Knyrovič ličyć, što «Novaja Biełaruś» była b zdarovaj, kali b pryjšli Paźniak, Usaŭ, Kavaleŭski, Sańnikaŭ, Capkała i Radzina
Post biznesmiena Alaksandra Knyroviča, u jakim jon zajaviŭ, što ideja abjadnanych demsiłaŭ i adkrytaj dyskusii faktyčna pamierła, vyklikaŭ žorstki adkaz Franaka Viačorki. Publikujem sam dopis, jaki staŭ padstavaj dla palemiki.
«Śviaty prajšli, nas dahnali budni…
Ideja biełaruskich kalektyŭnych demakratyčnych sił, niejkaha ahulnaha ruchu — pamierła. Sumna, viadoma: heta była nitačka, što ciahnułasia jašče z 2020 hoda, z tych vulic, ad pryhožaha žanočaha trya, jakoje pieramahło Łukašenku.
Ale padziei 7—10 žniŭnia 2025 hoda ŭnutry samich demakratyčnych sił (za jakimi adekvatnyja ludzi, viadoma, i nie sačyli) nie pakidajuć inšych vysnoŭ.
Adbyŭsia imitacyjny spravazdačny schod pradstaŭnikoŭ Abjadnanaha pierachodnaha kabinieta pierad Kaardynacyjnaj radaj, padčas jakoha nichto ź ich nie zdoleŭ patłumačyć, jak imi kiruje kiraŭnica kabinieta: jakija stavić mety i zadačy, jakija KPI, resursy i abmiežavańni…
Sama kiraŭnica kabinieta začytała čarhovuju karotkuju pramovu, a ŭsie prapanovy našaj frakcyi narešcie arhanizavać paŭnavartasnyja słuchańni (minuła ž piać hadoŭ i jašče stolki ž napieradzie) natykajucca na cichi sabataž.
Adnačasova prajšła kanfierencyja «Novaja Biełaruś». Na paneli, dzie nibyta miełasia być «pramaja i biaźlitasnaja» razmova pra našy «pieramohi i paražeńni», u radok pasadzili pradstaŭnikoŭ adnoj palityčnaj siły — za vyklučeńniem Lizy Prokapčyk, jakaja adna adcianiała hetaje «adnadumstva».
Naturalna, najharačejšaja dyskusija ŭ hetych umovach raskruciłasia vakoł pytańnia «ci budzie Łatuška i dalej pracavać pa niadzielach»… vielmi, viadoma, cikava.
Sapraŭdy zdarovaj heta panel mahła b być u vypadku ŭdziełu Zianona Paźniaka, Paŭła Usava, Valeryja Kavaleŭskaha, Andreja Sańnikava, Vieraniki Capkała, Natalli Radzinaj.
Siabie ci Jahorava nie nazyvaju sa ścipłaści. Ale ich nie było. Nie pryjšli. Kažuć, admovilisia? A čamu raniej nie admaŭlalisia, a ciapier — voś tak? Ludzi, mabyć, z «hnilcom».
Nie znajšłosia achvotnych da dyskusii — i ŭsiu panel zaniali «svaje» (akramia Lizy). Heta drenna. Vielmi drenna.
My nazirajem praces «kakanizacyi» vakoł «nacyjanalnaha lidara» (prabačcie, tak na sajcie ofisa da hetaha času napisana). Heta pieratvaraje Śviatłanu Cichanoŭskuju z abjadnalnaj fihury ŭ «adnu z».
Admova ad «kankurencyi ŭnutry» stvaraje mnahahałośsie «zvonku», i my kocimsia ŭ stan siońniašniaj rasijskaj apazicyi. Možna było b hetaha nie dapuścić. Ale dla hetaha patrebnyja śviadomyja namahańni, jakich nie nazirajecca.
Bližejšyja piać hadoŭ nas čakaje doŭhaja «daroha rasčaravańniaŭ». Pazityŭnych scenaroŭ dla krainy niama: hałoŭnaje pytańnie hetaha pieryjadu — stupień zaležnaści Biełarusi ad Rasii, nie bolš za toje.
A baraćba ŭnutry ścisnutaj demakratyčnaj «burbałki» za toje, chto «lubimy mamčyn piražok», vyhladaje ahidna. Tatalnaja zaležnaść ad donarskaha finansavańnia jašče bolš uzmacniaje hetaje adčuvańnie.
My bačym i transfarmacyju samoj Śviatłany Cichanoŭskaj. Spačatku z «chatniaj haspadyni» ŭ «tvar biełaruskaha pratestu», u lidara vybarčaj kampanii, u jaje pieramožcu. Ciapier — u «adnu z» palitykaŭ, chaj navat samuju «rukapaciskanuju» na Zachadzie. Dalej nas čakaje maksimalnaja «frahmientacyja» palityčnaha pola ź imknieńniem «zachavać tvar» isnujučych struktur. Jak pravieści vybary ŭ Kaardynacyjnuju radu 4-ha sklikańnia — siońnia ŭjavić niemahčyma.
I možna było b zrazumieć niežadańnie niešta rabić u hetym kirunku, kali b kluč ad Biełarusi sapraŭdy lažaŭ u kišeniach zachodnich palitykaŭ. Ale jon usio tak ža — unutry Biełarusi, u hałovach i sercach samich biełarusaŭ. Tam, dzie zaŭsiody i byŭ.
Niežadańnie, strach dyskusii, kankurencyi «ŭnutry» naradžaje kankurencyju «zvonku».
Jość častka biełarusaŭ, u tym liku i maich čytačoŭ, jakija ličać, što kankurencyja, dyskusija razburaje «lidarstva» Śviatłany i škodzić usim, značyć — «nie čas». Maŭlaŭ, treba šychtavacca ŭ rad i ruchacca za ofisam, nie zadajučy pytańniaŭ, bo časy takija, surovyja. Ja razumieju taki pohlad. I ja liču jaho pamyłkovym. Nie asobu maju na ŭvazie, a sam padychod.»
Ciapier čytajuć
«Z tatam vyrašyli: naśpieŭ čas vučycca pa-biełarusku». Žančyna raskazała, jak u 80-ja hady jeździła za 20 kiłamietraŭ ad Minska dziela adukacyi na rodnaj movie11
Kamientary