Rasijskija siłaviki adrezali hienitalii azierbajdžancam, zakatavanym da śmierci padčas rejdu ŭ Jekaciarynburhu
Z zahinułych padčas siłavoha rejdu ŭ Jekaciarynburhu Zijadzina i Husiejna Safaravych ździekavalisia paśla zatrymańnia, raskazali dva surazmoŭcy «Prajekta». Adzin ź ich, blizki da Kramla, paviedamiŭ, što achviaram adrezali hienitalii. Ci było heta ździekam paśla śmierci ci było instrumientam katavańnia, nieviadoma, piša «Ahientstvo».
Husiejnu i Zijadzinu Safaravym rasijskija siłaviki adrezali pałavyja orhany, raskazała «Prajektu» krynica, blizkaja da Kramla.
Druhi surazmoŭca vydańnia, azierbajdžanski hramadski dziejač, jaki paprasiŭ ab ananimnaści, skazaŭ tak: «Ź ich ździekavalisia».
Abodva surazmoŭcy nie ŭdakładnili, ci adbyłosia heta padčas katavańniaŭ siłavikami, ci paśla hibieli Safaravych. Azierbajdžanskija ŭłady nie stali afišavać heta, «kab nie zhubić prestyž», dadaŭ druhi surazmoŭca «Prajekta».
Ekśpiertyza, praviedzienaja ŭ Baku, pakazała, što Husiejna i Zijadzina Safaravych katavali, a pryčynaj śmierci staŭ šok ad atrymanych traŭm.
Vydańnie Minval 1 lipienia apublikavała fatahrafii bratoŭ Safaravych — na ich ciełach množnyja traŭmy. Vobłaść pachviny razmytaja.
Minval taksama apublikavała vytrymki z vynikaŭ azierbajdžanskaj ekśpiertyzy: «Vyjaŭleny krovapadcioki ŭ vobłaści pałavych orhanaŭ, a taksama pałasapadobnaja drapina pamieram 17×2,5 sm na ŭnutranaj pavierchni ściahna». Na adnoj z fatahrafij, apublikavanaj vydańniem, na zadniaj častcy cieła adnaho z zabitych bačnyja mocnyja krovapadcioki.
Azierbajdžanski žurnalist i brat Safaravych Siejfiedyn Husiejnli kamientavaŭ hibiel azierbajdžancaŭ u miascovaj presie, ale na paviedamleńni «Prajekta» nie adreahavaŭ.
Husiejn i Zijadzin Safaravy zahinuli paśla masavaha zatrymańnia azierbajdžancaŭ u Jekaciarynburhu ŭ kancy červienia. U paśviedčańni, vydadzienym biuro sudmiedekśpiertyzy Śviardłoŭskaj vobłaści, ukazana, što śmierć zafiksavana 27 červienia. U vypadku Husiejna Safarava pryčynaj śmierci nazvana ŭskładnieńnie ad pierałomu rebraŭ, ale pry hetym sudmiedekśpierty nie paličyli heta zabojstvam. U vypadku Zijadzina Safarava ŭkazana, što pryčynaj śmierci źjaŭlajecca išemičnaja chvaroba serca.
Ciapier čytajuć
Biełarusu na 100 hadoŭ zabaranili ŭjezd u Rasiju — za ŭdzieł u minskich maršach 2020 hoda1
Kamientary