МЗС Літвы не будзе разглядаць прапанову мясцовага дэпутата аб ануляванні акрэдытацыі офіса Ціханоўскай
Літоўскае міністэрства лічыць, што гэтая акрэдытацыя павінна захоўвацца, пакуль грамадзяне Беларусі не змогуць свабодна і дэмакратычна вырашаць будучыню сваёй дзяржавы.
Літоўскае міністэрства замежных спраў заявіла, што просьба дэпутата Вітаўтаса Сініцы аб адмене акрэдытацыі, выдадзенай прадстаўніцтву на чале з лідарам беларускай апазіцыі Святланай Ціханоўскай, разглядацца не будзе. Пра гэта піша LRT.
«Пытанне аб адмене акрэдытацыі гэтага прадстаўніцтва ў цяперашні час не абмяркоўваецца, паколькі статус, прадстаўлены прадстаўніцтву, дазваляе яму дзейнічаць, выконваць функцыі, мабілізаваць дэмакратычныя сілы», — гаворыцца ў адказе міністэрства.
Чыноўнікі таксама дадалі, што акрэдытацыя прадстаўніцтва Ціханоўскай павінна захоўвацца да таго часу, пакуль грамадзяне Беларусі і іх дэмакратычныя сілы не змогуць свабодна і дэмакратычна вырашаць будучыню сваёй дзяржавы».
Прадстаўнік Нацыянальнага аб’яднання ў Сейме Вітаўтас Сініца 26 ліпеня звярнуўся ў Генпракуратуру краіны, каб яна ацаніла, ці не парушаюць выказванні Сяргея Ціханоўскага аб магчымасцях стварэння ў Літве беларускіх аўтаномных астравоў палажэнняў Крымінальнага кодэкса і прынцыпаў тэрытарыяльнай цэласнасці краіны.
«Ціханоўскія не асуджаюць літвінізм, заклікаюць Сейм разам шукаць гістарычную праўду пра Вялікае Княства Літоўскае, быццам Літва яшчэ яе не знайшла, на сваіх псеўдапашпартах прысвойваюць сабе сімвал «Віціса» («Пагоні»), крытыкуюць абмежаванні міграцыйнай палітыкі і, у рэшце рэшт, загаварылі пра «астравы», — казаў дэпутат.
У звароце ў пракуратуру Сініца адзначаў, што частка 1 артыкула 121 Крымінальнага кодэкса прадугледжвае крымінальную адказнасць для тых, хто «удзельнічаў у групе, якая мае мэту незаконным спосабам змяніць канстытуцыйны лад Літоўскай дзяржавы, пасягаць на яе незалежнасць, парушыць тэрытарыяльную цэласнасць».
Вітаўтас Сініца — палітолаг, філосаф і адзіны ў Сейме Літвы дэпутат ад нацыяналістычнай партыі Нацыянальнае аб'яднанне. Партыя сабрала 2,93% галасоў на выбарах 2024 года і па партыйных спісах у парламент не прайшла, але Сініца ў другім туры перамог у віленскай акрузе Каралінішкі-Замачак свайго суперніка з партыі «Саюз Айчыны».
Цяпер чытаюць
Вызвалены палітвязень Мікіта Емяльянаў — у свае 26 гадоў даведзены да вельмі цяжкага стану здароўя2
Вызвалены палітвязень Мікіта Емяльянаў — у свае 26 гадоў даведзены да вельмі цяжкага стану здароўя
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары