica — palitołah, fiłosaf i adziny ŭ Siejmie Litvy deputat ad nacyjanalistyčnaj partyi Nacyjanalnaje abjadnańnie. Partyja sabrała 2,93% hałasoŭ na vybarach 2024 hoda i pa partyjnych śpisach u parłamient nie prajšła, ale Sinica ŭ druhim tury pieramoh u vilenskaj akruzie Karaliniški-Zamačak svajho supiernika z partyi «Sajuz Ajčyny».
Ciapier čytajuć
Aryštavany 75‑hadovy Źmicier Sańko — vieteran-vydaviec3
Kamientary