U Minsku biaspraŭnikaŭ łoviać pa kamierach. Navat tych, chto jedzie z maskaj na tvary
Jašče kamiery fiksujuć tych, chto karystajecca telefonam za rulom abo nie prapuskaje piešachodaŭ na pierachodach.
DAI stvaryła bazu danych z pryblizna 4 tysiač minčukoŭ, jakim nielha sadzicca za rul. Prahramnaje zabieśpiačeńnie ŭ režymie anłajn paviedamlaje supracoŭnikam pra toje, što niejkaja z kamier zaŭvažyła aŭto čałavieka z bazy. Zatym pravaachoŭniki praviarajuć, chto mienavita kiravaŭ transpartnym srodkam, bo heta moh by być znajomy ŭładalnika, uklučanaha ŭ śpis.
Kali za rul vyrašyŭ sieści sam ułaśnik biez pravoŭ, da jaho nakiroŭvajuć najbližejšy ekipaž DAI. Havorka idzie nie pra tearetyčny sposab vyjaŭleńnia niadobrasumlennych kiroŭcaŭ, a pra mietad, jaki vykarystoŭvajecca na praktycy, piša ahienctva «Minsk-Naviny».
Jakaść karcinki z kamier dazvalaje razabrać i numary mašyn, i tvary siadziačych za rulom. Niekatoryja parušalniki vykarystoŭvajuć roznyja chitryki: sprabujuć zakryć tvar maskaj, pieššu iduć na AZS z kanistraj. Ale daišniki sprabujuć zmahacca z takimi chitrykami.
Kali taki parušalnik trapiŭsia ŭpieršyniu na praciahu hoda, jaho mohuć aštrafavać na 5—20 bazavych vieličyń (210—840 rubloŭ). U vypadku paŭtornaha parušeńnia dyjapazon spahnańnia pavialičvajecca da 20—50 bazavych vieličyń (maksimum — 2 100 rubloŭ) abo ŭžyvajecca alternatyŭnaje pakarańnie ŭ vyhladzie hramadskich rabot albo administracyjnaha aryštu.
Nie zastajucca biez uvahi i inšyja parušeńni, uklučajučy dapuščanyja piešachodami i samakatčykami. Akramia taho, kamiery dapamahajuć vyjaŭlać prablemnyja miescy na vulična-darožnaj sietcy i karektavać arhanizacyju ruchu, pracu śviatłaforaŭ, maršruty patrulavańnia ekipažaŭ DAI.
Płanujecca ŭkaraniać prahramnyja kompleksy dla fiksacyi parušeńniaŭ u aŭtamatyčnym režymie. U ich liku situacyi, kali kiroŭcy nie sastupajuć darohu piešachodam, ihnarujuć raźmietku, karystajucca telefonam za rulom. A ŭžo ŭ hetym miesiacy na niekalkich bujnych skryžavańniach realizujuć aŭtafiksacyju faktaŭ prajezdu na čyrvonaje śviatło. Jašče ŭ horadzie nieŭzabavie stanie bolš kamier, jakija rehistrujuć vypadki spynieńnia i stajanki transpartu tam, dzie hetaha nielha rabić.
Kamientary