Byłaja śpikierka Kaardynacyjnaj rady Anžalika Mielnikava moža być nie žyvaja. Pra heta padčas pres-kanfierencyi 31 lipienia ŭ Varšavie paviedamiŭ kiraŭnik Narodnaha antykryzisnaha ŭpraŭleńnia Pavieł Łatuška. «Jość padazreńni, što jana ŭžo nie žyvaja», — adznačyŭ Pavieł Łatuška, piša Biełsat.
Palityk padkreśliŭ, što prajšło ŭžo čatyry miesiacy z momantu źniknieńnia Anžaliki Mielnikavaj, adnak dahetul niama absalutna nijakaj infarmacyi pra mahčymaje miesca jaje znachodžańnia. Pa słovach śpikiera Kaardynacyjnaj rady Arcioma Bruchana, taksama niama paćvierdžańnia adnosna taho, dzie ciapier dzieci Mielnikavaj. Bruchan taksama zaznačyŭ, što nie viadoma, ci žyvaja byłaja śpikierka KR.
30 lipienia Pavieł Łatuška nakiravaŭ zapyt u departamient pa baraćbie z arhanizavanaj złačynnaściu Nacyjanalnaj prakuratury Polščy ŭ Lublinie z prośbaj pradstavić mahčymuju infarmacyju ab chodzie rasśledavańnia pavodle art. 189 KK Polščy «Prymusovaje pazbaŭleńnie svabody», pavodle jakoha idzie śledstva ŭ spravie źniknieńnia Anžaliki Mielnikavaj i jejnych dziaciej.
«Ja byŭ zajaŭnikam u kamiendaturu staličnaj palicyi ab źniknieńni Mielnikavaj. Adbyŭsia dopyt praktyčna ŭsich supracoŭnikaŭ NAU, usie jany dali pakazańni ŭ ramkach śledstva. Nakolki ja razumieju, koła dapytanych asobaŭ było značna šyrejšaje. Na žal, my nie majem kankretnaj infarmacyi.
Usia kamunikacyja, jakaja chutčej nosić niefarmalny charaktar, ale jana rehularnaja, za što ja ŭdziačny polskamu boku, kaža pra toje, što źviestak dahetul niama. Mnie rehularna pieradajecca, što na siońniašni dzień my nie majem źviestak, dzie jana znachodzicca. Polski bok mnie taksama kaža, što ŭ ich heta vyklikaje vialikuju zakłapočanaść, što sama fizičnaja asoba nie moža arhanizavać svajo źniknieńnie na taki praciahły čas, kali niemahčyma atrymać choć niejkija źviestki ab miescy jaje znachodžańnia. Što mahło zdarycca, my nie viedajem», — raspavioŭ palityk.
Kamientary