Na ramont Łuŭra chočuć vydatkavać 800 miljonaŭ jeŭra. A na «Monu Lizu» mohuć uvieści asobny dadatkovy kvitok

Kiłamietrovyja čerhi, jakija pieratvarajuć vizit u Łuŭr u sapraŭdnaje fizičnaje vyprabavańnie, dach, što praciakaje prosta praz znakamituju šklanuju piramidu, i vahańni tempieratury, jakija pahražajuć tvoram mastactva. Z takimi prablemami sutyknuŭsia samy papularny muziej u śviecie amal praz 40 hadoŭ paśla apošniaj bujnoj rekanstrukcyi.

Jak piša Financial Times, prafsajuzy i supracoŭniki muzieja hadami papiaredžvali, što ŭstanova pracuje na miažy svaich mahčymaściaŭ. Rekanstrukcyja 1989 hoda, kali była ŭźviedziena piramida, była raźličana na 4 miljony naviedvalnikaŭ u hod. Ciapier ža muziej rehularna prymaje ŭdvaja bolš, a da pandemii ličba dasiahała 10 miljonaŭ.

Letaś supracoŭniki navat zładzili stychijnuju zabastoŭku, z-za jakoj muziej pryjšłosia začynić na dzień. «Łuŭr pierapoŭnieny, jon staŭ achviaraj ułasnaha pośpiechu», — kažuć jany.

U 2023 hodzie adnu z vystaŭ daviałosia admianić z-za praryvu truby, a niestabilnyja sistemy aciapleńnia i kandycyjaniravańnia pryvodziać da taho, što letam u załach nievynosnaja śpioka, a zimoj — choład.

Dyrektarka muzieja Łarans de Kar jašče ŭ studzieni ŭ liście da Ministerstva kultury biła tryvohu, zaklikajučy da terminovaha ramontu 800-hadovaha budynka. Infrastruktura — ad prybiralniaŭ i kaviarniaŭ da navihacyi — nie vytrymlivaje nahruzki.

Nidzie prablema pierapoŭnienaści nie adčuvajecca tak vostra, jak pierad «Monaj Lizaj». Štodnia kala 20 000 naviedvalnikaŭ šturchajucca, kab zrabić fota i choć na imhnieńnie ŭbačyć karcinu.

«Novy reniesans Łuŭra»

Padobna, što hety zvarot byŭ uzhodnieny ź Jelisiejskim pałacam, bo ŭžo praz tydzień prezident Francyi Emaniuel Makron abviaściŭ ab płanach maštabnaj rekanstrukcyi Łuŭra, košt jakoj aceńvajecca ŭ 800 miljonaŭ jeŭra.

Pavialičyć

Płanujecca, što kala pałovy biudžetu na rekanstrukcyju pojdzie na ramont sistemy aciapleńnia i kandycyjaniravańnia.

Pavodle płana Makrona, «Monu Lizu» pieraniasuć u śpiecyjalna pabudavanuju padziemnuju halereju sa značna bolšaj prapusknoj zdolnaściu. Kab trapić tudy, treba budzie nabyć asobny kvitok. Prezident spadziajecca, što heta dazvolić pavialičyć ahulnuju kolkaść naviedvalnikaŭ da 12 miljonaŭ u hod.

Pry hetym, pakul natoŭpy źbirajucca la «Mony Lizy», inšyja ŭnikalnyja kalekcyi, naprykład, jehipieckich staražytnaściej, zastajucca amal pustymi.

Adkul uziać hrošy?

Uličvajučy napružany stan dziaržaŭnych finansaŭ Francyi, Makron paabiacaŭ, što prajekt, jaki ŭžo atrymaŭ nazvu «novy reniesans Łuŭra», budzie finansavacca za košt prodažu kvitkoŭ, achviaravańniaŭ, prodažu suvieniraŭ i licenzijnych zboraŭ ad filijała Łuŭra ŭ Abu-Dabi.

Adnak ekśpierty staviacca da hetaha skieptyčna. Letaś čysty prybytak Łuŭra skłaŭ usiaho 19 miljonaŭ jeŭra, što katastrafična mała dla prajekta koštam 800 miljonaŭ, jaki, chutčej za ŭsio, jašče padaražeje.

Płanujecca, što naviedvalniki nie z krain ES buduć płacić za ŭvachod bolš. Hety krok nakiravany na pavieličeńnie dachodaŭ, pakolki dziaržava skaračaje svaju padtrymku, jakaja letaś skłała 68% biudžetu Łuŭra (dla paraŭnańnia, u 2019 hodzie, da pandemii, było 58%).

Ceny na kvitki ŭžo vyraśli na 30% da 22 jeŭra, chacia dla moładzi i školnych hrup uvachod zastajecca biaspłatnym.

Kab znajści hrošy, kiraŭnictva Łuŭra pačało aktyŭna zalacacca da bahatych donaraŭ z ZŠA i Japonii, ładziačy dla ich zakrytyja viečaryny i pryvatnyja prahlady. Heta vyklikaje krytyku ŭ Francyi, dzie dziaržava histaryčna harantavała roŭny dostup da mastactva dla ŭsich.

Pradstaŭniki prafsajuzaŭ vitajuć palapšeńnie ŭmoŭ dla naviedvalnikaŭ, ale aścierahajucca nastupstvaŭ: «My znachodzimsia ŭ pracesie stvareńnia muzieja dla bahatych».

• 1
• 0
• 0
• 0
• 0
• 0
• 0
• 0