«Haračych turaŭ sioleta niama i nie budzie». Adpačynak na mory staŭ dla biełarusaŭ daražejšym, ale popyt usio adno vysoki

«Cikavaść da kambinavanych i niestandartnych turaŭ raście»

Hanna Stempleŭskaja, dyrektarka turahienctva «A»:

«Biezumoŭnymi favarytami žniŭnia 2025 zastajucca pravieranyja časam napramki: Turcyja, AAE, Jehipiet. Taksama prykmietna vyras popyt na ekzotyku: Vjetnam, Maldyvy i Kitaj tryvała ŭvajšli ŭ top zapytaŭ biełaruskich turystaŭ.

Asabliva vialikimi tempami raście popyt na Kitaj (vostraŭ Chajnań) z-za anonsu pramych rejsaŭ ź Minska, jakija startujuć z 8 kastryčnika. Heta, možna skazać, hałoŭnaja źmiena 2025 hoda».

Lidarstva pa abjomie prodažaŭ upeŭniena trymaje Turcyja — tur na dvaich na 7 načej u dobrym 4-5* hateli pa sistemie «ŭsio ŭklučana» ciapier abychodzicca ŭ siarednim u 3 000 jeŭra (u biełaruskich rublach pa kursie turystyčnaha apieratara). Na druhim miescy — AAE z ceńnikam kala 2 800$ pa kursie za anałahičny tur. Zamykaje trojku Jehipiet, dzie košt tydniovaha adpačynku dla dvaich u dobrym hateli vyjdzie kala 2 900$.

«Pieravažnaja bolšaść biełaruskich turystaŭ u žniŭni šukajuć sonca i mora. Kala 90% braniavańniaŭ prypadajuć mienavita na plažny adpačynak.

Heta vytłumačalna: paśla pracoŭnaha hoda i ŭ pieryjad letnich kanikuł siemji i pary imknucca da rassłablenaha adpačynku kala mora. Ale z kožnym hodam my bačym, što cikavaść da kambinavanych i niestandartnych turaŭ raście, što nas vielmi raduje».

U žniŭni źnižeńnia cen čakać nie davodzicca. Naadvarot, vybar hatelaŭ i cen rezka zvužajecca z-za vysokaha popytu.

«Naprykład, u Turcyi na papularnyja daty jašče mohuć być avijakvitki, ale svabodnych numaroŭ u dobrych hatelach užo vielmi mała ci ŭvohule niama, jany raspradadzienyja zahadzia. U cełym dynamika cenaŭ nieadnastajnaja. Niekatoryja hateli padaraželi niaznačna, inšyja istotna.

Dla nahladnaści voźmiem papularny siamiejny hatel Crystal Flora Beach Resort 5* u Kiemiery. U žniŭni 2024 hoda tydniovy tur dla siamji z 2 darosłych i dziciaci kaštavaŭ kala 3 500 jeŭra pa kursie. Sioleta za toj ža tur u tyja ž daty treba zapłacić užo 3 900 jeŭra, što ilustruje ahulny trend na padaražeńnie».

Uvohule trend na rost siaredniaha čeka praciahvaje ŭmacoŭvacca. Biełaruskija turysty stali bolš upeŭniena płanavać dalokija padarožžy. Istotna vyras popyt na premijalnyja kirunki nakštałt Maldyvaŭ, Siejšelskich astravoŭ i Filipinaŭ, što paćviardžaje zrušeńnie ŭ bok bolš darahoha siehmienta.

Rańniaje braniravańnie kančatkova zamacavałasia jak hałoŭnaja stratehija biełaruskich turystaŭ, asabliva dla klučavoha napramku — Turcyi.

«Spažyŭcy dobra zasvoili, što broń tura zimoj na leta ci vosień dazvalaje aščadzić značnuju sumu (u bolšaści vypadkaŭ na siaredni i vip-siehmient ekanomija skłała ad 500 jeŭra i bolš za tur). Asabliva pryjemnyja ceny na leta hateli i našy partniory dajuć da «Čornaj piatnicy», jakaja prachodzić u kancy listapada».

Pa słovach Hanny, spadziavacca na kłasičnyja haračyja tury (vielmi tannyja) u žniŭni (pikavym miesiacy siezonu) nie davodzicca. Nievialikija źnižki mohuć źjaŭlacca tolki na samy kaniec žniŭnia, kali siemji rychtujuć dziaciej da škoły, i pačatak vieraśnia. Tady popyt, naturalna, źnižajecca.

«Tym nie mienš, navat za niekalki dzion da vyletu prapanovy jość, ale źnižkavymi nazvać ich składana:

• Turcyja: ekanamičny hatel 3* na tydzień u siaredzinie žniŭnia moža kaštavać ad 2 000 jeŭra, heta daloka nie «haračaja» cana.
• AAE: na najbližejšyja daty tury ŭ Emiraty praktyčna niedastupnyja z-za poŭnaj adsutnaści avijakvitkoŭ.
• Jehipiet: samyja biudžetnyja varyjanty startujuć ad 2 000$, ale heta buduć davoli ścipłyja pa ŭzroŭni hateli.

Jašče adna z asablivaściaŭ 2025 hoda — prykmietnaje zrušeńnie popytu ŭnutry AAE. Kali raniej u centry ŭvahi byŭ vyklučna Dubaj, to ciapier turysty ŭsio čaściej vybirajuć inšyja emiraty: Fudžejru i Ros-el-Chajmu.

«Tam prapanujuć jakasny plažny adpačynak pa sistemie «ŭsio ŭklučana» čaściakom pa bolš pryvabnych cenach, čym Dubaj, što stała vydatnaj alternatyvaj.

Ale dla tych, chto choča ŭbačyć słavutaści Dubaja i kamfortna adpačyć na mory, my prapanujem kambinavać. Naprykład, brać 2-3 nočy ŭ hatelach Dubaja, a zatym pierajazdžać na bolš spakojnyja marskija kurorty».

«Kurorty Hruzii, Azierbajdžana i Dahiestana buduć nabirać papularnaść»

Juryj Surkoŭ, dyrektar Travel House:

«Ciapier na piku papularnaści Turcyja, Hruzija, AAE. U Hruziju da kanca leta amal nie zastałosia avijakvitkoŭ, dy i ŭ hatelach taksama miescaŭ niama.

Na heta paŭpłyvała niekalki faktaraŭ. Pa-pieršaje, adnosna dastupnyja ceny. Adpačynak na 7 načej na dvaich abyjdziecca prykładna ŭ 1600 u. a. (pa kursie, ustanoŭlenamu na datu apłaty) na dvaich. Pa-druhoje, kraina sapraŭdy haścinnaja, z bahataj kulturaj, pryrodaj i smačnaj kuchniaj. Dy i lacieć niedaloka, što niemałavažna ciapier».

Akramia zvykłych Turcyi i Hruzii, u hetym siezonie biełarusy «rassmakavali» ŭźbiarežža Kaśpijskaha mora. Tamu tury ŭ Azierbajdžan i Dahiestan stali pytacca ŭsio čaściej.

«Heta, možna skazać, novy trend siezona. Cana demakratyčnaja, lacieć niedaloka, viza nie patrebnaja. Dla paraŭnańnia: cana taksama 1 600 u. a. na dvaich za 7 načej. Nieviadoma, kali ŭ nas skarocicca čas pieralotu ŭ Turcyju. Tamu, ja dumaju, hetyja kurorty buduć tolki nabirać papularnaść. Ale, praŭda, hateli tam nie nadta: u niekatorych ź ich numarny fond daŭno patrabuje abnaŭleńnia.

Taksama ciapier aktyŭna branirujecca adpačynak na vosień-zimu, u tym liku novyja kirunki z pramym pieralotam ad «Biełavija» na novych dalokamahistralnych Airbus 330-200 u Kitaj, na vostraŭ Chajnań, i ŭ Vjetnam, na vostraŭ Fukuok».

Ceny, pa słovach ekśpierta, u hetym hodzie stali nižejšymi prykładna na 10 %. Ale tyčycca heta tolki Turcyi.

«U apošnija hady tureckija hateljery mocna zavysili taryfy na hateli. I jak vynik — zapaŭnialisia pavolna. Tamu im daviałosia pajści na sastupki, kab padtrymać zahruzku z-za źnižeńnia popytu».

Tym nie mienš, biełaruskija turapieratary ciapier nie cierpiać ad niedachopu pracy.

«Adkładzieny popyt na adpačynak ciahnuŭsia jašče z kavidnaha 2020 hoda. U 2021-m ceny na pajezdki mocna vyraśli, a mnohija pa-raniejšamu nie adčuvali siabie ŭ biaśpiecy, tamu mała chto advažvaŭsia adpravicca ŭ adpačynak. U 2022-m padarožžy znoŭ adkładalisia — užo z pryčyny źmieny mižnarodnaj hieapalityčnaj situacyi. U 2023 hodzie taksama bolšaść ludziej čakali peŭnaści. I voś praz čatyry-piać hadoŭ mnohija ŭsio ž vyrašyli palacieć adpačyvać. Ciapier adkładzienaha popytu ŭžo niama, my pracujem u zvyčajnym režymie. Pry hetym deficytu klijentaŭ nie adčuvajem».

Łajfchak ad dyrektara turahienctva dla tych, chto choča adpačyć z kamfortam, ale pa bolš nizkaj canie:

«Ciapier u Emiratach i Katary nie siezon, tamu arabskija hateljery prapanujuć źnižanyja taryfy — u siarednim na 40-50% mienš za zvyčajnyja ceny. Heta značyć adpačynak, jaki ŭ siezon ź pieralotam abychodzicca ŭ 6000 u. a., ciapier kaštuje 3000-3500 u. a.

Heta vydatnaja mahčymaść atrymać asałodu ad uzroŭniu servisu, jaki ŭ inšy čas byŭ by niedastupny pa biudžecie. Kandycyjanavańnie ŭ hatelach i naohuł va ŭsich hramadskich budynkach padklučana da centralizavanaj sistemy, jak u nas aciapleńnie, tamu, niahledziačy na śpioku, tam zaŭsiody kamfortna».

Alternatyva AAE — Katar, jaki taksama ciapier na piku papularnaści. Pa hetym kirunku možna navat sarvać haračy tur.

«Na haračyja tury jašče možna znajści pa adnym-dvuch miescach u samalocie, i košt za dvaich vychodzić nižej zvyčajnaha — ad 1 500 u. a. Tak, horača, ale, jak i ŭ Emiratach, usiudy pracuje kandycyjanavańnie. Kraina čystaja, dahledžanaja — vielmi pryjemny kirunak dla adpačynku.

Jehipiet pa-raniejšamu zastajecca papularnym: tut taksama horača, ale dziakujučy nievysokaj vilhotnaści pieranosicca śpiakota značna lahčej».

«Turcyja stała dla biełarusaŭ amal «dačaj»»

Julija Mancevič, śpiecyjalist pa turyźmie, turahienctva Coral Travel na Hrušaŭcy:

«Na žnivień pa-raniejšamu zachoŭvajecca pryjarytet pa troch napramkach: Turcyja, Jehipiet i Arabskija Emiraty. Hetyja try krainy praciahvajuć lidziravać, pryčym Turcyja značna apiaredžvaje Jehipiet i Emiraty — amal u try razy.

Jehipiet i AAE trymajucca prykładna na adnym uzroŭni. I heta całkam zakanamierna: u Turcyi najbolš kamfortny tempieraturny režym. Našy turysty nie lubiać rezkich klimatyčnych źmienaŭ. U Jehipcie i Emiratach ciapier vielmi horača, aktyŭnaść sonca vysokaja. Nie ŭsie hatovyja da takoha.

I pa-druhoje, Turcyja ŭžo daŭno stała dla biełarusaŭ amal «dačaj». Heta rusifikavany kirunak, dzie lohka mieć znosiny. Adpačynak dla siabie tam znojduć turysty ŭsich pakaleńniaŭ».

Što tyčycca cenaŭ, to, pa słovach ekśpiertki, adpačynak dla biełarusaŭ staŭ daražejšym.

«Samy biudžetny tur u Turcyju na dvaich ad siami načej kaštuje ad 1500 jeŭra (pa kursie Nacbanka). Heta minimum. A dalej — kolki dazvalaje fantazija i kašalok. Jość tury i na 30 tysiač dalaraŭ, i vyšej.

Ciapier dobryja hateli ŭžo daŭno zapoŭnienyja. Ceny vyraśli prykładna na 10-15% u paraŭnańni ź minułym hodam. I rost nie tolki pa kvitkach, a pa poŭnym košcie tura. Źviazana heta z ekanamičnym kryzisam u samoj Turcyi, što adbiłasia na cenach».

Z novych kirunkaŭ u hetym hodzie — Kitaj. Pieršyja rejsy ź Minska ŭžo amal całkam raspradadzienyja, choć paloty pačnucca tolki ŭ kastryčniku.

Jość nievialikaja kolkaść turaŭ na Maldyvy. Choć heta nie samy aktyŭny siezon, ale achvotnyja aščadzić laciać adpačyvać u žniŭni-vieraśni.

«Taksama jość trochi braniavańniaŭ na Šry-Łanku, Kubu. Ale ceny na hetyja kirunki nie samyja biudžetnyja. Što tyčycca Hruzii, jana aktyŭna raspradavałasia na rańnim braniravańni. Ciapier tury kaštujuć prykładna stolki ž, jak u Turcyju. Pry hetym adpačynak u Hruzii, jak praviła, tolki «na śniadankach», a ŭ Turcyi «ŭsio ŭklučana». Usio bolšuju cikavaść vyklikajuć Katar i Aman. Nie adstajuć Azierbajdžan, krainy Azii.

Ale mnohija pakul tolki kansultujucca — jość efiekt adkładzienaha popytu. Ludzi čakajuć vodhukaŭ, rekamiendacyj ad znajomych i ŭžo ŭ nastupnym siezonie buduć hatovyja braniravać».

Niahledziačy na rost cenaŭ, achvotnych adpačyć mienš nie stała. Biełarusy jak adpačyvali, tak i praciahvajuć adpačyvać.

«Asabliva paradavała, što mnohija pačali zahadzia braniravać tury pa akcyjach. Chto aktyŭna šukaŭ — toj znajšoŭ dobryja varyjanty. Plus usio bolš turystaŭ vychodziać z zony kamfortu i cikaviacca novymi kirunkami, prychodziać na kansultacyi.

Haračych turaŭ sioleta niama i nie budzie, — adznačaje Julija.

— Kvitki z vyletam ź Minska raspradadzienyja. Haračyja tury mahčymyja tolki z Maskvy. Turcyja raspradadzienaja da kanca miesiaca, Hruzii amal niama da vieraśnia, Emiraty i Jehipiet — taksama na paŭzie. My dobra papracavali ŭ pačatku siezona — zimoj, viasnoj, pa rańnim braniravańni.

Popyt jość, i biełaruskija turapieratary navat nie spraŭlajucca z nahruzkaj. Mnohija telefanavali viasnoj i kazali: «My nikudy nie pajedziem, budziem adpačyvać u Biełarusi». A ciapier telefanujuć sa słovami: «A ci možna na soniejka?» Nadvorje nie raduje, dzieci chočuć sonca, i ludzi pierahladajuć svaje płany».

• 0
• 0
• 0
• 1
• 1
• 0
• 0
• 0