Pakroŭsk i Mirnahrad na miažy padzieńnia. Nakolki tam krytyčnaja situacyja dla Ukrainy i što budzie dalej?
Hałoŭnaja meta nastupalnaj kampanii rasijskaj armii — bujny pramysłovy horad Pakroŭsk i jaho spadarožnik Mirnahrad — nibyta apynulisia ŭ akružeńni. Prynamsi pra heta zajaŭlajuć rasijskija ŭłady. Ukrainski bok heta admaŭlaje, ale havoryć pra «ciažkuju situacyju» na hetym učastku frontu. Što tam adbyvajecca nasamreč, pasprabavała razabracca Ukrainskaja słužba Bi-bi-si.
Paśla padzieńnia Aŭdziejeŭki ŭ lutym 2024 hoda rasijskija vojski skiravali namahańni svajho maštabnaha nastupleńnia na paŭnočny zachad — u bok Pakroŭska. Amal 40 kiłamietraŭ da ŭskrain horada jany pieraadoleli za paŭhoda i ŭvosień 2024‑ha nablizilisia da pryharadaŭ ahłamieracyi Pakroŭsk — Mirnahrad.
Asobnyja vajskovyja analityki prahnazavali akupacyju hetych nasielenych punktaŭ na praciahu pary miesiacaŭ. Adnak Uzbrojenyja siły Ukrainy zmahli naraścić svaje namahańni i navat adkinuć praciŭnika ad uskrain Pakroŭska ŭ pačatku 2025-ha.
Uletku i ŭ pačatku vosieni hetaha hoda rasijskija vojski źmianili taktyku i zamiest bujnych miechanizavanych šturmaŭ pačali nievialikimi piachotnymi hrupami pratočvacca mima ŭkrainskich abarončych paradkaŭ i kancentravacca ŭ tyle. Tam jany atakavali ŭkrainskich vajskoŭcaŭ i zachoplivali ich pazicyi.
Va ŭmovach vostraha deficytu piachoty va USU hetaja taktyka ŭrešcie dała svoj vynik. Pa stanie na kaniec kastryčnika, rasijanam udałosia maksimalna ŭskładnić łahistyku USU na hetym učastku i navat uziać pad svoj kantrol asobnyja rajony Pakroŭska. Pry hetym u horadzie, jaki amal źniščany rujnavalnymi ŭdarami bombaŭ i dronaŭ, da hetaha času zastajecca kala 1,2 tysiačy cyvilnych asob, kažuć ułady.
Akružeńnie ci nie?
«Złučeńni i vajskovyja čaści 2‑j i 51‑j armij, nastupajučy sustrečnymi kirunkami, zaviaršyli akružeńnie praciŭnika ŭ rajonie Čyrvonaarmiejska i Dzimitrava (hetymi savieckimi nazvami ŭłady RF nazyvajuć Pakroŭsk i Mirnahrad. — Red.). Zabłakavanaja bujnaja hrupoŭka Uzbrojenych sił Ukrainy», — zajaviŭ 26 kastryčnika načalnik Hienštaba US RF Valeryj Hierasimaŭ padčas dakładu prezidentu Rasii Uładzimiru Pucinu.
Pa słovach kiraŭnika armii RF, u akružeńni apynuŭsia 31 bataljon USU. Minabarony ŭdakładniła, što heta składaje kala 5,5 tysiač vajskoŭcaŭ.
Słovy pra «akružeńnie» Pakroŭska Pucin paŭtaryŭ jašče raz 29 kastryčnika, vykazaŭšy ideju abviaścić režym cišyni na niekalki hadzin i zapuścić u Pakroŭsk hrupy zamiežnych žurnalistaŭ, kab jany sami acanili situacyju.
Varta adznačyć, što zajavy pra poŭnaje akružeńnie Pakroŭska i Mirnahrada ŭspryniali sa skiepsisam navat u asiarodździ rasijskich vajennych błohieraŭ.
Naprykład, na kartach bajavych dziejańniaŭ, jakija štodnia publikuje prajekt rasijskaha prapahandysta Siamiona Piehava WarGonzo, vidać, što pa stanie na 29 kastryčnika armija RF nie zamknuła ŭčastak frontu kala siołaŭ Rodzinskaje, Čyrvony Liman i Hryšyna. Heta vakolicy Pakroŭska i Mirnahrada, praź jakija prachodziać klučavyja darohi, jakija pakul utrymlivajuć ukrainskija vojski.
U toj ža čas prajezd aŭtatranspartu i braniatechniki pa ich amal niemahčymy z-za ahniavoha kantrolu rasijskich vojskaŭ i aktyŭnaha vykarystańnia BPŁA. Ukraincam davodzicca zabiaśpiečvać łahistyku padraździaleńniaŭ albo pieššu, albo z dapamohaj hruzavych naziemnych i pavietranych dronaŭ.
Dniom 29 kastryčnika telehram-pabliki apublikavali videakadry ŭstanoŭki ściaha RF na stele kala ŭjezdu ŭ Pakroŭsk z boku Hryšyna. Praź niekalki hadzin ściah źbiŭ ukrainski FPV-dron. Adnak hetaja situacyja pakazvaje, nakolki daloka ŭhłyb horada zmahli pratačycca rasijskija vojski.
Akramia achopu z fłanhaŭ, armija RF ažyćciaŭlaje frantalny cisk na abarončyja pazicyi USU ŭ Pakroŭsku, atakujučy z paŭdniovaha i paŭdniova-zachodniaha kirunkaŭ. Tut rasijanam udałosia zamacavacca ŭ pryharadzie, a taksama ŭziać pad kantrol asobnyja rajony na poŭdzień ad čyhunačnych puciej, jakija dzielać horad amal napałovu. Akramia taho, zafiksavana prasoŭvańnie na niekatorych učastkach na poŭnač ad čyhunki i bai za vialikuju pramzonu na zachodnich uskrainach horada.
Taksama armija RF pačała miechanizavany šturm uschodnich uskrain Mirnahrada. Tut jaje hałoŭnaja meta — uziać pad kantrol terykon šachty 5/6 i kvartał šmatpaviarchovikaŭ, što dazvolić kantralavać uvieś horad, jaki lažyć u nizinie.
U vypadku, kali ŭ rasijskich vojskaŭ u Pakroŭsku i Mirnahradzie, jakija nastupajuć nasustrač adzin adnamu, atrymajecca zamknuć kolca, jany faktyčna razrežuć napałovu ŭkrainskuju abaronu ŭ hetaj ahłamieracyi i padraździaleńni USU, jakija da hetaha času ŭtrymlivajuć asobnyja pazicyi na paŭdniova-ŭschodnich uskrainach kala Navapaŭłaŭki i Lisoŭki, apynucca ŭ «katle».
«Vialikaja šeraja zona»
U kamandavańni 7‑ha korpusa desantna-šturmavych vojskaŭ, jaki adkazvaje za hety ŭčastak frontu, admovilisia prakamientavać Ukrainskaj słužbie Bi-bi-si situacyju z ustanaŭleńniem rasijskaha ściaha kala Pakroŭskaj steły.
Tam adznačyli, što rasijanie pryciahnuli amal 11 tysiač vajskoŭcaŭ dla akružeńnia Pakroŭskaj ahłamieracyi. Častka ź ich zmahła infiltravacca niepasredna ŭ sam horad. Vajskovyja analityki kažuć, što heta kala 200‑300 čałaviek.
Ličbu ŭ 200 rasijan u Pakroŭsku napiaredadni nazvaŭ žurnalistam i prezident Ukrainy Uładzimir Zialenski. 27 kastryčnika jon skazaŭ, što Ukraina «trymaje Pakroŭsk».
Za 28‑29 kastryčnika ŭkrainskija vojski źniščyli niepasredna ŭ Pakroŭsku 18 bajcoŭ armii RF, paviedamili ŭ kamandavańni korpusa. Tam taksama padkreślili, što praciŭnik nie maje namieru zamacoŭvacca na terytoryi, a płanuje prasoŭvacca dalej na poŭnač, kab «raścierušyć siły» ŭkrainskaj abarony i zabłakavać suchaputnyja łahistyčnyja kalidory ŭ horad.
Ukrainski analityčny OSINT-prajekt DeepState nazyvaje situacyju ŭ Pakroŭsku «na miažy krytyčnaj». Ekśpierty adznačajuć, što rasijanie, jakija zmahli pratačycca ŭ žyłuju zabudovu, ździajśniajuć dyviersii, zasady, minirujuć darohi, atakujuć ukrainskija tyłavyja padraździaleńni, u pryvatnaści čaści REB, artylerystaŭ, apierataraŭ BPŁA.
«Horš za ŭsio — vorah zmoh złamać łahistyku ŭ napramku Mirnahrada i ŭsioj ahłamieracyi horada. Akramia zasad piachoty, aktyŭna pracujuć varožyja drony, jakija manitorać i ažyćciaŭlajuć paražeńni pa pieramiaščeńniach na pazicyi, pravizii i da taho padobnaha. Aktyŭnaść varožych piłotaŭ značna ŭzrasła, kali ŭ horad pačała pratočvacca piachota, a dronščyki voraha dapamahajuć źniščać našu łahistyku, kab dać mahčymaść patrochu pahłynać horad», — skazana ŭ zajavie DeepState.
U hetaj situacyi, adznačajuć analityki, dla ŭkrainskaha kamandavańnia nieabchodna zabłakavać šlachi pratočvańnia rasijan u Pakroŭsk i začyścić značnymi siłami tyja padraździaleńni, jakija ŭžo skancentravalisia i schavalisia ŭ žyłych kvartałach.
«Situacyja ŭ Pakroŭsku na miažy krytyčnaj i praciahvaje paharšacca da taho momantu, što vypravić usio moža być užo pozna», — adznačajecca ŭ zajavie.
Na anłajn-karcie DeepState bolšaja častka Pakroŭska i ŭschodnija ŭskrainy Mirnahrada pa stanie na 29 kastryčnika znachodziacca ŭ šeraj zonie. Heta značyć, tam zafiksavana pieramiaščeńnie rasijskich vojskaŭ, ale niama źviestak pra ich upeŭnieny kantrol nad hetaj terytoryjaj. Heta źviazana z tym, što na mnohich učastkach frontu tut usio jašče zachoŭvajucca ŭkrainskija pazicyi, jakija faktyčna ciapier apynulisia ŭ tyle rasijan.
Heta istotna adroźnivajecca ad situacyi, naprykład, u Bachmucie viasnoj 2023 hoda, kali rasijskija vajskoŭcy začyščali pastupova kvartał za kvartałam, vyciskajučy praciŭnika.
Biahučy stan spraŭ u Pakroŭsku dazvalaje analitykam DeepState nazyvać uvieś horad «vialikaj šeraj zonaj». Prykład apieracyi zachopu rasijanami Aŭdziejeŭki abo Kurachava, dzie ŭkrainskija padraździaleńni taksama byli na miažy akružeńnia, pakazvaje, što taki stan spraŭ nie moža praciahvacca doŭha. Kali svoječasova nie razbłakavać łahistyku, to pryjdziecca advodzić vojski ŭ maksimalna składanych umovach u apošni momant.
U internet źlili pierapisku Kavaleŭskaha i Cichanoŭskaj. Ale kancoŭ nie znajści31
Kamientary