Asieŭšy ŭ Rasii, biełaruski architektar, datyčny da hetaha prajekta, stvaraje chramy dla akupavanych Kryma i Danbasa. Jahonyja prajekty nazyvajuć formaj prapahandy adzinaha rasijskaha pravasłaŭja praz architekturu.
U Minsku zaviaršajecca hramadskaje abmierkavańnie kancepcyi chrama ŭ honar śviatoj roŭnaapostalnaj Niny, arhanizavanaje administracyjaj Frunzienskaha rajona.
Miescam budaŭnictva čarhovaha pravasłaŭnaha chrama vybrana terytoryja na ŭskrainie hałoŭnaha katalickaha niekropala Minska z boku vulicy Adojeŭskaha. Ciapier tut raźmiaščajecca nievialikaja zialonaja zona z uparadkavanaj zonaj dla vyhułu sabak. Chram płanujuć pasadzić u častcy, dzie skancentravana najbolš darosłych drevaŭ.
Stylistyka chrama vybranaja adroznaja ad taho psieŭdaruskaha stylu, u jakim budujecca bolšaść pravasłaŭnych chramaŭ u Biełarusi. Jaho architektura pierajmaje formy chrama manastyra Džvary pieršaj pałovy VII stahodździa, jaki raźmieščany na viaršyni hary kala Mcchiety i dzie, pavodle histaryčnych krynic, pastaviła kryž śviataja Nina, tytularnaja śviataja minskaha prychoda, jaki płanuje pabudavać chram.
Kryžova-kupalny chram u płanie pramavuholny (25,1 × 19,7 m) z tryma hranionymi vystupami — bakavymi vychadami i apsidaj, što adsyłaje da kryžovakupalnaj formy hruzinskaha chrama, jaki mieŭ apsidy z kožnaha z čatyroch bakoŭ. Na hałoŭnym fasadzie arkadnaja halereja. Chram pierakryty schilnym čarapičnym dacham, a nad centralnaj častkaj pastaŭleny vaśmihranny baraban, zavieršany šlemapadobnym kupałam.
Chram płanujuć bahata azdobić zvonku — fasady, azdoblenyja arkami, nišami i dekaratyŭnymi pajasami, buduć ablicavanyja naturalnym kamieniem. Źleva da ŭvachodu budzie pastaŭleny pakłonny kryž z vapniaku — tradycyjnaha materyjału dla hruzinskaha chramavaha budaŭnictva, a sprava — mazaika z vyjavaj śviatoj Niny. Jašče adna mazaika, z vyjavaj Baharodzicy Aranta («Znamieńnie»), upryhožyć apsidu chrama.
Aŭtaram architekturna-płanirovačnaj kancepcyi vystupaje AAT «Charmia». Heta dyzajnierskaja studyja, jakaja, miarkujučy pa jaje sacsietkach, da hetaha zajmałasia stvareńniem pradmietaŭ interjeru, a prajekt chrama kala Kalvaryi ci nie pieršy jaje architekturny prajekt.
Razhadka źmieny kirunku dziejnaści kryjecca ŭ tym, što «Charmija» źjaŭlajecca dačkoj architekturnaj majsterni «Prachram», jakaja bazujecca ŭ Maskvie i aktyŭna zajmajecca prajektavańniem pravasłaŭnych chramaŭ. Na hetuju suviaź pakazvaje adnolkavyja łahatypy ŭ dźviuch studyj, a taksama nieadnarazovyja zhadki i fotazdymki ŭ sacsietkach «Charmija», biez udakładnieńnia jaho roli, architektara Dźmitryja Astravumava. Miarkujučy pa sajcie «Prachram», biełaruskaja studyja vyrablaje prydumanyja ŭ maskoŭskaj studyi rečy, słužačy tak by mović vytvorčym učastkam dla jaje.
Dźmitryj Astravumaŭ ciapier žyvie ŭ Maskvie i Sankt-Pieciarburhu, ale naradziŭsia jon u 1985 hodzie ŭ Minsku. Tut, u Biełarusi, jon skončyŭ architekturny fakultet BNTU pa kafiedry «Dyzajn architekturnaha asiarodździa» i z 2009 hoda zajmaŭsia prajektavańniem chramaŭ.
Majsterniu «Prachram» jon zasnavaŭ u 2018 hodzie ŭžo ŭ Rasii. Tam ža pačaŭ vyvučać bahasłoŭje, atrymaŭšy ŭ 2021 hodzie stupień mahistra, a sioleta skončyŭ aśpiranturu Duchoŭnaj akademii. Astravumaŭ — siabar sajuzaŭ architektaraŭ Biełarusi i Rasii, hałoŭny redaktar almanacha «Słova i kamień», pryśviečanaha sakralnaj architektury i mastactvu, a taksama siabra Rady pa chramavaj architektury pry Sajuzie architektaraŭ Rasii.
Tyja, chto mieŭ prafiesijnyja kantakty ź Dźmitryjem Astravumavym, apisvajuć jaho jak čałavieka z vyrazna prarasijskimi pohladami. Jahonaja dziejnaść charaktaryzujecca traktoŭkaj architektury praz pryzmu ideałohii «ruskaha śvietu», dzie miascovyja kulturnyja asablivaści i histaryčny kantekst ihnarujucca na karyść prapahandy adzinaj rasijskaj pravasłaŭnaj tradycyi.
Astravumaŭ źjaŭlajecca aŭtaram šerahu prajektaŭ chramaŭ u Biełarusi — u Minsku, Połacku, Barysavie, Navahrudku, Kałodziščach, Łaŭryšavie, Ilji, Chvošnie i Kajšoŭcy (nie ŭsie byli realizavany). Siarod jahonych prac — chram u honar kniazia Alaksandra Nieŭskaha, jaki ŭjaŭlaje saboj blizkuju rekanstrukcyju Kałožskaj carkvy, a taksama prajekt adnaŭleńnia Alaksandra-Nieŭskaha sabora žanočaha manastyra ŭ honar Śviatych Žon-Miranosic u Babrujsku.
Pry hetym majsternia «Prachram», jakoj jon kiruje, vystupała ŭ Biełarusi pad ułasnym imiem, adnak u vypadku z prajektam chrama kala Kalvaryjskich mohiłak ź nieviadomych pryčyn spatrebiłasia inšaja jurydyčnaja asoba.
U apošnija hady dziejnaść majsterni ŭsio bolš aryjentujecca na rasijski rynak, jaki zabiaśpiečvaje šyrejšyja mahčymaści i finansavańnie.
Astravumaŭ adkryta pracuje i na akupavanych Rasijaj terytoryjach Ukrainy. Tak, u 2017 hodzie jon zajmaŭsia adnaŭleńniem Śviata-Ivierskaha žanočaha manastyra ŭ Daniecku, što mocna paciarpieŭ u vyniku rasijskaj ahresii. U 2021 hodzie raspracavaŭ prajekt Mikoła-Śpirydonaŭskaha chramavoha kompleksu ŭ Kierčy.
U 2022 hodzie, užo paśla pačatku šyrokamaštabnaha ŭvarvańnia Rasii va Ukrainu, majsternia «Prachram» praciahvała pracu ŭ akupavanym Krymie. U hety pieryjad jana zajmałasia interjeram chrama prapadobnaha Sierhija Radaniežskaha ŭ vioscy Novaatradnaje, a taksama prajektam interjeraŭ i fasadnaha dekoru chrama śviatoha Hieorhija Pieramožcy Śviata-Hieorhijeŭskaha žanočaha manastyra ŭ Kierčy. A ŭ 2025 hodzie majsternia raspracavała eskizny prajekt kaplicy ŭ honar archanhieła Michaiła dla kierčanskaha Mikoła-Śpirydonaŭskaha chramavoha kompleksu.
«Naša Niva» — bastyjon biełaruščyny
PADTRYMAĆ-
Draŭlany kanstruktyvizm pad koŭš: u Hrodnie źniščyli adzin histaryčny dom i ŭzialisia za druhi
-
Hledačy Teatra lalek sychodziać, nie dahledzieŭšy śpiektakl. Čamu?
-
«Svaje — heta słova, jakoje dla mianie vyznačaje teatr». Vialikaja hutarka z akcioram Michasiom Zujem pra scenu, kamandu i teatr u emihracyi
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary