Na praciahu bolš čym 20 hadoŭ lehinsy byli simvałam spartyŭnaj mody i častkaj paŭsiadzionnaha harderoba. Ale siońnia hetaja zvykłaja reč pastupova zdaje pazicyi — na pieršy płan vychodziać šyrokija i svabodnyja spartyŭnyja štany, jakija ŭsio čaściej vybiraje maładoje pakaleńnie.
Jak piša The Wall Street Journal, papularnaść lehinsaŭ zrabiła brendy Lululemon, Alo, Vuori, Beyond Yoga viadomymi i prybytkovymi.
U 2017 hodzie navat Muziej sučasnaha mastactva ŭ Ńju-Jorku ŭklučyŭ lehinsy Lululemon u śpis najvažniejšych modnych rečaŭ.
U krasaviku kampanija Edited, jakaja śpiecyjalizujecca na analizie modnaha rynku z dapamohaj štučnaha intelektu, apublikavała dakład z krasamoŭnaj nazvaj «Śmierć lehinsaŭ?». U im adznačajecca, što prodažy hetaj katehoryi adzieńnia ŭžo niekalki hadoŭ paśladoŭna źnižajucca.
Kali ŭ 2022 hodzie na lehinsy prypadała 46,9% prodažaŭ, to ŭ 2025-m užo 38,7%. Sam Lululemon prahnazuje rost usiaho na 5—7% u paraŭnańni z 10% u minułym hodzie.
Pakaleńnie Z robić staŭku na svabodu i kamfort. Maładyja ludzi achvotniej apranajuć lohkija, šyrokija spartyŭnyja štany (Big Workout Pant), jakija nahadvajuć modnyja vobrazy 1990-ch.
«Dziaŭčyna, jakaja nie demanstruje cieła ŭ abciahnutym adzieńni, a chavaje jaho pad svabodnymi štanami, vyhladaje bolš cikavaj i stylnaj», — adznačajuć dyzajniery spartyŭnaha adzieńnia.
Ad tancpołu da fitnes-kłubaŭ
Vobraz vialikich spartyŭnych štanoŭ maje karani ŭ tancavalnaj kultury 1990-ch, kali tak apranalisia śpiavački i tancorki, naprykład, u klipach R&B i chip-chop hurtoŭ. Siońnia hetuju estetyku pieraniali fitnes-studyi i joha-kłuby.
Jak žančyny tak i mužčyny na zaniatkach apranutyja jak tancory 1990-ch u malusieńkija topy i svabodnyja, lohkija štany-parašuty.
Nastaŭniki tancaŭ i johi kažuć, što šyrokija štany dazvalajuć ruchacca svabodna, nie stvarajučy dyskamfortu, jaki časta ŭźnikaje ŭ abciahvajučych lehinsach.
Niekatoryja navat nazyvajuć ich «štany dla stojki na rukach» — nastolki zručnymi jany pavinny być dla lubych ruchaŭ.
Kali jašče niekalki hadoŭ tamu lehinsy byli ledź nie ŭniviersalnaj formaj dla zaniatkaŭ sportam i štodzionnaha žyćcia, to ciapier jany ŭsio čaściej asacyjujucca ź minułaj epochaj. Dla maładoha pakaleńnia heta prykmieta staroj mody, jakaja pastupova adychodzić.
Jak žartujuć instruktary: «Kali ty nosiš lehinsy — ty ŭžo vyhladaješ jak bumier».
Ciapier čytajuć
Stancyju mietro na praśpiekcie Pieramožcaŭ pieradumali budavać?5
Kamientary